| هفوات الحياة | ' باللهجة العراقية '

البارت السابع

#هفوات الحياة
#بقلم : الراوية
#البارت السابع

بسم الله الرحمن الرحيم ❤

صلوا على النبي ❤

.

مراد..

اروح و ارجع بالممر و اني احس جبال على صدري.. اباوع ل عمتي و عمي گاعدين و عمتي دمعتها بطرف عينها و هي تدعي و تلهج بالدعاء ل زينب

صوت زينب يرن بأذني و هي تصرخ و تبچي و فجاة بدا صوتها يختفي
عمتي ما تحملت الي ديصير بنتها.. باغتتنا و فاتت للصالة
اني بقيت واگف يم الباب اريد ادخل بس اكو نسوان جوا
اسمع عمتي تصيح شبيها بنتي شبيها.. دمعتي وگعت على خدي و اني اسمع جواب الدكتوره و هي تگول بحرقة گلب

- خيه يا بنت ما تگوليلي.. بنتچ الي دمرتيها بهذا العمر
لو فارشه عباتچ بالشارع و أهل الرحم ساعدوچ و لا تذبيها على رجال و هي بهذا العمر.. وينها وين الحمل و الولاده

ما ادري ليش بس كلامها عبالك خنجر و ضرب بگلبي.. يمكن هسا يلا انتبهت انو زينب صغيره
بعدها طفله و هسا شايله بيدها طفل

گعدت على الكرسي و اني مخلي راسي بين ايديه.. ادعي من ربي يطلعها سالمه من صالة الولاده
ما اريد شي حتى الطفل ما اريده المهم هي..

هي الي شافت الظيم و القهر من عند امي و بقت ساكته و متحمله لخاطري و لخاطر ابنها..

باوعت لأمي الي گاعده و هي مكتفه ايديها گدام صدرها و مطنگره كالعاده
اباوعلها و اعاتبها على سوالفها وي زينب
الي ما شفت منها الا كل خير.. عمرها ما تبطرت على شي.. و لا گالت ليش هيچ
تسمع كلام من امي يسم البدن و ما تحچي حرف و لا تراددها

و اني بس اباوع و ما بيدي شي.. هاي امي
مهما يصير ما اگدر اعاتبها لو احچي شي يغثها
بس زينب هماتين زوجتي و ام ابني و ما يهون عليه الي ديصير وياها
بس اني بين نارين.. نار امي و نار زينب

ساعة تقريباََ او اقل و انفتح الباب و طلعوا الممرضات يدفعون بالسديه الي عليها زينب.. الفاقده و ما تعرف شنو ديصير

گمت من مكاني و اتجهت الهم و اني احاول افهم شديصير.. عمتي گامت تلطم و تبچي من گالت الممرضه المريضه فقدت
لازم ناخذها لغرفة الانعاش..حسيت رجليه بعد ما تگدر تشيلني
شهاب اخويه اجا و لزمني قبل لا اوگع.. و هو يگول توكل بالله مراد

اباوعلها وجهها اصفر كركم و شفايفها بيض.. و بقايه دموع على طرف خدها..

اخذوها للانعاش و رحت وياهم.. دخلوها للغرفة و بقيت اني و البقيه عند باب الغرفة.. گاعد و اهز رجلي بتوتر و خوف
ممرضات و دكاتره يفوتون و يطلعون و يگولون ان شاء الله بخير لا تقلقون

شلون ما نخاف و اني قطعة من گلبي بالغرفة بين الحياة والموت.. اجا ابويه گعد بصفي و هو يطبطب على كتفي و يگول ادعيلها و ان شاء الله رب العالمين يلطف بحالها