حكاية ريدة 2
مجاهد يوسف
بيت ناس الطاهر ود الفقاد في الفريق القدامي ومطرف تب منو والترعة وما بينو وبينها علا بلدات حاجة السرة والزمن داك زارعها منصور اب درب ود اختها الرضية عنكوليب وتبش ومنصور دا أكان بوليس في البندر ومن ساب الشرطة ورجع الحلة جاها اباطو والنجم وقنب لا شغل لا مشغلة لمن استاجرت فيهو خالتو وادتو البلدات هيلتا لي الله ساكت أكان يباصربها العيشة وتلقى فوقو أجر
منصور سكرجي وبسوق الليل سهر بس السقد ومرات بسكر طينة يجي ساهر في البلدات وعندو صاحبن ليهو برضو معولق متلو بقولولو النجح واكبر فاشل وعر وأصلو ما عندو من اسمو نصيب وهو ومنصور شبهيتو واتلاقيتو مرات ينوموا فوق خلاهم داك لمن الشمش تصقعهم وتطير الفي راسهم ياخدوا ليهم تنفضات ويفوتوا بيوتهم
حامد مرق في الليل داك وناوي شر وقلبو محدثو بشيتن ما ياهو والشيطان يلز فوقو لز علي اللعوج
القمرة اكانت مضوية ومخلية الفجة بييييضا ودا منكرب ويتكاوش والحلة شدة مي صانة التقول خرابة ما فوقها تب زول
الطاهر زاتو الليلة ديك ما نام اكانوا مساهرين معاهو اللمين أب تفة والبلال صرار عينو اتعشوا معاهو وقعدوا يونسوا فوقو لمن الساعة بقت حداشر حتين فاتوا منو وهو مبسوط لمن ماسكاهو ام فريحانة ومرق عنقريبو في نص حوش الديوان وصنقع يعاين القمرة ويتكشم زي نار القصب والنوم غالبو تب
حامد لمن وصل بيت حاج الفقاد بقى في الطريقة البخش بيها لا بقدر يدق الباب ولا بقدر يناغم الطاهر علا يتلب بالحيطة ساي وانشحط جمب حيطة الديوان ونزل ليهو طوبات من السكينة رصاهن طلع فوقن وتاوق وعينو للطاهر في عنقريبو قال يتلب يبعجو بس
في زقاق بين الديوان والحيطة مشى عليهو ولمن بقى داير يطلع في الحيطة سمع ليهو صوت ضحك بصوت عالي من تال البلدات عرفن ديل منصور البوليس والنجح العولاق بشربوا في عولاقن والبلدات مي بعيدة أكان فوقن زول منهم قبل عليهو بشوفو مع ضوية القمرة دي وبنقبض بنقبض أكان تلب وأكان ما شافوهو هسع بشوفوهو ساعة يجي متلب صاد
رجع من الفي راسو ويسب ويسخط ويلعن في العولق ديلك وفات البيت وقال الطاهر الظاهر الليلة مو يومو لكن باعجو باعجو ومشى البيت
رقد فوق عنقريبو وقنب يعضعض في اصبعو ويتنهف
والصباح بدري التهامي جاهو لقى عيونو حممممر قال ليهو ما نمت وللا شنو ؟
_ انوم كيفن والنار فيني منطلقة
_ ها زول ما تعقل وتستهدى بالله وتسيبك من التاية والطاهى وتنعل ابليس
_ اليدو فوق الموية ما زي اليدو في النار والجمرة حراقة البياطاها
_ انسى وعيش ياخ وانا والله إن ماك اخوي وعزيز علي ما يجيك من صباح الرحمن كدي
_ كتر خيرك ياها المجرية فوقك
_ الماني حاريها فوقك جنس نضميك اللمبارح والله
_ الليلة انا فايت الطاهر وامبارح خليتو عشان اعز ليك حليفتك بس
_ تاااني تااااني دايرني احلف عليك
_ لا لا ما تحلف
_ خاف انا حليفتي هيلت امبارح لي امبارح بس
_ لي امبارح وعزيتها ليك
_ كدي هسي خلينا من الحليفة وما ادراك ما الحليفة . دي شنو دي
_ شنو ؟
_ سكين عمي الحليو الجمبك دي
_ دي سكين
_ خابرها سكين
_ يومي معاي وبختها حداي امكن يجينا حرامي
_ هوووي آ حامد دي مي اول مرة اجيك الصباح كدا ولا حصل شفتك تب شايلها وياتو يوم بتشيل سككن
_ انت مخك فات بعيد آ التهامي ظنيتك
_ حامد
_ ماك نصيح اكان فكرت شايلها للطاهر انا الطاهر بدور اناضمو ساكت
_ ما تناضمو والحلة مليانة بنوت والاحلى واللسمح من التاية فوقها أكان بتدور تعرس قوماكا يمين هسي اخطب ليك ست ستها
_ انا ما بدور غير التاية وأكان داير تعز اخوك قوم ورح معاي للطاهر
_ انا وريتك من أمس الكلام اللعوج لا هيلي لا هيلك . رايك شنو في بدرية بت امحدخير والله مكملة السماحة وللا الروضة أخت التاج حيص بيص
_ ما لقيت علا ديل ؟
_ عيبن لي
_ ما بعيب بنات الناس
_ طيب مالك دار تسوي العيب
_ عيب الواحد يخلي ريدتو للعفين المتل الطاهر السجمان دا
_ انت الطاهر ظنيتك ماك عارفو سمح
_ اعرف ليهو شنو دا زول طيرة وخملة ساكت
_ والله لا طيرة لا خملة ورجال واخو اخوان
_ بسسسس امسك لي في اخو اخوان دي واكان كلامك فوقو صاح الليلة دي بتعرف
_أنا مارق علي الحواشات والبنين القلتهن ليك ديل فكر فوقن
_ لا بفكر فوقن ولا بكضب عليك والله امش ساكت علي مشهادك وخليني في الليلتي
_ غايتو انا ماشي لكن أكان جيت ولقيتك مشيت للطاهر بنتفارق فراق الطريفي لي جملو
_ سمح
_ شنو السمح
_ سمح فوت وبتلاقى بعدينك أكان بقينا شداد
التهامي فات وغشى الطاهر في طريقو يباركلو الخطوبة والطاهر لامو وقال ليهو فقدتك والله من أمس والحلة دي كلها جات باركت علا انت وصاحبك
_ صاحبي منو ؟
_ حامد ود الحليو الما عندو صاحبن غيرك
_ بتفقدنا ماك ود الفقاد هههههههه النصيحة أمس اكنت مشغول شغلة خليها ساي وحامد زاتو أكان معاي والمفروض نجيك امبارح علا الشغلة مسكتنا وشفنا الوكت إتأخر عشان كدا جيتك الليلة بدري قبال افوت الحواشة
_ اكان ما فطرت ما بتفوت
_ لا لا بفوت ما تحرر علي الشمش
_ الفطور زاهب
_ فطوري في الخرج أكشحو
_ فطورك شنو ما ياها الكسرة البايتة والبتعجن ليك فوقها طماطمة؟
_ في احلى منو ؟
_ اقعد وشوف براك نحن الليلة ضابحين
_ مرة تانية اعتبرني فطرت ودعتك الله
حامد درع جلابيتو وجاء للطاهر والكراع ما وقفت من بيت ناس الطاهر والناس مارقين وداخلين والديوان ملان
حامد دخل وبارك للطاهر والطاهر قال ليهو لمتك لصاحبك التهامي انت وهو بس الما جيتو باركتوا لي امبارح بس التهامي قال اكنتو مشغولين وقبلت عذرو
_ أيا أيا وانا من أمس داير أجيك أكان ما التهامي
_ يا زول حبابك في اي وكت وان شاء الله عقبالك
حامد سكت مسافة والطاهر قال ليهو اها ما ناوي تعرس نمش نخطب ليك ونعرس سواء في يوم واحد ؟
_ ناوي والله وانا جيتك في شان موضوع عرسي دا زاتو
_ جيتني كيفن انا براك عارف ما عندي أخت ما معرسة
_ ما جيتك لي أختك كدي ورح من هنا وبدور اقول ليك كلام مافي زول يعرفو ولا زول يسمعبو غيري وغيرك
_ ورح وين قول هنا ساكت مافي زول سامعنا
_ لا لا كلامي كتير وبنطول فيهو
_ في شنو آ ود الحليو ؟
_ الفي ما بنقال هني وشي بيني وبينك بس مرقاكا كدي علي الترعة
_ ما بقدر أمرق وشوفت عينك براك الناس داخلين ومارقين ما بنفاتوا لي دحين قول العندك هنا ساي وللا لو بتأجل نخليهو لبعدينك
_ عديلة تب خلاس نخليهو لبعديك بالليل ونتلاقى جمب الترعة الساعة عشرة وما بدور زول يعرف شي
_والله حيرتني ياخ لكن عديلة زي ما قلت نتلاقى بالليل جمب الترعة
_ ما تحتار الموضوع بسيط يللا انا بمشي
_ تمش وين حرم أكان ما فطرت ما بتمش
_ من هسي بديت تحرم كدي أعقد اول
_ أعقد شنو يا زول وهو العقد كم مرة ؟ انا عقدت من أمس
_ والله كضاب
_ أسأل أي زول والحلة كلها عارفة
_ يا زول السمعتو قالوا خطبت بس ما عقدت
_ لا لا عقدت ودقيقة عشان تصدق
الطاهر ناغم للبلال صرار عينو قال ليهو تعال وري ود الحليو دا قال انا خطبت بس ما عقدت وحلفت عليهو حرام يفطر أبى
البلال قال لحامد مالك داير توقع عليهو اول حليفة ويطلق قبال يخش علي مرتو
حامد قعد وخشمو ما فتحو علا المغسة شاقاهو ويتململ ساي والطاهر يتكشم ويتضاحك
بعد ما فكروا حامد بقى مارق والطاهر قال ليهو عزيتني وعزيت حرامي يا ابو الرجال مع انو حرام فشنك ساي لكن مشى فيك وانا ما عقدت خطبت ساي بس ما دايرك تفوت برا فطور وقعد
البلال قال ليهو ياخ ما تجهجه الزول وتكضب ساي حرم عقد آ ود الحليو من أمس وقسيمتو اتكتبت واستلمها والدخلة بعد اسبوعين
وقعدوا يضحكوا
حامد مرق فت ولا قاولهم وبين يصدق منو ويكضب منو لكن عارف البلال متزوج وبأولادو ما بحرم ساي
ونوى بعدينك ينجض حشتو بس عقد وما عقد واحد عندو بس ما يخش علي التاية
يتبع
