| هفوات الحياة | ' باللهجة العراقية '

البارت الثاني

#هفوات الحياة
#بقلم : الراوية
#البارت الثاني

بسم الله الرحمن الرحيم ❤

صلوا على النبي ❤

.

زينب..

رجعنا بالليل من بيت عمي..و گعدت وي امي و خالتي و مرت خالي
يسولفن و إني ساكته و اباوعلهم..
بالحچي مالهن جابن طاري اسامةو مرته و شلون مدللها هي و بنتها..و گعدت امي تدعيلهم
امي تحبهم هواي و تعزهم

اما اني ف عگدت حاجبي و اني اتذكر الذكرى الي صارلها كم سنة ما تروح من بالي..من رحنا الهم

چنا واگفين يم باب البيت مالهم..اني و بنت اخوه نلعب

فاتت بنيه و هو باوعلي و گال

- عمو زينب تشوفين هذيچ البنيه ؟

هزيت راسي ب اي و گلت

- اي عمو..منو هاي ؟

- هاي خطيبتي..شلونها حلوه مو ؟

- اي عمو حلوه

- ما دام تشوفينها حلوه..هاچ هاي النستله
اخذيها حتى تكبرين بسرعة و اتزوجچ و يصير عندي نسوان اثنين

اني بس سمعت هيچ شياطين و التمت فوگ راسي..خجل على غضب اجتمعن مشاعري و بدون ارادة مني تفلت بوجه و ضربته بكاشيه نلعب بيها طاق..و فتت جوه و اني ابچي و احچي عليه

فزيت من ذكرياتي على صوت امي و هي تريد اجيب الها مي..

ورا اسبوع تقريباً..اسبوع مر عادي و ما صار بي شي
بالليل اجوا عمي و زوجته..كلنا استغربنا و تفاجئنا زيارتهم..اني فتت سلمت و طلعت رحت گعدت بالغرفة

چنت اعتقد انو اجوا حتى يتحاچون و يرجع الوضع بينهم و بين اهلي و عمامي..بس تفاجئت من طلع الموضوع انو جاين يخطبوني لأبنهم الچبير

علامات الصدمة مو بس مرسومه على وجهي لا..انما على الكل
شلون صارلهم سنين محد يحچي وي احد و هيچ فجاة يردوني لأبنهم مراد

چنت گاعده بالغرفة من فات عمي و ابويه و امي و زوجته..باوعت ل عمي الي  گال و ابتسامه مرسومة على وجهه

- بنتي زنوبة انتي تعرفين ليش جايين مو ؟

باوعت ل بابا و بلعت ريگي..هزيت راسي ب اي و هو لزم ايدي و گال بحنية اب

- بنتي انتي تريدين مراد ؟ يعني توافقين عليه

فزيت من مكاني و گلت

- شأسوي بي !!

حچيت كلمتي..و استحيت من انتبهت شنو حچيت
رمشت بعيوني و اني اگول

- هاا

اباوعلهم كلهم ساكتين و يباوعلي..ينتظرون كلمتي
چنت ١٣ سنة كلشي ما اعرف..و شنو اسوي بهذا الموقف..شلون اخذ هيچ قرار..و إني اذا اروح للسوگ ماما تشتريلي ملابسي لأن ما اتأكد من قرارتي