| هفوات الحياة | ' باللهجة العراقية '

البارت العاشر

#هفوات الحياة
#بقلم : الراوية
#البارت العاشر

بسم الله الرحمن الرحيم ❤

صلوا على النبي ❤

.

زينب..

- هذا الصار يا بنت خالي

حچه حچايته و اني حسيت شي و خنگني
بقى لحظات واگف وهو يحاول يطمن عليه
قبل لا يستأذن و يسلم و يروح..و بخطوات مهزومه و مكسورة فتت للبيت..

اجيت افوت للغرفة و تلگتني امي توي طالعه من الحمام
باوعتلي ثواني و گالت

-زسنب شبيچ

- ماما مراد ما يريد يطلگني
ماما طلگونا غيابي

هي شهگت و ضربت على صدرها و اني گمت ابچي بحرقة گلب..و اجت امي ناحيتي و اخذتني ل حظنها و هي اطمن بيه.و تگول ربچ يكتبلچ الي بي خير..
و من سابع سماه راح يحلها.. و گعدت احچيلها عن التصوير و بكاء مراد الي بقى مطبوع بالي

و اني قنعت نفسي و گمت ادعي ربي يقدملي الي بي بي خير..

على العشا امي گالت ل بابا..و خطية انقهر
باوع ل ماما بنظرة عتب و گام على حيله و طلع
و اني باوعت ل ماما الي غورقت عيونها..اعرفها بعدها ل هاي اللحظه ضميرها يأنبها

و مرت الايام و اني بداخلي شي ينتظر مراد
يگول راح يجي يوم و يدگ الباب و يگول يا زينب اني اريدچ امشي نروح ل بيتنا
بس هالشي ما تحقق و ما شفت لا مراد..و لا واحد من اهله

بيوم من الأيام..بالليل اجا خالي علينا
ضيفته و گعدنا نسولف و نضحك..بس رغم ابتسم و اضحك وياهم الا اكو غصة بداخلي

تعدل خالي بگعدته و گال

- اليوم شفت مراد

بس گال هيچ اني رفعت راسي اله و ركزت وياه
حتى ماما انتبهت ل حركتي..بس مو بيدي هالشي لحد هسا مرات اترجى جيته

- اي و شنو يگول الافندي

حچاها بابا و خالي كمل

- سألني على زينب و شلون وضعها.. بصراحة قهرني
تعبان و مقهور كلش الرجال مبين بعده يريد زينب

- لو يريدها صدگ چان وگف وياها..مو يوگف وي اهله و يترجاها تبقى

حچاها ابويه بقهر و خالي هز راسه بقلة حيله و كمل كلامه

- گال الرجال..خليها تنتظرني
بس احل مشكلتي وي اهلي و ارجعها.. آني ما اگدر استغني عنها..هي حبي الأول و الاخير و ام ابني ما افرط بيها

كمل كلامه و هو يباوعلي

- يگول ما شفت منها الا كل خير..عمرها لا شكت و لا حچت

- و هذا الي دمرها

حچاها ابويه..و آني بقيت ساكته
بس حسيت گلبي رف من شفته بعده متمسك بيه و يريدوني..خالي بقى شويه و سلم و طلع..