| هفوات الحياة | ' باللهجة العراقية '

البارت الثاني و العشرون

#هفوات الحياة
#بقلم : الراوية
#البارت الثاني و العشرون

بسم الله الرحمن الرحيم ❤

صلوا على النبي ❤

.

زينب..

مدة مرت على نفس الحال
بيوم السبت قررت اروح لأهلي..گعدت الصبح و سبحت الاولاد و بدلت الهم ملابسهم..

و طلعنا أسامة گال اذبچ يم اهلچ و اخذ موسى و اخوانه عند بيت اشرف
بس اني گلتله خلي يجون وياي

- انتي رايحة لأهلچ اخاف يضوجونچ هناك

- لا عمري ما عليهم شي..خلي يتونسون وي حسوني

- مثل ما تريدين

حچاها و شغل السيارة وصلني لبيت اهلي و هو گال اني عندي شغل ما اگدر انزل

- زين تجي على الغدا ؟ حتى ننتظرك

سألته و هو جاوبني

- والله ما ادري.. بس اذا صار مجال اتصل بيچ

- أوكي

- سلميلي على الكل

- الله يسلمك..دير بالك

حچيتها و هو مشى بسيارته
دگيت الباب و شوية فتحت الي ماما
سلمت عليها و هي من شافت الاولاد فرحت دنگت عليهم
و بوستهم

فتنا جوه و انتبهت لحذاء عند باب الصالة
التفتت ل ماما و گلت

- ماما منو هنا ؟

- شهاب..جاي يشوف حسوني

هزيت راسي بـ اي..صراحه من زمان ما شايفته

فتت و فاتوا الاولاد ورايه
هو من شافني نزل حسوني من حظنه و گام على حيله
ابتسم ابتسامة متعوده عليها ..ابتسامته ذاتها الي چان يبتسمها من چنت عدهم
و ذاتها الي يرسمها كل ما يشوفني..

سلمت عليه و هو بسلام حار گال

- شلونچ زينب اخبارچ ؟ من زمان عنچ

- والله مشغولة بهالدنيا..انت شلونكم

- الحمدلله على الله

اجا حسوني عليه و دنگت حظنته بعد ما انطيت مصطفى لأمي
باسني من خدي و گال بفرحة

- العب وي صوفي ؟

- اي عمري العب وياهم.. شفت جبت موسى حتى يلعب وياك

ضحك و اني مسحت على شعره..صار صف اول
شگد فرحت من دخل المدرسة اشترى اله أسامة كل الي يحتاجه من القلم للجنطه
و دائماً اجيبه عندي اقري بي و الحمدلله علاماته كلها زينة

گعدت و گعد شهاب و هو يباوع لموسى و اخوانه..و ابني مصطفى الي بحظني
ابتسم شهاب و گال

- سارة تشبهچ..بس مصطفى لا

باوعت ل سارة و ابتسمت و گلت

- اي دائما يگولون

- ربي يحفظهم الچ