| هفوات الحياة | ' باللهجة العراقية '

البارت الثالث عشر

#هفوات الحياة
#بقلم : الراوية
#البارت الثالث عشر

بسم الله الرحمن الرحيم ❤

صلوا على النبي ❤

.

زينب..

چنت بالمطبخ واگفه و اندگ الباب لبست حجابي و رحت فتحته
لگيته شهاب سلمت عليه و فات جوه للصالة
و ضيفته عصير
گعدنا و اجا حسوني و هو اخذه بحظنه

باوعتله و حسيت صاير شي ف گلت

- شهاب شبيك ؟

تنهد و رفع راسه و باوعلي و گال

- ما بيه شي بس شوية ضايج

كمل كلامه بتردد

- انتي عرفتي انو ابوية طلگ امي

هزيت راسي ب اي ..و هو جر حسرة و گال

- بيتنا صار عبارة عن ساحة معركة
منا شغلة ابوية و امي و منا مشاكل مراد و سناء

اجيت اسأله شنو هاي المشاكل بس سكتت و گلت ما ادخل بس شهاب گال

- سناء وحده السانها طويل و ما تحترم
من مراد يحچي وياها ترادد و ما تسكت..و انتي تعرفينه ما يحب هيچ

بقيت ساكته و اني أفكر بكلامه ل شهاب
صح مراد ما يحب هيچ و ما متعود..من يتعصب اسكت و اخليه شوية و يجي يعتذر اذا رفع صوته عليه

ضحك شهاب و گال

- تصدگين انو هو الي گام يكوي ملابسه ؟
و من يسألها تگول شغل البيت عليه و ما الحگ
و حتى يشكي منها و من اهمالها..والله يا زينب المشط ما يسلم على شعرها الا كل اربعة ايام
و بعدين هي اقتصاديه احسن منچ الصابونه تبقى شهر عدها

ضحكت و هزيت راسي بقلة حيله لأن هاي طبيعة شهاب يحب يقلد..و مسكين الي يوگع بلسانه

بقى شوية عدنا و كالعادة جايب علاگة حلويات
سلم و طلع
و اني رجعت للبيت و شلت گلاصات العصير..واني واگفة اغسل بيهن دگ تلفوني
مسحت ايديه من المي و رحت اخذته.. ابتسمت من لگيت رقم أسامة على الشاشة
فتحت خط و جاوبته  ب ألو

و هو رد

- الو يا احلى الو اسمعه بحياتي

ابتسمت و گلت

- شلونك

- والله صرت زين من سمعت صوتچ

مسحت على گصتي و گلت بصوت ناصي

- أسامة تدري بيه استحي

- و اني اريدچ تستحين..شايفة من تخجلين شلون تصيرين حلوه

عضيت على شفتي و ابتسمت و اني اسمع كلامه
راح يصيرلنا 4 أشهر مخطوبين و لحد هاي اللحظه استحي منه
على اساس نتزوج..بس وفاة عمه خلتنا نأجله احتراماً لأهله
و الا هو يگول أريد نتزوج اليوم قبل باچر..
كلامه و غزله يخلي مشاعري هيچ فجاة تتحرك ..رغم الخجل الا انو احب هالشعور..ما توقعت انو بهاي السرعة راح اعتاد عليه و راح يكون شي كلش مهم بحياتي