| هفوات الحياة | ' باللهجة العراقية '

البارت الرابع عشر

#هفوات الحياة
#بقلم : الراوية
#البارت الرابع عشر

بسم الله الرحمن الرحيم ❤

صلوا على النبي ❤

.

زينب..

من راح أسامة گلت لأمي على كلامه و انو نتزوج بعد اسبوعين
ما عارضت و گالت انتوا كلشي محظرين ف براحتكم المهم سعادتكم

بقيت احظر الاغراض الي احتاجهن جهازي و ملابسي..و ارجع اترك الي بيدي و اباوعلهن و اگول
يعني معقوله راح اتزوج و اترك ابني ؟
صح ما بين بيت اهلي و بيت أسامة مسافة لأن بتفس المنطقة بس بغير شارع..بس ما يمكن ما اگدر
لأن تعودت عليه و هو قطعة مني گلبي...

أسامة يخابرني و يگول شوكت يجي اليوم الي تنورين بي بيتي..و اني اگول ما بقى شي
اقرا الحماس و اللهفه بصوته..و هالشي يزرع الفرحه بگلبي..و اگول يا رب يكتبلنا الخير بكل خطوة نسلكها..
صح مرات افكر و ذكريات زواجي من مراد تتكرر بالي..و اخاف تنعاد الاسطوانه
بي الي يطمني انو أسامة يختلف عن مراد.. اختلاف الارض عن السماء..و اهم شي بيت وحدنا اني و هو و اطفاله
و ان شاء الله ما اقصر وياهم بشي..و كلامي خالي تذكرته من گالي عامليهم بطيب لأن كلشي راح ينزرع بالهم

ثاني يوم اجا أسامة و رحنا عقدنا بالمحكمة و رجعنا
و مرت الأيام و وصل ليوم عرسنا..
ما راح نسوي عرس و هوسه..راح نروح للامام الكاظم و هناك يتم زواجنا..

گعدت الصبح و سبحت و اجت امي گعدت و هي تبچي و حاظنتني
و اني ما تحملت و گمت ابچي..اجا أسامة الصبح
و اني حظنت حسوني و بچيت و هو يناديني باسمي حتى اسكت لأن ما يگولي ماما يگول زينب

بقى بابا يسكت بيه و يگول يوم يومين و ترجعون..

امي حظنتني و گالت

- ديري بالچ على نفسچ

هزيت راسي ب اي و باستني..و شال أسامة الجنطه و خلاها بالسيارة.. و صعدنا و اني اباوع لماما الي ذبت مي ورانا

التفتت ل أسامة الي لزم ايدي و گال

- كافي يا عمري..تريدين ارجعچ

حچاها بشقة و اني هزيت راسي ب لا و مسحت وجهي بيدي..
وصلنا للامام الكاظم "ع" و زرنا و من اجينا نروح لفندق قريب هناك..گال بعدين نروح

رجع شغل السيارة و مشينا..و روا ساعة هيچ طبگنا يم صالون
التفتت عليه و گلت

- شو للصالون

ابتسم و گال و هو لازم ايدي

- غير اريدچ تطلعين احلى عروس

ابتسمت و احس الفرحه وخرت كل حزن بگلبي على فراق اهلي و ابني..

نزلنا من السيارة و هو طلع علاگة و گال

- جبتها على ذوقي ان شاء الله تعجبچ