| هفوات الحياة | ' باللهجة العراقية '

البارت الثاني عشر

#هفوات الحياة
#بقلم : الراوية
#البارت الثاني عشر

بسم الله الرحمن الرحيم ❤

صلوا على النبي ❤

.

زينب..

تقدم شهاب ل أسامة الي نزل و وگف يم الباب..باوعلي شهاب بس اني التفتت للجهة الثانية
سمعته سلم عليه و يسأله عن حاله

بس التفتت من گال

- صدگ مبروك و شايف كل الخير
و نعم ما اختاري و ربي يوفقك و يوفقها

- الله يبارك بيك..تسلم

سكت شهاب لحظات و گال

- بس إذا تسمحلي اسلم عليها

تفاجئت من گال هيچ..و أسامة باوعلي و رجع باوع ل شهاب و گال بابتسامة

- افه عليك.. تفضل

دنگ شهاب و باوعلي...و الغصه وگفت بحنجرتي من شفت عيونه مغورقه لحظات و گال

- ابريني الذمة زينب على كلشي بدر مني
والله شاهد تبقى معزتچ هنا

حچاها و أشر على گلبه..و اني كتمت دمعتي گوه و هو كمل

- لو الف چنه امي تخلي بالبيت ما يجن وي اضفرچ

ما تحملت و دمعتي وگعت على خدي و التفتت للجهة الثانية.. شهاب غالي عليه و كلش و عمري ما راح انسى افضاله عليه شلون چان يهتم بيه و يجيبلي و لأبني من مصروفه

سمعت تنهيدته و تعدل بوگفته و گال موجهه كلامه ل أسامة

- خوية هسا سمعت و شفتك وي زينب..و عرفت انو انت زوجها..بس هاا خلي بالك زينب درة

حچاها و أشر عليه و اني باوعتله من گال بقهر

- بس اهلي ما نصفوا وياها خليها امانة عندك
و لا تستغلها بيوم..لأن ترا ما تتعوض

نبرة القهر الي بصوته خلت دموعي توگع..يمكن أكثر شخص مقهور من بيت عمي عليه و على طلاگي من مراد

طبطب أسامة على كتف شهاب و گال بابتسامة

- امنو مخليها بعيوني

هز شهاب راسه ب اي..و سلم و مشى بس قبلها باوعلي و ابتسم بخفوت
جريت حسرة و مسحت دمعتي و دخل أسامة للسيارة و شغل السيارة..تنهدت و اني مقهوره على شهاب لحد هسا كلامه يرن بأذني
عزيز عليه و اعتبره اخويه الي ما جابته امي
شگد ساندني و وگف وياي. بس امه الله لا ينطينها خلته يگلب عليه بأخر الايام
بس شعجب هسا اجا و حچه وياي ؟

التفتت ل أسامة الي گال

- مبين هالولد زين..

هزيت راسي و گلت

- كلش حباب و زين..گبل چان يساندني و ينطيني من مصروفه
ما اگدر انسة انسى افضاله و مساعدته الي