| هفوات الحياة | ' باللهجة العراقية '

البارت الأول

#هفوات الحياة
#بقلم : الراوية
#البارت الأول

بسم الله الرحمن الرحيم ❤

صلوا على النبي ❤

.

فاطمه..

گاعده بالحديقة و اني اباوع ل زينب الي تلعب بالحديقة..مخليه ايدي على خدي و إني مرة ابتسم و مرة اصيحلها ادير بالها..

باوعتلي و ابتسمت و هي تگول ماما ما بيه شي..
جريت حسرة و إني ارجع اباوع الها
و ذاكرتي ترجعيني ليورا..للايام الي عشتها و ظل ثقلها على گلبي..

قبل كم سنة چان عندي ولد واحد..اسمه ساجد
چان اغلى شي صار بحياتي..
بس فقدته..فقدته و إني بعدني ما شبعانه منه..

اسمي فاطمه..تزوجت زواج تقليدي..
زوجي صادق كان الولد الرابع لابوه..ابوه عنده ٨ اولادة و اربع بنات..

اول ما تزوجت گعدت وياهم..بس المشاكل و العائلة الچبيره و سوالف الچناين خلتنا نعزل بيت وحدنا..

صار عندي ولد واحد و سميناه ساجد..عمره سبعة أشهر و طلبوا زوجي للعسكرية

احتار زوجي وين يخليني..لأن چنت بعدني شابة و صغيره و ما يگدر يخليني وحدي بالبيت
و من سابع المستحيلات انو ارجع بيت عيالي..لأن زوج حماي الچبيره متحكمه بالصغيره و الچبيره..و متسلطه كُلش و اني ما اريد ارجع و اشوف الظيم من جوه ايدها..

آخر شي راح ل بيت اهلي
عندي ٣ اخوان حيدر و حسين و محسن
و اخت وحده  اسمها بتول متزوجه و زوجها متوفي و عدها بنت و ولد.. وفاء و امجد
و سألهم على بيت قريب منهم..حتى او مشتمل..حتى من يلتحق يدرون بالهم عليه و على ابني

دورونا و ما حصلنا ورا اسبوعين اقترحت اختي بتول
گالت اكو بيت قريب منا بالمنطقه المقابيلنه..چبير و طلبت انو نأجره و نگعد سوية

راح زوجي و شافه و الحمدلله چان ايجارة رخيص
وافقوا زوجي و اخواني و ابويه و انتقلنا ورا اسبوعين اله

و بهاي الفترة صار عندي حمل..
سكنا بالبيت و الحمدلله استقرينا..بس ما نحس براحة بي..
طول الوقت احس اكو شي بي..و خصوصاً المغرب نبدي نسمع اصوات غريبه..و كم مرة اشوف خيالات و اشياء توگف شعر الراس

بس الحمدلله چان ايمانه برب العالمين قوي..و خوفنا قل..چان اكو شعور مرات يگلي فاطمه اطلعوا بس چنت اتجاهله..

و مرت الايام و الأشهر و اجا موعد ولادتي..بال١٩٨٩  الحمدلله ولدت و جبت بنيه..اخذها صادق بحظنه و هو يصلي على نبي و اجا ابني الي عمره سنتين الا شهر..و سأله صادق شنو نسمي اختك
و هو بلهجة طفوليه گال " زينب "
و سميناها على طلب سجودي..

و التحق زوجي وراها..و بقيت إني و ابني و بنتي وي اختي
اخواني محد بيهم قصر دائماً يجون علينا