| هفوات الحياة | ' باللهجة العراقية '

البارت التاسع عشر

#هفوات الحياة
#بقلم : الراوية
#البارت التاسع عشر

بسم الله الرحمن الرحيم ❤

صلوا على النبي ❤

.

زينب..

رجعنا للبيت بعد ما بشرت أسامة الي فرح و گعد يحمد رب العالمين

خابرت ماما و گلتلها و سمعت نبرة الفرح بصوتها و هي تگول والله حسيت بهالشي

العصر راح اسامة لأهلي حتى يجيب وياه حسوني
فرجت صراحة لأن اني بطبيعتي احب الأطفال هواي صح سارة بعدها ما صار عمرها سنة بس هي من النوع الهادئ يعني مو اربعة و عشرين ساعة تبچي و تريد هالشي و هالشي.. يعني رغم صغر سنها ما معذبتني

سويت العشا و الجهال چانوا بالصالة يم أسامة
الي گال اخذچ للدكتوره باچر حتى تشوفين وضع الحمل و گلت اله ميخالف..

كملت الهم العشا و التمينا حول السفرة..
اباوع ل حسوني گاعد يم موسى و واحد يخلي شي گدام الآخر..ابتسمت على تصرفاتهم و اني احمد ربي انو موسى و اخوانه ما يضوجون من حسوني

كملوا العشا و شلت المواعين غسلتهن
و رجعت للصالة من گعدت سمعنا الباب يندگ..گام أسامة فتح الباب چانوا بيت ابو محمد..

گمت تلگيتهم و دخلنا للصالة..
ام محمد أنسانه حبابه و زينه و صاحبة نفس طيبه
كلش احترمها و اعزها و احسها اقرب وحده الي.. دائما تزورنا لأن بيتهم قريب علينا

بقينا نتعلل لوقت متأخر ف استأذنوا و راحوا وصلناهم لحد الباب و سلموا و صعدوا بسيارتهم

الجهال اخذتهم للغرفة و ناموا و رحت للغرفة مالتي
غيرت ملابس سارة و رضعتها و گمت انوم بيها
فات أسامة و هو يحچي بالتلفون..گعد بصفي و هو مركز بالكلام
من خلال كلامه عرفت انو ديحچي شي بخصوص الشغل

عشر دقايق هيچ و سد التلفون..باوعت عليه و گلت

- خوما اكو شي ؟

دنگ و باس سارة الي نامت من خدها و گال

- لا عمري ماكو شي..بس شوية مشاكل بالشغل تنحل ان شاء الله

- ان شاء الله

حچيتها و گمت على كيفي خليت سارة بمكانها
غطيتها و بستها من خدها و رجعت للچرباية

باوعت ل أسامة چان صافن بالسگف..تحمحت و گلت

- خوما المشكله چبيره ؟

- لا لا مو كُلش..بس تعرفيني ابقى افكر

ابتسمت و گلت

- و تعشعش بالك و گوه تطلع

ضحك و هو يلتفت عليه و يگول و تقرب عليه

- مثل ما عشعشتي بگلبي و بالي

گمت اضحك و هو ابتسملي و سحبني لحظنه و گال

- اضحكي شعندي غير ضحكتچ الي چنها العافيه