| هفوات الحياة | ' باللهجة العراقية '

البارت السابع عشر

#هفوات الحياة
#بقلم : الراوية
#البارت السابع عشر

بسم الله الرحمن الرحيم ❤

صلوا على النبي ❤

#رجعت نشرت البارت لان صار بي خلل ⁦♥️⁩

.

زينب..

ورا ما خلص احتفالنا الصغير
شلت الكيك الي بقى و خليته بالثلاجة و شلت المواعين و اخذتهن للمطبخ
گلت هسا اغسلهن ب خلي انوم الأطفال بالاول

ف رحت اخذتهم ل غرفتهم و بقيت گاعده يمهم الا ما ناموا..تأكدت منهم و طلعت
شفت أسامة بالصالة ديحچي بالتلفون..من رفع راسه باوعلي و ابتسم و رجع يحچي

فتت للمطبخ و گعدت اغسل بالمواعين و اني صافنه و ابتسامة على ملامحي كل ما أتذكر مفاجئة أسامة الي
اگول الحمدلله الي عوضني و جبر خاطري..ما ردت من هاي الدنيا بس اكون مرتاحه و اهلي و ربي راضين عليه و الحمدلله
ربي ما خيب ظني حاشاه رزقني ب رجال ما الگه مثيل اله..يخاف الله و صايم و مصلي

كملت المواعين و نشفت أيديه مع ما أجيت اطلع فات أسامة للمطبخ
و بابتسامة گال

- شفتچ تأخرتي گلت وين راحت

- هياتني كملت محتاج شي ؟

- لا عمري سلامتچ

رحت باتجاه ه و هو لزم ايدي و گال

- اني انطيتچ هديتچ مال عيد ميلادچ
و هسا انتي لازم تنطيني هديتي

عگدت حاجبي و ما فهمت شنو يقصد

- ما فهمت شنو يعني ؟

ابتسم و تقرب عليه و گال

- امشي للغرفة هسا افهمچ

هنا فهمت قصده و هو گام يضحك و حاوط اكتافي و گال

- منا و رايح لازم اعرفچ على الشيفرات مالاتي
حتى ما تنصدمين

دنگت و گمت اضحك و هو رجع قرصني من خدي و گال

- امشي حتى اعلمچ شنو هاي الشيفرات

- يعني لازم اجيب ورقة وقلم حتى اكتبهن ؟

حچيت هيچ و هو گام يضحك..و اني اباوعله و الابتسامة على وجهي
مشاني وياه و هو يگول

- امشي عمري امشي حتى اعرفچ عليهن

گعدت الصبح على صوت سارة تبچي..
مسحت وجهي و اني اريد اطير النوم من عيني..لأن نمت بوقت متأخر كله بسبب أسامة
گمت عليها و سكتتها
و باوعت للساعة

گعدت يم أسامة و گلت

- أسامة.. أسامة اگعد

هزيته من كتفه و فتح عيونه و گال

- گعدت گعدت

حچاها و رجع دفن وجهه بالمخده..و أني ضحكت و گلت