حكاية ريدة 21
مجاهد يوسف
بعد البواليس ما قبضوا حامد طوالي اتحركوا بيهو وجابوهو ووصلوا المركز المغيرب . الضابط كان لسة قاعد ومن شافو ساي قال ليهم ودوهو السجن ولا كلمة ما قالها ليهو لمن حامد زاتو استغرب
في ضابط تاني قال ليهو دا موش الزول الانت ماسك قضيتو حقت الضبح وكايسلو ليك اكتر من سنة ؟
قال ليهو ياهو زاتو
_ طيب مالك ما حققت معاهو ولا سألتو ولا نضمت معاهو ؟
_ بمش وين يعني وهسي انا زاتي ما فاضي ليهو
_ لكن من خلقتو ساي الزول دا ما شكلو شكل مجرم
_ هو المجرم عندو شكل محدد ؟ ما ياما مروا علينا هنا مجرمين اشكال وألوان
_ صاح بس الزول لمن يكون كاتل ويهرب وينقبض بتشوفو زي الما نصيح . غايتو ما عارف كيف لكن الجنى دا انا عاينت فوقو قوي وما اظن قاتل
_ كلو بنعرف نحقق معاهو بس انا ما داير ناس الحلة يعرفوا اننا قبضناهو
خلف الله وحاج الصديق أجروا ليهم عربية وجوا بيها وراء حامد وناويين ينزلوا ليهو اكبر محامي ودخلوا لعند الضابط وروهو بالمحامي
الضابط قال ليهم ارجعوا حلتكم واوعى تمشوا الحلة الورانية لاني ما داير زول يعرفنا مسكنا حامد والمحامي ملحوق
خلف الله في الاول اكان ناوي يمشي بيت ناس حامد ويقعد فوقو كم يوم لكن بعد كلام الضابط ليهو دا رجع الحلة طوالي هو وحاج الصديق وفي نفس العربية الجابتم
الليل دخل تب والوكت داك الدنيا عقاب شهر والفجة ضلمة لاقمرة ولا الحلة الورانية فيها كهرباء والناس كلهم متكاملين البيوت والجو سمح الهمبريب يهبهب في الملايات وشجر النيم يتراقص البهايم في الزرايب والغنيمات اصقعن في جرتن والجداد متعنقل فوق الرواكيب والحيط وريحة لمبات الجاز وجاز اللمبات تلخم والحلة صنت وسكتت تممممم وزول ساكت بتحاوم برة من بيتو مافي . رادي حاج بانقا سيد الدكان اللكان بلعلع يوماتي وبطول حسو عشان اضانو تقيلة الليلة قفلو ومافي علا صوت كلاب ينبحن مرة مرة وللا صرخي شافع يتباكى جمب امو وبرضو مرة مرة
سكوت وسكون رهيب تقول الحلة دي زي الراجية وخايفة وموعودة ليها بشيتن يخليها كلها تجوط
البلال حارس اللمين اب تفة وشبر ما فاتو ومستني بس متين الليل دا يتناصص عشان يسوقو ويقوم علي الفي راسو
اللمين قال للبلال الحلة دي مالها صنت كدا
_ احسن زاتو والناس ناموا
_ ينوموا من هسي ؟
_ انت آ عولاق ماك عارف الدرت دخل وكطع العيش بدور البدار ؟
_ ونحن ما عندنا عيش بدورلو كطع ؟
_ نحن عندنا كطع راس وضبح شخخخخخ
التهامي بعد اتعشى مرق عنقريبو ورقد نام وزعلان من المهدي ود بت الكاشف زعل لمن داير يطرشق وحلف بجملة الايمان إلا ما يلاقيهو اصلو ما يخليهو بيها دي عشان كضيبو عليهو وتحلفو الفي الفاضي
والليل اتناصص
واللمين اكان بتشهق ساي قدام التهامي وقدر ما فكر ليهو في عذيرا كدا يقولو ليهو عشان يتمولص منو البلال ما اداهو طريقة وباقي ليهو في تالاهو . قام اللمين عمل فوقها نايم وقعد يشخر ليهو بشيخرات خشم ساكت مين هيلات زولا نايم والبلال يعاين ليهو ويتكشم ولمن ضمن الحلة چت هجست والخلايق في النوم اندفست اداهو لكيدات بعكيكز في يدو وقال ليهو قوم آ معولق قوم تقوم بكفنك وتسابق الدفنك
_ اللمين قام يسنتت وقال ليهو ورح لكن إن بقيت ملزم تب وكاتلنو كاتلنو انديك الراي السمح
_ قول
_ ما نمشيلو شاقين الحلة راسنا عديل ونختر كدي علي الميجر ونجيهو من تال الحواشات عشان ان جابو عبد الحليم القصاص ما يجيب الناس علينا جاي
_ انت من زمن عبد الحليم قصاص الدروب يا حليلو بقى بشوف كشح
_ بشوف كشح شنو والله درب النملة يقصو اسعلني منو انا الجبتو يقص درب الزول الكتل الطاهر
_ جبتو يقص انت ؟
_ آي جبتو انا وانتو الزمن داك تبكوا كلكم ما جايبين خبر بس درب الزول الكتلو مو دربك آ التهامي ولمن قصاهو دخل بينا جوة بيت الحليو والكتل الطاهر حامد مو انت يا البلال وانا بحلف انت ما كتلتو ومافي زول كتلو غير حامد ود الحليو واسمعها مني أنا ومصيرو ينقبض والايام توريك كلامي دا صاح وللا لا
_ مافي زول كتل الطاهر غيري انا وهسي الكلام دا سيبو ما وكتو ورح نريح الخازوق دا من الدنيا دي ونسلم روحو لباريها خلاس كفاهو عاش كتير وعيشتو عداها كلها زراعة وقنع من الزراعة وعداها كواسة فوق درب ود الحليو وانا مافي شيتن موجعني ومخليني داير اكتلو علا كواستو لود الحليو دي . قلت لي نمشي كدي علي الميجر ؟
_ قوم ورح والله ادخلك بيتو بدرب يحير الما بتحير والتهامي دا مانع ومتل الدحش نغمتو فرد غمتة واحدة ونركبو تبعج بالسككن وفرفير ما نخليهو يفرر لامن يموت لانو لو ما عملنا كدي انا وانت ان قام علينا اللتنين بضايرنا وبشهينا العافية
_ لا لا لومك علي اكان فرفر لاني ناوي اعمتو بالمخدة واركب سكيني دي حلقو واطبو من يديهو الاتنين وانت عليك بكرعيهو ما تخليهو يرافس وسكينك بشيلها انا معي وبعد ما اركب سكيني دي في رقبتو
ما بمرقها وبطعنو بسكينك في نص قلبو
_ يعني انا ما اطعنو ؟
_ انت بس عليك تطب لي الكرعين هيلاتو والباقي خليهو علي تب
يتبع ..
