| هفوات الحياة | ' باللهجة العراقية '

البارت الثامن

#هفوات الحياة
#بقلم : الراوية
#البارت الثامن

بسم الله الرحمن الرحيم ❤

صلوا على النبي ❤

.

زينب...

قبل لا يتقدملي حتى يتدارك الأمر
دخل عمي الصغير و ما حسيت الا هاجم على مراد و سحبه من ياخة قميصه و هو يهز بي و يصيح بكل عصبيه

خفت  بهاي اللحظات و كلش و رجعت خطوات ليورا  و آني اباوع ل عمي الي صاح

- شلون سمحتلك نفسك تمد ايدك عليها هااا

ما انطى مراد مجال حتى يرد و هو يقربه عليه و يحچي بعصبيه اكبر

-  ولك همين حاسب نفسك رجال و تضربها و تستقوي عليها..

اجا مراد بحچي بس عمي رجع يحچي و هو يقاطعه

- شفت و سمعت كلشي ..چنت واگف يم الباب انتظر جكارتي تخلص..ليش ما سكتت اختك
همين نزل و هم يدبچ على السطح

هو بقى ساكت و ما نطق حرف متفاجئ من ردة فعل عمي و عصبيته الي طلعها بي
عمي لزمني من ايدي و فوتني للغرفة و هو ياخذ بخاطري
حمدت الله انو عمو چان موجود و اخذ حقي

الظهر عمي راح..و هو يوصي انو محد يحچي وياي بكلمة..و آني گلت يمكن صدگ راح يسمعون كلامه
مراد ما فات للغرفة و لا شفته..زعلانه و مقهوره كلش منه..كل شوية ارفع ايدي و اتلمس مكان الضربه على خدي..

چنت اگول راح يتركوني بحالي.بس خابت امالي
من ورا ما راح عمي صاحت عمتي
و گالت گومي اشتغلي..نومت حسين و طلعت و الدمعة بعيني..اسمع جمانة تحچي و تذب بسامير بس ما جاوبتها و غلست

اگول اني وين و هي وين بضربه وحده اطيرني
و تگدر تتجاوز عليه و محد يلومها و لا يفك حلگه..لأن مو بس ذنبها انها عرمه و لسان
صوچ مراد الي ما خلى الي لا اعتبار و لا قيمة گدامهم و فوگ ما يدافع عني بعد ما هانني يرجع هو يوگف وياهن

تحسبت و اني اگول رب العالمين ياخذ حقي

عجنت و سويت كبه على گد العشا من ورا خشمي
بس مو علمود مراد و امه و لا ل سواد عيونهم..علمود عني خطية راح يجي جوعان و شهاب و خطية عمي الصغير چان عدنا عيب و فشله منه

ما ادري شلون كملت العشا و خبزت..و هنا و لا گامن و لا ساعدتني..بالعكس عمتي لبست عباتها و راحت لأهلها و بقت السعلوه جمانه

صبيت العشا و طبيت للغرفة كالعادة اتحجج ب حسين..بدلت اله و بقيت گاعده يمه بغرفتي

الباب چان ما مسدود على الاخير..سمعت عمي يصيحلي و يگول جيبي حسين و تعالي

ترددت اگوم بس ما چان بيدي الا اشيل  حسين و اطلع بعدني ما اوصله يم الباب و وصلني صوت جمانه و هي تحچي يمكن حچت بصوت عالي بس حتى تسمعني