| هفوات الحياة | ' باللهجة العراقية '

البارت العشرون

#هفوات الحياة
#بقلم : الراوية
#البارت العشرون

بسم الله الرحمن الرحيم ❤

صلوا على النبي ❤

#رجعت نشرت البارت لأن هواي ما ظهر عدهم 🤝

.

زينب..

غمضت عيوني و رجعت فتحتهن و أني الهج بالدعاء و أريد اصيح أريد امنعها أنو تسوي شي لو تأذيهم

گدرت المح تلفوني عدها و هي مخليته على اذنها
سدته بسرعة و اجت باتجاهي..و أني مثل الجثة المحنطه بس اباوع بعيوني حاولت الزم عباتها بس ما گدرت ايديه ما تقبل تتحرك
نزلت دموعي و اني اشوفها اجت باتجهه الحاظنه و طلعت من جوه عبايتها جنطه مالت ملابس
رفعت ايدي و اني اضغط على نفسي لزمتها من عبايتها حاولت اجرها

بس ايدي ارتخت و وگعت بصفي..رفعت عيوني للسما و دعيت ربي بهاي اللحظات يحفظ ابني
لأن عرفت انو راح تاخذه لا محال و بعيونها نظرات الشر
الرؤية غوشت عندي و ما حسيت وراها بأي شي سوى ظلام دامس..

اسمع اصوات متداخله مرة صوت صياح لو صوت اسعافات
فتحت عيوني بثقل و احس هوسه فوگاية و اصوات ناس هواي

حركت راسي على اليمنى و شفت خالي خطية بس لابس سروال و فانيلا
غمضت عيني و رجعت فتحتها و شفت اضواء و كاميرات و شرطه بس ما افتهمت شنو الي ديصير لأن كل تفكيري عند ابني و وين هو هسا

رجعت غمضت عيوني و يمكن طولت يلا رجعت گعدت
اول شي وگعت عيني على أوس الي يتنفس بسرعة و هو لابس دشداشة من فوگ مشگوگه
و يمه اشرف الي ديحچي بتلفون و على گصته دمه

چنت اريد احچي بس ما اگدر لساني كلش ثگيل احسه..
و اصوات الناس متشابكه بعضها..و شكل تأثير العصير قوي كلش لدرجة ما راح لحد هسا

مرت بحدود الـ10 دقايق و أني بصمت مطبق
اسمعهم يحچون بس ما شفت أسامة و أني چنت ادورله بعيوني بالقاعة الي اني بيها عيوني الي گوه مسيطرة و مخليتهن مفتوحات

- ابني

حچيتها بصوت مبحوح و ما عرفت شلون گدر ضابط الشرطة يسمعني و هو يلتفت عليه و يگول

- بابا ابنچ موجود لا تخافين

من حچه هيچ مثل الثلج البارد الي نزل على صدري..غمضت عيوني و اني اردد الحمدلله الحمدلله
اهم شي هو بخير و ما اخذته ما اعرف شلون لزموها بس اهم شي هو موجود

ورا لحظات التموا عليه اهلي و عيالي..و شفت أسامة تقدم باتجاهي
عيونه مغورقة و التعب و القلق مبين على وجهه
اجا يمي على السدية و هو يحظني و يگول بنبرة ترجف

- گالولي زينب ماتت.. عبالك گالوا راح ناخذ روحك

بقى حاظني و اني حظنته و بچيت
هو مسح على شعري و گال