حكاية ريدة 3
مجاهد يوسف
يا ربا بس يجيب الليل لحامد ود الحليو من جاء من الطاهر وماسكاهو ام هلة هلة بس العقرب السمها فاير وحارقها بالحيل ديك ، واصلو ما هجس يمرق يقنب فوق النيمة الفي خشم باب بيتهم حبة ويجي داخل ويشيل ويجغم في الموية شرب نص التيبار ، امو فكرتلو قالت ليهو مالك آ جنى تمرق وتخش كدي زي الزول الرايحة ليهو رايحة ؟ قال ليها ما في شي بس في موضوع كدا معكرني
_ موضوع شنو آ عشاي
_ أمس ود الفقاد بصح عقد علي التاية بت خير السيد
_ عقدولن آي . ودا المعكرك ؟
_ لا لا يعكرني سببو علي شنو ؟
_ نان مالك ؟
_ لا لا مافي شي ما في شي
_ التاية دي ابيتها ساي والله بختو ود الفقاد لقالو مرة هدية ورضية وسماحتها بدعة
ود الحليو مرق من امو وكلامها بس السككن والخناجر قطع قلبو قطع مشى قعد برة تحت النيمة ويشيل ويعاين للشمش في الضللة ، نهار طويل خلاس ابى كلو كلو يكمل
المهدي ود بت الكاشف جاء من الخرطوم سايقلو عربية هكرة ودخل بيها الحلة يتقدل وترترت ساااي ودخانها معكلب وراها التقول سايقلو تكل ولمن شاف ود الحليو في النيمة جاء عليهو وبعد سلم عليهو قال ليهو ورح معاي دايرك في شغلة والمهدي دا ود خالة حامد دا لزم شغال سمسار عربات في الدلالة وكضاب خلاس وجنو تخلف والحليفة شدة مي عندو ساهلة وكتيرة زي رميش عيونو
حامد مكجنو وما بدورو خير شر وطوالي متكاتلين
أها حامد من فرجيختو ما قام ولا قال ليهو بتقول في شنو
المهدي مسكو من يدو وقال ليهو حرم أكان تقوم معاي قبال اصل بيتنا العربية دي بايعها لزول في الحلة الورانية ورح نوديها ليهو ونجي وبمسح ليك شنبك
حامد نتل يدو وقال ليهو خليني انا عكران هسي وقافلة معاي ما فاضي ليك امش براك
_ علي الطلاق ما بمش براي وحرم ماني مخليك ورح وفي الدرب وريني المعكرك شنو
حامد فكر شوية ودي فرصة زاتو يضيع بيها الوكت ولمن يمشوا ويجوا النهار بكون راح والشمش بتكون غابت وتترب ركب معاهو وقال ليهو بس نجي طوالي في حزتنا ما تمش تقنب وتعديها لي هناك نضمي وحليف وقعاد انا مواعد لي زول في امرن هام
المهدي ضحك وقال ليهو امرن وهام كمان وفي حلتنا العفينة دي ؟ ما اظن
_ هسي دي عربية شنو دي الكلكة دي وجيت بيها كيف من الخرتوم
_ اسكت ساي والله دي مرقة من الفجر وساعة اتحركت بيها من هناك العين ولا بتشوف والعربية دي ما تشوفها كدي وتستهونها ساي والله مشاية مشي وقوية خلاس وأكان لقت ليها كربريتر جديد مي ساعلة في بكسي الضهبان
_ والله انا خايفها تحرن بينا في الدرب والحلة الورانية ما تصلها
_ بتوصلنا بتوصلنا تب خلها وكدي وريني المعكرك شنو يا العشاء اب لبن
_ انت قايل جيتي معاك دي ريدتن في مباراتك ؟
_ جابتك مسحة الشنب عارفك
_ لا يمين ومن هسي ما بدور منك لا قرش لا تعريفة جابني معاك الزهج ساي وانا مكجنك من يوم عرفتك وما بريدك
_ برضو ما وريتني المعكرك شنو ومزهجك
_ داير اسعلك
_ أها
_ أكان خطبتلك بت والبت واهلها رضيانين بيك وجاك زول لا ببقى ليها ولا من اهلها ولا صاحبك وقال ليك البت دي انا بريدها وهي بتريدني أمرق منها وسيبها لي بتقول ليهو شنو ؟
_ أكان ما كتلتو ابقى ماني ود بت الكاشف
_ اكان جاك براك وبراحة براحة كلمك راس بينك وبينو واترجاك
_ حرم أكان بقى منو داك كاتلو كاتلو
هسي دا سؤال شنو دا
_ سمح ان بقت البت رايداهو
_ أكان بتريدو ما كانت رضت بي ولا كانت الخطوبة تمت
_ سمح تاني سؤال أكان انت في محل الزول دا وخطب زولتك البتريدها بتعمل شنو
_ بقول القسمة قالت وعديلة ومبروكة عليهو لو هي رضتبو والبنوت ما يدنك الدرب اكتر من العربات
_ انت معولق وعر وطرورة وحمبرة ساكت آ ود خالتي
_ شوف آ حامد النكلمك كلام سمح انا الشغلانية حقت السمسرة دي علمتني تكون مصلحجي بس وحباب النافع وشهرن ما عندك فوقو نفقة ولا تعد ايامو وما في مرة بزعلوا عشانها وما في ريدة زاتو بتخلي الزول يخت نفسو في فجة تحرجوا والناس يمسكوا سيرتو ويلوكوهو لبانة في خشومن وشيتن ما مقسوملك ما بتاخدو والشيخ الوحيد البستحق انك تجاسفو وتسكو وتجر وراهو لمن نفسك ينكطع هو القرش بس . عندك قروش حرم الناس ديل كلهم يحترموك ويشيلوك فوق راسهم لا لا ما عندك وعقين ساكت ولا بعدوك زول
_ انت في وادي وانا في وادي
_ بتمش وبتلقى كلامي صاح ، هسي اسعلتك دي سببها شنو احكي احكي انا اخوك ود خالتك مهما كجنتني واتكاتلنا ياني اخوك
_ لا لا مافي شي بسعل ساكت
_ علي كيفك وانا بعصر عليك لكن مافي شي بستاهل يزعلوا عليهو وبيع الباعك
الطاهر بهناك قعد مع اللمين أب تفة والبلال صرار عينو ووراهم كلام ود الحليو كلو وهم زاتم احتاروا في الموضوع الداير يقولوا الطاهر بس وما دايرلو زول يعرفو دا شنو لانو الطاهر لا صاحبو ولا حصل باراهو ولا بيناتم شي كدا سر والحير الطاهر اكتر شي وحير اصحابو انو بخصوص العرس ولي في الوكت دا بعد الطاهر عقد وليه الطاهر بالذات
غايتو حيرتهم والأسئلة الفي راسهم ما بتنحل ليهم علا بعد يعرفوا الفي راس ود الحليو شنو
التهامي بس العارف
والتهامي بعد رجع من الحواشات جاء لود الحليو ما لقاهو وريحتو في الارياح مافي ولا في زول قال شافو ركب مع ود بت الكاشف
يتبع
