| هفوات الحياة | ' باللهجة العراقية '

البارت الرابع و العشرون

#هفوات الحياة
#بقلم : الراوية
#البارت الرابع و العشرون

بسم الله الرحمن الرحيم ❤

صلوا على النبي ❤

.

أسامة..

طلعت من بيت أهل زينب..و اني احس نار و مشتعلة بصدري
صعدت بالسيارة و غمضت عيوني و اني اگول أسامة اهدى..كلشي ينحل ما يبقى شي على حطته..
شغلت سيارتي و أني التفت لفته اخيرة و اباوع على البيت قبل لا انطلق بسيارتي و اني متوجهه لبيتي..
ردت اهدي اعصابي بس ما گدرت..الي صار ما اگدر ابقى ساكت عليه.. لأزم الي سوه هيچ يتحاسب..

زينب چانت حلم بحياتي من يوم سكنوا يمنا..
بس چنت أخاف من فرق العمر الي بينا..و انها من صغرها تتجنبني بسبب تصرفاتي ناحيتها
چنت من دون اولاد المنطقة احب احچي وياها..و خصوصاً انها چان صاحبة السان و حچيها ينحب
خفت لا تبقى على تكرهني..ف مرات اسكت و اتركها بس ما چان بيدي احب اشوف عصبيتها و خزرتها ناحيتي
تزوجت و الحمدلله رب العالمين رزقني بزوجة صالحة و محبة و طيبه..و اولاد
بس كلشي قسمة و نصيب.. بيوم من الايام خسرتهم و أيست من هاي الحياة و گلت راح اعيش لأجل اولادي اولاد المرحومه..
بس كلشي تغير من سمعت انو زينب تريد تنخطب بعد ما تطلگت..ما فكرت مرتين و لا ترددت للحظه
و خطبتها..ما شفت منها الا كل خير..من زمان احبها ويمكن ما ادري بنفسي..بس من صارت الي و أم اولادي
عرفت نفسي شگد چنت احبها..لدرجة ما تغفى الي عين إذا مو هي گبالي

جريت حسرة من وصلت لبيتي و طبگت السيارة گدام الباب
ردت انزل بس اعصابي بعدها فايره.. أخاف انزل و اخلي كل قهري بالاولاد..ما أريد اذيهم بس هما جابوا الاذية لنفسهم و لزينب..لو من الاول جايين و حاچين الي ما چان صارت هاي المشكلة
چان گدرت اتدارك الموقف..و اشيل الفكرة الي چانت بالهم..

جريت حسرة و اني امسح على وجهي..دنگت و سندت راسي على الاستيرن و أني أتذكر الي صار

من راحت زينب لأهلها و طلعت بدون ما الحگها او ارجعها..بقيت گاعد و أني اگول ليش يا أسامة سويت هيچ
انت تعرف زينب حق المعرفة..ربيتها على ايدك و تعرف كل صغيرة و چبيره بيها
ليش ما فكرت لحظه بينك و بين نفسك..و گلت معقولة زينب هيج تسوي..

چنت گاعد برا اني و صديق الي.. اجا وائل و هو يبچي بحرقة
اخذته لحظني و گلتله بقلق و اني اشوف رجلة ملفلفه

- شبيها رجلك ؟

- ماما وگعتني

من گال هيچ حسيت عيوني صارت بگصتي و كلش عصبت..التفت ل صديقي الي گال بعتب

- ابو مروة صدگ چذب مو ذوله ايتام..و اولاد المرحومه لخاطر عشرتك وياها لا تقبل ينذلون..و فوگاها اسالك تگول زينة وياي..شنو يفيد اذا زينة وياك و وي اولادك لا ؟