حكاية ريدة 8
مجاهد يوسف
حامد ود الحليو المتهم الوحيد في كتلة الطاهر ود حاج الفقاد وكل الناس قالوا هو بس الكتلو ومافي تب غيرو والبوليس ما خلالو زول في الحلة ما حقق معاهو وكلهم ماسكين في حامد الوحيد الليهو مصلحة في الجريمة دي لانو هددوا قدام الناس وحتى الحليو ابوهو قال مافي غير حامد ولدي مع اني عندي احساس انو ما بعملها حامد ولدي وانا عارفو كويس لكن طفشتو دي ثبتت عليهو التهمة ولو ما عملها ما كان طفش
ما في ولا حلة البوليس ما كاسها وخاصة الحلة الورانية قلبوها قلب لانو في ناس قالوا شافوهو فايت عليها لمن ابوهو طردو وما أتلقى ليهم كلو كلو
حامد طفش بعيد
في نفس اليوم اللنضبح فيهو الطاهر حامد مشى فعلا الحلة الورانية وقابل احمد ود الفكي وسألو من عبد الصمد ود امهاني اختو وود الفكي وراهو بيتم وحامد مشى ليهو وما كان بعرفو ولا داك بعرف حامد ولمن لاقاهو وراهو انو سمع بمشكلتو مع ود البكري وامهالو ليهو اسبوع والفكرة دي عجبتو ومشى عملها في حلتهم لانو واقع في نفس مشكلتو وسألو أكان ود البكري ما سمع كلامو وما فرتق الخطوبة داير يعمل ليهو شنو
عبد الصمد قال ليهو بضبحو شخخخخ من اللضان للضان وحامد مرق من عبد الصمد ورجع الحلة مع المغارب وما فات بيتهم عشان ابوهو طردو ومشى بيت ناس التهامي صاحبو والتهامي اليوم داك زعلان منو لمن داير يطرشق وما دار جيتو ليهو دي ولا اداهو ريق حلو
حامد مرق من التهامي والمرقة الياها
احمد ود الفكي لمن سمع بكتلة ود الفقاد قال لعبد الصمد الجنى الجانا هنا دا البقولولو ود الحليو متهمنو في الجريمة الحصلت دي دحين أكان جاء البوليس وسألك منو قول لا شفتو لا رأيتو ولا بعرفو لا من قريب ولا من بعيد عشان ما يجرجرونا ساكت في الفاضي في زول ما عندنا معاهو شغلة
وفعلا الاتنين نكروهو حطب
التهامي قال جاني بعد المغرب وابيت ادخلو بيتنا مع انو صاحبي شديد لكن مزعلني كان كلامو وحامد أكان علي انا جدادة ما بضبحها خليهو يضبح زول
في ضابط شاطر مسكوهو التحقيق جاء الحلة وقعد مع حاج الفقاد وحاج الحليو الاتنين وقال ليهم داير لي صور لحامد والطاهر
ولمن شاف صورهم قال للفقاد ما سمعت ليك أي صوت ولا أي كركبة يوم الجريمة ؟
قال ليهو حامد بنوم في الديوان براهو ومرات بساهروا معاهو اصحابو وانا بنوم بدري ما سمعت أي شي
الضابط قال حسب الصور حامد هوين وضعيفوني والطاهر أمنع منو وأعتى منو ما بنضبح ليهو بالساهل إلا لو معاهو كم نفر لانو الطاهر دا كتلتو بالصورة دي ما مقنعة يا قبقبوهو وكتمو نفسو لمن مات حتين ضبحوهو يا ضربوهو في راسو فقدوهو الوعي وضبحوهو والجريمة دي اكان لازم جثمان المجني عليهو يتشرح عشان نعرف سبب الوفاة اول وانا ما اعتقد مات مضبوح
حاج الحليو كلام الضابط دا ريحو شوية لكن تب ما ريح حاج الفقاد وسرح في الناس الكتلو ولدو ديل كتلوهو لشنو وعشان شنو ان بقوا فعلا كم واحد وهم زاتم منو ؟ الطاهر ولدو ما عندو مشاكل مع زول ومن البيت ما بمرق علا علي الحواشات
علا حامد فات وين ؟
الضابط فات ورسل عربية تجيب اصحاب الطاهر چت وأي زول بجيهم في البيت أكان ما صاحب الطاهر يجيبوهو
البلال صرار عينو من يوم الجريمة ما ياهو البلال صرار عينو واللمين اب تفة زاتو اتغير وبقى ما بجي الديوان هيل الفقاد وكل مرة يجي يتذكر الطاهر صاحبو والبكاء يشرطو
اكتر زول ملازم حاج الفقاد وما فاتو تب منصور البوليس ومرات مرات بجي معاهو النجح صاحبو
ومنصور بلدات بت المنا أكان زارعها عيش ومن يوم الجريمة لا فات عليها ولا نضفها ولا اشتغل بيها لمن اتملت بودة
التهامي مرق كايس حامد ود الحليو قال لازم يلقاهو ويجيبو
المهدي ود بت الكاشف رجع خرطومو وقاعد في دلالتو وفي سمسرتو وما عندو شغلة بالحلة ولا بناس الحلة
عبد الصمد نكرانو ونكران خالو لجية حامد ليهم واجعاهو بالحيل وفات للضابط وراهو بيها وقال البحصل يحصل
الضابط جاب ود الفكي برضو وقال ليهو ما كان تنكر ولو ما خايفلك من شي وخابر شي ما كان نكرت وكضبت علي البوليس وعصروهو في التحقيق لمن قال بس حتين فكوهو والضابط عمل ليهو الكان خايف منها زاتها كل مرة يناديهو ويرجعو لكن ما لقى عليهو شي يحبسو في شانو وندموهو علي كضبتو ونكرانو .
يتبع...
