| هفوات الحياة | ' باللهجة العراقية '

البارت الأخير

#هفوات الحياة
#بقلم : الراوية
#البارت الأخير

بسم الله الرحمن الرحيم ❤

صلوا على النبي ❤

.

زينب..

چنت گاعده بالغرفة..و يمي حسوني الي صار عمره 17 سنة
اباوعله و اني بداخلي اگول يا رب يجي الي اشوفك بي عريس و احلى اب و اولادك وراك
بس اهم شي هسا يكمل دراسته و يرفع راسي..
الحمدلله شايل بيت اهلي و دائماً يساعد ابوية
و استلم السيارة و يسوق بيها

و سارة بصفي على اليمنى و كيان
صار عندي بنية و سميناها على ام مروة..لأن الأولاد گالوا سميها على اسم امنا
و ما رفضت و گلت تدللون اني شنو عندي غيركم..

چنا نگلب بالصور..و أني احچيلهم هاي شوكت اخذناها و هاي بكذا مناسبه

رفعت راسي لـ حسوني من گال

- ماما

- ها وليدي

تربع و گال و هو يباوعلي

- تدرين ماما..انتي عندچ صورة انتي و بيبي و هشام
بسيارة بابا

- سيارة مراد

هز راسه بـ اي و هو رجع كمل كلامه

- قبل شهرين من رحت وي عمو شهاب لبيت جدو
و هناك اجا بابا يشوفني..بس اني ما الي خلگه يگعد بس يسأل بيه عنكم واحد واحد
فـ استأذنت منهم و اجيت اطلع بس سيارتي صايره ورا سيارته..فـ هو انطاني السويچ گال انت طلعها
و من طبگتها برا صار عندي فضول اشوف شنو بيها..و لگيت الصور بدعاء الجوشن

من حچه هيچ بقيت اباوعله..ما حچيت شي
بس هزيت رأسي بـ اي..
ما انقهرت عليه و لا فكرت ليش لهاي الحظه مخليهن
بس انقهرت على أسامة..اخاف اگول اله لو يوصله خبر
و هنا مخبل بالغيره و يمكن عنده استعداد يكتل مراد اذا عرف انو صورتي عند مراد..
يگول انتي الي وحدي..ما اريد احد يفكر بيچ مجرد تفكير..

سديت الموضوع و ما حچيت بي..و لحد هسا أسامة ما يعرف لو يعرف أني متأكده ما راح يعبر الأمر على خير..

دخل أسامة و گال

- ها شنو دتسوون

- دنباوع للصور..و الله بابا چنت حلو و بعدك حلو

حچاها مصطفى و ضحك أسامة و قرصه من خده و گال اله

- غير اني ما احچي
الكل يشهد..مو عمري ؟

حچاها و هو يباوعلي.. ضحكت و اني اهز رأسي بـ اي
باوع أسامة لـ حسوني و مسح على شعره و گال

- حسوني اليوم تبات عدنا..مو مثل البارحه
تنهزم باليل..و الله بيبي تريدين ابات يمها

ضحك حسوني و گال

- أن شاء الله ابويه..بس ها اني تعرفني ما انام الا بحظن امي..فـ شوف يمكن تتراجع عن قرارك