حكاية ريدة 5
مجاهد يوسف
صباح الرحمن حامد قام بدري وهو زاتو ما نام سمح ساق الليل تفكير ساي لمن قريب الفجر حتين نعس ونام قام ولمن اختو جاتو قال ليها بدورك الليلة تمشي للتاية صاحبتك
_ اصلي الليلة فايتة ليها لانو البنوت قاعدات يعلمن فوقها
_ يعلمن فوقها شنو ؟
_ يعلمن فوقا الرقيص نان في غيرو ؟
_ المهم انا عندي ورقة دايرك تديها ليها في يدها وتحبسيها لمن تقرأها وتجيبي لي ردها وتجي وتجي براهو
_ الورقة شن فوقا
_ ما بخصك
_ ما بخصني واوديها انا كيفن ؟ شيتن ما بخصني ولا بدخل نفسي فيهو
_ والله اصمتك كف تقولي كفتني جان . شيلي الزفتة وأكان درتي ليك موتة افتحيها واعرفي الفيها عشان اكطعك حتة حتة
_ والله ما توريني شن فوقا ما بشيلا ولا شتين
_ والله تشيليها وتوديها عصبن عنك واوعك تقريها
_ أكان ما وريتني ياني الفاتحاها قبالها
_ يفتح راسك .
_ سمح وريني براك
_ سمح اسمعيني كويس واوعك توري زول . التاية دي انا بريدها ودايرها
_ سجمي التاية عقدوا عليها
_ عارف عارف الله لا عرفك المهم انا داير اسعلها ان بقت دايراني ود الفقاد بطلقها وراء عينو
_ اوب علي اوب علي هاك ورقتك بري بري انا ما بخصني الموضوع دا ولا معاك فوقو
_ انا ما اخوك ؟
_ اخوي على ما بخليك تتلوم وتخرب بيوت الناس
_ ما في خراب وانا أكان ما سويتي القلتو ليك دا ياني العامل الخراب وأقوم في الحلة دي حرابة وأطلق ليكم فوقها نيران كلو كلو ما تنطفي
_ الكلام دا أكان ابوي سمع ليهو بكتلني وبكتلك
_ عشان كدا براحة براحة ودي ليها الوريقة دي وجيبي لي ردها وتعالي
_ أن قالت ما دايراك ؟
_ أكان دايراني ورايداني زي ما انا بريدها ما بتقول
_ ما كانت قدامك وما باقي ليها علا تشحدك وما اشتغلت بيها مالها هسي حلت ليك
_ النضمي بعد كدي ما في ليو داعي وما فيهو زاتو طعم والبقى بقى والكلام في الباقي والببقى باكر
_ النصيحة هي اكانت بتريدك وأبت ود الفقاد علا امها دقتها وأبت تخليها لمن رضتبو بالغصب
_ بصح ؟
_ بصح والله وكمان لمن انا مشيت ابارك ليها قلدتني وبكت وسعلتني منك
_ لا لا أكان كدي جاي ورقتي ساي والرد خبرتو تب
_ أها بتدور تعمل شنو ؟
_ ما بخصك يللا طيري من قدامي كدي كدي
_ بكلم ابوي
_ بعرف براهو وأكان كلمتيهو وللا ما كلمتيهو بعرف
حامد طوالي مرق بدور يعمل زي عبد الصمد ود امهاني بت الفكي الفي الحلة الورانية وكفكف يدينو تب وانكرب وصل لعند الفريق داك قاصد الطاهر ود الفقاد داير يرميها ليهو قدام الناس واللتغتس حجرو يلاقيهو التهامي صاحبو ومن انكرابتو وكفكيفو عرف الليلتو ناغم ليهو وود الحليو ما اشتغل بيهو قام التهامي جرى عليهو جري بدور يلحقو قبل يصل بيت ناس الفقاد وود الحليو لمن شاف جري التهامي جرى منو لغادك لمن توشك دخل ديوان حاج الفقاد والتهامي دخل في قفاهو
الديوان فوقو كم راجل من الحلة ومنصور البوليس والنجح السكرجية قاعدين اللتنين والطاهر وابوهو حاج الفقاد ومن الضمن معاهم خير السيد ابو التاية وديل غير اللمين أب تفة وصرار عينو البلال وكلهم لمن ديل دخلوا يناهدوا من الجري فت قاموا ويقولوا في شنو في شنو
التهامي جرا نفس طويل وغمت خشم ود الحليو سداهو بيدو قبال يقول شي وجراهو مارقبو وقال لناس الديوان لا لا ما في شي . لكن حامد ما طاوعو ونتل يدو منو ودفرو وقال ليهم في في وانا عندي كلام
قالولو قول والتهامي يمنع فيهو ويقول ليهو لا لا يا حامد
قام الطاهر مسك التهامي وقال لحامد قول نحن سامعنك كلنا وابقى داخل علي الديوان واخد نفسك تب وبعدينك وقال التهامي حرم ما تمنعو خلينا النشوفو شن داير
حامد بعين قوية وبكل برود دخل وشال ليهو كباية مشى بيها علي الصبارة شرب وأبى يقنب قال ليهم انا واعدت الزول دا أمس ومد يدو علي الطاهر ومفروض كلامي الداير اقولو ليكم دا اقولو ليهو براو لكن لمن فكرت قلت احسن حاجة اكلمو قدامكم والواضح مو فاضح وفي كمان شيتن تاني كنت ما متعكد منو ولمن اتعكدت جيتكم
حاج الفقاد قال ليهو قول ساكت آ ولدي وامرك مقضي في شنو ؟
_ كلامي فوق خطوبة الطاهر دا للتاية بت عمي دا حاج خير السيد القدامكم دا . التاية دي من زمانك انا بريدها وبتريدني وداير الزول دا ينط منها ويفركش خطوبتو
الناس ورجغوا وأي واحد قعد يعاين للتاني والطاهر جرى بهناك جاب درقتو وجاء علي ود الحليو لكن حاج الفقاد ابوهو وقف بيناتم ونهر ولدو وقال ليهو الزول جوة بيتك دار تضاربو واتلفت علي ود الحليو قال ليهو قنب قنب يا ولدي
حامد قعد وحاج الفقاد براحة قال ليهو الطاهر دا اخوك وما خطب عقد عديل والتاية هسي مرتو برتضى يجي زول لاخوك يقول ليهو طلق لي مرتك عشان ياخدها هو
حامد ما عندو حجة وقال ليهو لو اخوي وعاديني اخوهو ما بعرس مرتي
حاج خير السيد ابو التاية خشمو ما فتحو وقام براحة مرق فات ولا في زول قدر يقول ليهو كلمة
البلال واب تفة في صف الطاهر واللتنين محنبكين ومنصور والنجح يتكشموا ساي
الطاهر حلف لحامد قال ليهو قالك مني ابوي آ خملة
حامد قال ليهو قلت كدي ؟ دحين اسمع قولي ومن الليلة بديك فد اسبوع ما بزيدو يوم تطلق فوقو التاية
_ وان ما طلقتها ؟
_ تاني ما تلوموني وارجى الراجيك
حاج الفقاد سكت مسافة وقال لحامد ما داير اقول ليك قوم امش واطردك من بيتي لأنك ولدي زي الطاهر وواحد لكن كلامك دا اعوج آ ود اخوي دحين انعل ابليس وخليهو
حامد قام مارق وقال للطاهر قدامك اسبوع بس ومرق فات والتهامي مرق وراهو
يتبع
