حكاية ريدة 12
مجاهد يوسف
خلف الله ملزم تب إلا يصل اهل حامد ويعرف قصتو شنو وقال لاختو الداير يعرسها ليهو الطيب دا زول طيبان خلاس وزي اسمو وواحد ومسكين الغنماية تاكل عشاو وباين عليهو ود ناس وراجل كلس وخدوم وغير كدي أخو اخوان لكن قفلتو لباب اهلو دي وقنعتو منهم لمن طريان ساي ما داير يطراهم قطع شك مي ساي ومن يومي السعلتو منهم وقال لي ما تقلب علي المواجع انا يومي بفكر في اهلو عشان كدي انا مارق اعتر اهلو ديل واعرف قصتو شنو وامكن أغيب لي كم يوم بقول ليهو عندي غرضا كدي في الخرطوم ضروري ماشي اجيبو وأكان اتأخرت وشفق وسألك مني قولي ليهو أي كضبة ما تخليهو يشك في اني مرقت في قفاهو عشان اعرف اهلو واعرف قصتو
اختو قالت ليهو أكان داير كلامي خليهو لمن يوريك براهو عشان ما يزعل من مشيتك دي وتبقى ليكم بفراق
_ النصيحة عشان ما اكضب عليك ساي انا الطيب دا ناوي اناسبو أكان انتي موافقة وما كنت داير اقول ليك ولا اقول ليهو الكلام الكلام دا علا بعد أعرف اصلو وفصلو وهو لحدي يوم الليلة ما فوقو كلمة لكن باقي لي زي الداسيلو سر مني وانا ضروري اعرفو
_ سر شنو ؟
_ الزول دا علا اكان مندسي من شيتن وراهو وللا عامل ليهو عملة خلتو يشرد يجينا هنا لانو ما بدور ليهو زول يعرف عن ماضيهو اي شي ولا بدور زول يعرفو قاعد معانا هنا
_ الخلاك تقول كدي شنو ؟
_ فراسة مني ساكت لانو يوم لاقيتو وعرفتو في كوستي أكان كاشي من الناس وحمد الله بحلتنا الغايسة دي وقعد فيها والليلة ليهو اكتر من حول ما مرق منها شبر بس ساساقو البحر والبيتوالبيت والبحر حتى الدويم القريبة دي أبى يفوت ليها معاي وزول زي دا لازم وراهو سر وانا لازم اعرفوا . الدايرو منك أكان سعلك مني قولي ليو أي كضبة وللا اقول ليك قولي عندو عملية فات يعملها وما داير زول من الحلة يبراهو ولا داير يتلتل زول
_ تبرا يا يابا من العملية أها أكان قال لي عملية شنو؟
_ قولي ليو بواسير بسكت
خلف شال الصورة هيلت حامد ودساها في جزلانو ونزل علي البحر لقاهو في نصو داير الشبكة تب قام ناغم ليهو عوووك هوي يا الطيب أمرق جاي امرق جاي دايرك أنا حامد ما اشتغل ليهو ورمى الشبكة هو والجماعة المعاهو فيهم واحد قال ليهو ابو خليف يناغم ليك قال ليهو سامعو وشايفو واللصبر لمن نمرق كلنا
خلف لمن شافو أبى يجي فات البيت وجاهم بعد جروا شبكتم تب ولموا السمك هيلن ومرقوا ليهو قام ساق حامد وقال ليهو انا باكر أكان الله حيانا شايل الخرطوم
_ شن عندك فوقا ؟
_ عندي غريض صغير كدي ماشيلو وكنت دايرك تمش معاي
_ امش براك انا ما ماشي معاك غير كدي انت عارف لازم يقنب فينا واحد والبحر ما بنفات لينا اللتنين
_ انا زاتي قلت كدا خلاس انا بمش وامكن اغيب لي هناك يومين تلاتة وبعود صاد وبشتري لي شبكة جديدة
_ شبكتنا دي جديدة
_ جديدة لكن بجيبها للزمن ساي عشان أكان درنا نغير دي ما نمش ليها تاني ودام انا ماشي ماشي انجيبا معاي أخير من ارجع فاضي ساكت
حامد اتذكر المهدي ود خالتو بت ود الكاشف وفكر يكتبلو جواب ويوصف لخلف الله فجتو لكن تاني غير رايو لانو ما داير خلف الله يعرف اهلو
اليوم التاني خلف الله لبس جلابيتو حقت العيد الفات وشنق طاقيتو وقال لحامد ودعتك الله آ الطيب اخوي وماك داير وصية علي العقب والبيوت وابقى عشرة
ومرق وصل لغند الخرطوم وقعد يسعل في السواقين والكماسرة عن حلة الشيخ الهوين لمن لقالو واحد بعرفها وقال ليهو هن حلتين صغار ومين بعيدات من بعض حلة ورانية وحلة فوقانية ووصف ليهو العربات البوصلنو تب وخلف الله ما قعد مرق عليهن طوالي في حزتو وصل هناك العصير ونزل في طرف الحلة الفوقانية يقبل وين وكيف ما عارف واول زول لاقاهو النجح المعولق وأكان الزمان داك شايل ليهو قزازة عرقي ماشي بيها علي منصور البوليس وخلف الله وقفو وسلم عليهو وقال ليهو انا عابر سبيل وجاي كايس لي شغل لو خابر لك زول عندو حواشة يشغل معاهو
النجح عاين ليهو كدي وقال وصلت تب وجيت في وكتك وساقو لمنصور البوليس قال ليهو لقيت ليك زول بنفعك
منصور مو زول زراعة ولا زول شغل وكسلان خلاس بشتن حواشة حاج الفقاد ساكت والنجح أخير منصور واللتنين شبهيتو واتلاقيتو ما فالحين علا في جعيم العرقي والترقد ومنصور شاف خلف الله لقاهو قوي وظاهر عليهو نجيض وزول شغل ساي من وشو وفرح ليهو تب لكن ما ظهرها وصرصر لخلف الله وشو وقعد يساعل فوقو ما خلى شي التقول تحقيق في الآخر قال ليهو بشغلك معاي بس نحن تيربنا وزرعنا وبعد الدرت ما بقصر معاك لكن ماني محدد ليك شي ، خلف قال رضيان وهو داير ليهو كم يوم يعرف فيهن اهل الطيب أو حامد ويفوت لكن دايرلو حجة يقنب بيها الكم يوم ديل
اخد ليلتو ديك وقام فجر تور منصور وقال ليهو قوم ورح علي مشهادنا ومنصور القومة تب غالباهو وصحى وعيونو حمر قال لخلف الله انت منو ؟ وبعد مسافة حتين ركز واتذكرو واتذكر انو داير يشغلو معاهو حدر ليهو وقعد يتأمر سيد ولقالو عب . وصف ليهو الحواشة وقال ليهو امش بكرعيك ساكت وانا بجي لاحقك بعدين واعمل كيت وكيت وكيت
خلف عرف الزول دا معولق لكن ما في عوجة بصبر الكم يوم ديل
ولمن وصل الحواش وشافها وشاف بشتنتها إتأكد تب انو وقع ليهو في زول رمة ساكت وقعد يتعرف علي جيرانو في الحواشة لمن قابل البلال صرار عينو وداك محروق شديد من منصور وورى خلف الله انو الحواشة دي مي هيلتو وهيلت عمو ومنصور دا حدو الموسم دا بس في الحواشة دي وهو صابر عليهو وساكت احترامن لكلمة عمو حاج الفقاد لكن تاني شوقو ليها
بس البلال ما ورى خلف الله القصة
المشكلة بقت كيف يسعل عن حامد
اشتغل تلاتة يوم نضف فيهن الحواشة نضافة جد وعرف منصور والنجح اللتنين مون نافعين وطوالي بتونس مع البلال بس ما سعلو وقرر يسعل النجح لانو طرورة ساكت والزي دا أي شي في الحلة دي بكون عارفو وبتفاصيلو
واتحين الفرصة لمن انفرد بيهو براو ومرق الصورة هيلت حامد من جزلانو وقال للنجح أمس وانا جاي من الحواشة وجمب الشديرات القريبة من الترعة لقيت لي صورة واقعة الظاهر حقت واحد من حلتكم دي النجح قال ليهو كدي انشوفها وداك أداها ليهو ودا نطط عيونو كبار وقال ليهو دي لقيتها وين ؟
_ ما وريتك هسي وقلت جمب شديرات الترعة ؟
_ لااااا دا حامد ود الحليو الكتل الطاهر ود الفقاد وشرد
خلف الله نطط عيونو كباااار
يتبع
