حكاية ريدة 23
مجاهد يوسف
الصبح قرب يأذن لا البلال ظهر ولا اللمين اب تفة ومنصور والتهامي لابدين جوة اوضة الديوان وقانصين ليهم ومستننهم بس متين يجوهم متلبين
_ انت آ منصور ناسك ديل موش اتأخروا ؟
اتأخروا والله لكن احسن زاتو والله لا جابهم
_ مالك خايف وللا شنو ؟
_ ما حكاية خايف بس عدم مجيهم مو خير ؟
_ خير لكن هم شر وحباب الشر تب
_ عشان كدا قلت ليك عدم مجيهم خير . وانت في ديل وللا في النجح الفات المركز يبلغ ولسة ما ظهر دا. مفروض يكون جاء راجع من قبيييل
_ انا ما بستناهم اكتر من كدا ومارق افتش عليهم ادونا السهر وانا باكر مارق في الخرطوم
_ ما تستعجل ودي الكايسنلها هم زاتها انهم يلموا فيك برة بيتكم
_ والله اللتنين ما ساعل فيهم
_ خابرك ماك ساعل فيهم ولاك خايف منهم لكن نحن دايرين ليهم القبضة هنا وفي نص البيت وخلينا نكمل الخططنا ليهو دا الله يرضى عليك
والله انا سمعت كلامك وماني مقتنعبو ومتل العولق ديل مفروض أمرق ليهم قبيل واركبهم لفخي بعكازي دا لمن الله يغفر ليهم
_ ها زول ها متل ديل ولا توسخ فيهم يدك
النجح والبواليس دخلوا الحلة بالجهة العلي الحلة الورانية عشان ما يجوا بعند الترعة وديلك يشوفوهم ودسوا العربية حقت الشرطة جوة حوش الضهبان ولبدوا بعيد يراقبوا في بيت التهامي . والنجح جاء براحة يتلبد وعرف انهم لسة ما جوا ولبد مع البواليس
بهناك وبعد ديلك وصلوا الترعة البلال قعد في الوساطة واتفرجخ تب فوق مركوبو وقال للمين اقعد اقعد ياخ خلينا ننجم شوية ونتفاكر
_ نتفاكر في شنو ياخي ؟ قوم ورح نقرض العولاق دا وننتهي منو نرتاح قبال الواطة دي تصبح
_ تصبح وين آ زول لسة بدري ويادوب الساعة واحدة
_ والله هسع دي تصبح ونمرق ساي سهر ووجع عوينات في الفاضي قوم قوم ياخي
_ والله انت زاتك حيرتني يا اللمين بتلهفك ونشاطك علي الكتل كدا وذكرتني حبوبتي اللقية بت هبهانة الله يرحمها ويغفر ليها
_ دي مالها كمان وذكرتك ليها بشنو هسي دي ؟
_ بشفقتك دي . زمانك الله يرحمها اكانت قاعدة تحجينا وقالت لي حجوة ليوم الليلة ومن الزمن داك ما نسيتها قالت في واحد كتل ود عمو و..
_ و شنو يا زول هوي اكان داير تقلبها لي ونسة وتحجيني من هناك ما كان نمرق
_ لا لا دقايق بس ومانا قاعدين كتير والله اكان اكمل ليك الحجوة دي ووالله اكان تسمعها وهي زاتها مي طويلة
_ أها ياخ قولها ياخ خلينا زاتو نشوف علاقتها شنو بشفقتي
_ قالت في واحد عريبي كدي كتل ود عمو بسبب طين هيل ود عمو ومافي زول شافو ولا انكشف
أها قالت الزول دا من يومو الكتل تاني ما ضاق عافية
_ ما ضاق عافية كيف يعني ؟ مرض
_ اريتو اكان مرض قالت كاتل الروح ببقى متره وبلهي وببقى زي المجنون ونوم ما بنوم وأكان نام ليلو كلو تلقاهو يتخازز ويصحى مخلوع
_ هسي يعني انت دايرنا نخلي التهامي ونرجع وللا معناتو شنو كلامك دا
_ الكلام دا انا من صغير عارفو وقايلو صاح لكن طلع كضب ساي
وانا من يوم كتلت الطاهر عايش عادي واضحك لآخر سن ولقيت انو حبوباتنا ديل حجاهن تربية وبدخلن الكلام للشفع بطريقة سمحة وبتخش في راسهم ما بتمرق عشان ما يكتلو زول ولا يستهونوا الكتل وكمان قالت كاتل الروح ما بروح وبعد شم ريحة الدم تاني ما بقيف . الله يرحمها كلامها طلع كلو كضب واسعل مجرب
_ تعال هنا انت شنو الشابكني كل مرة كتلت الطاهر كتلت الطاهر . انت قايل كضبك دا بمش فيني انا ؟
_ يعني انا كضاب ؟
_ والله كضابن بلاء وكضاب تسرق . ولا كتلتو ولاك عارف الكتلو زاتو منو
_ أها الكتلو منو
_ كتلو حامظ ود الحليو
_ النصيحة انا ماكتلتو لكن عارف الكتلو منو
_ أها منو ؟
_ خليهو هسي لكن بوريك ليهو . والله انا قايل كضبتي القبيلك مشت فيك . عاين لعمي الفقاد دا وطيبتو واتذكر الطاهر وضحكوا معانا وونستو وطبتو ورجالتو عليك الله زولا بنكتل ؟ ولو انا فعلا كتلتو بجي بيتهم تاني واملا عيني في عمي الفقاد ؟ ياخي عمي دا من انكتل الطاهر وصحتو ماشة محترفة وواجعو بالحيل علا كاتم الوجع في حشاهو ساكت وانا لمن اعاين بنشقا بكى .
اللمين سكت ساااي وسرخ بعيد والبلال اصلو ما ساب سيرة الطاهر وكلامو بس السكاكين شدة مو حار وبووجع واللمين قال ليهو اسكت اسكت آ البلال . والبلال سكت
ودا ديمعاتو تترب تترب نزلن وتررررر سالن ملن وشو
والبلال قال والله الطاهر فقد ابكي ابكي آ اللمين والله انا يومي ببكي عليهو يا حليلو ياخ . تتذكر لمن قال لينا ....
واللمين بكى وقعد يتنهف مدنقر ومقبل علي كدا من البلال وراسو ما قادر يرفعو وبعد شوية البكاء غلبو وچاك صرخ اتاريهو اكان بتذكر في الطاهر وقعد يبكي ويصرخ بطول حسو
البلال بقى يفتش للطريقة البسكتو بيها ولمن شافو ماشي زايد قال ليهو كتلت الطاهر لشنو آ اللمين أخوي ؟
والكلمة دي ما قالها ساي عشان يغير بيها الموضوع ويمرق بيها اللمين من البسوي فوقو دا . فكرة وجاتو صدفة ورماها ليهو يا صدقت وجابت يا كضبت وجلت وخابت
اللمين بعد اخد بكيتو قال للبلال كتلتو عشان بريد التاية
البلال قعد يضحك وقايلو بهاظر
_ والله جد انا والله بريد التاية دي ريدة قيس لي ليلى ما رادها ليها
_ انت جادي ؟
_ والله صاح وكلام حبوبتك بت هبهانة يمين كلو حاصل لي ومن يومي الكتلتو انا ما ضقت عافية ولا عيوني ديل ضاقن طعم النوم وكل يوم بحلم بالطاهر يجيني بضحكتو ديك ويقول لي اللمين أخوي قوم وانا أقوم بس المجنون
_ دا كلام شنو آ اللمين ؟ قول غير دا
_ والله جد . ويوم الطاهر قال داير التاية انا اليوم داك ماسك لي موية في الحواشة وجيت لقيت الناس يباركوا ليهو ولمن عرفتو عقد والله الدنيا دي ضلمت في وشي
_ مشينا ناس خطوبة ساكت لكن ابوها قال عقد وهسي دي والطاهر أبى يوريك قاصد قال لي نعملها ليهو مفاجأة
_ انا لمن حامد ود الحليو جاء الديوان وقال كلامو داك حمدت الله والشيطان قال لي دي فرصتك اكتلو والمتهم في كتلتو حامد والحلة كلها بتشهد عليهو وضدو
_ انا والله كضبك دا ما يمشي فيني . يعني داير تتسدا موش كدا ؟
_ يا زول يمين بالله انا الكتلتو واليوم داك بعد ما مشينا منو انا وياك تاني انا جيتو راجع ولقيتو داير ينوم تب وضحك قال لي كويس الجيت راجع وانا زاتي ما جاني نوم انا قلت انا حالف اخنقك لمن تزبد عشان زعلان منك لانك ما وريتني بإنك داير التاية وعشان انا عرفت آخر زول وكنت شايل معاي حبل هو ضحك وقال لي اختق ساكت وفشش فوقي زعلك كلو وخنقتو لمن مات وضبحتو بالسكين بعد مات
_ لا حول ولا قوه الا بالله . والله آخر زول اتوقعو يعمل كدا انت
_ والما عارفو انت التاية
_ مالها التاية
_ من يوم شربت الصبغة وقالت مي دايراني انا حلفت اكتلها ومشيت بيتهم زي الوكت دا اكتر من عشرة مرات عشان اضبحها ما لقيت فيها طريقة وحالف يمين كاتلها كاتلها
_ والله فعلا كلام حبوبتي صاح البشم ريحة الدم ويكتل تاني ما بقيف وببقى ليهو الكتل عادي
_ ببقى عادي لانو آخرتو ضاعت وعارف مصيرو بقى جهنم عشان كدا ممكن يكتل تاني وتالت ورابع
_ باب التوبة فاتح
_ فاتح الما كتلو زول
_ نرجع آ اللمين وباكر من الصباح نمشي المركز تسلم نفسك ونمشي قبلو لعمنا الفقاد نعفيهو منك وهو لا بدورك منك دية ولا بطالب بدم
واستغفر ربك وامسك درب الله صاح احتمال يرضى عنك ويسامحك
_ الله ما بسامحني وانا ما بسلم نفسي ولازم اكتل التاية
_ تاني كتل ؟ ما قلت ليك توب واستغفر
_ في اتنين لازم يموتوا
_ التاية ومنو ؟
_ التاية وانت يا البلال
_ وانا مالي معاك
_ انت عرفت سري انا كلو والسر دا علا يموت الزول العارفو
واللمين طعن البلال
يتبع
