حكاية ريدة 16
مجاهد يوسف
كلام حامد للمهدي ما اقنعو والمهدي مقتنع تماما انو حامد ما بعملها لانو ود خالتو وبعرفو كويس وكلامو في خشمو ساكت لكن الكتلو منو دا المحيرو وعلى حسب شغلو في الخرطوم وبعادو من الحلة والناس ما قادر يتهم زول
التهامي كلو كلو ما فتر من الكواسة علي حامد صاحبو وبعدما رجع من حلة ناس خلف الله أكان تاني داير يختر يعترو وما جابتو إلا زراعتو والحواشة والدرت قرب ما بقدر يهملها ساكت وبعد عيشها لبن يديها الطير اها لمن رجع صاد رجعتو كانت عاشتها وعندو واحد قريبن ليهو اكان دايرو يمسكها ويقول ليو انا مارق اكوس صاحبي والحواشة أمانة في ذمتك أبقى عليها عشرة لكن لمن سمع بنضم اللمين فوق التاية وموافقة ابوها عليهو قعد وقال القالو وانسجن بسبب قولو
حاج الفقاد ساق حاج الحليو وفاتوا المركز للضابط وقال للضابط جيناك في شان التهامي ودايرنك تمرقو من السجن والتهامي دا نحن عارفنو بالحيل ومن قام زول محترم ومالي مركزو والحلة كلها بتريدو وما حصل في زول سمع فوقو شيتن كعب وما الزول البكتل
الضابط قال ليهم انا الشغلة حقتي خلتني اعرف الزول المجرم من الما مجرم ومن نظرتي ليهو ساي عرفتو ما مجرم لكن تهديدو وحليفتو للمين غلط وعشان ما تقع جريمة تانية انا حبستو وما بقدر اقول للمين خلي التاية دي حاجة ما بنقدر نتدخل فيها لكن بنقدر نمنع الجريمة ما تقع بحبس المهدد اذا اشتكاهو الزول القام بتهديدو وممكن افكو في حالة واحدة انو يتعهد ما يقرب من اللمين لكن التهامي مصر وما داير يتعهد وانا ما بقدر افكو منعا للجريمة
حاج الحليو قال ليهو ناديهو لينا نتكلم معاهو بنقنعو نحن
التهامي جابوهو وديل الاتنين قعدوا يحنسوا فوقو وما خلو شي في الآخر قال ليهم انتو الاتنين الله بعلم وبشهد ابواتي وشدة ما بريدكم وبحترمكم والله لو طلبتو رقبتي دي أختها قدامكم وانا التعهد بكتبو لكن اللمين علي القسم ما ياخد التاية وكتل ما بكتلو لكن مافي زول بعرسها غير حامد
خلف الله برضو كاس ولسة بكوس وكلو يوم يتحسر علي جيتو حلة ناس حامد وقال لأختو انا مستحيل اسامح روحي علي الغلطة دي والزول كان معانا هنا احسن زول لا شفنا منو ولا رأينا غير الطيبة وحامد الغنماية بتاكل عشاهو يقولوا كتل
اختو قالت ليهو كاتل الروح ما بروح ومصيرو ينقبض إن بقى هو وللا غيرو
قال ليها والله قبل اكنت داير اعرسك ليهو لكن الزول دا رايدلو بنيتن في الحلة حقتن ، غايتو قسمة لكن زول ضكران بالحيل وانا لازم ألقاهو والأخوة البيني وبينو ما بخليها تنكطع
التهامي وقع علي التعهد ومرق وما قرب من اللمين بعد عرف شراب التاية للصبغة وفات لحاج خير السيد اتحمدل ليهو السلامة وقال ليهو البت دي ما تغصبها علي زول ما دايراهو ولا رايداهو والعرس يا حاج بالقوة وكسر رقبة ساكت مو صاح وزي ما انت داير ليها السترة دور ليها السعادة
حاج خير السيد كلام شيخ الهوين فوق التاية اصلو ما رماهو في قفاهو وكتلة الطاهر بسببها أكدتها ليهو وعوة التهامي وكلامو المتل كلام حامد الطاهر قبال ما ينكتل تم ليهو الناقصة واحتار في البسويهو وكل ما يشوف ليهو مرة في الحلة وللا عروس اخدوها بدون مشاكل يقرب يحسد ابوها ويتحسر علي حالو
المهدي جاء لحامد تاني وقال ليهو سألتك بالله العزيز وحكيم وسألتك بأعز ما عندك أكان انت الكتلت الطاهر توريني كلتو كيف
حامد قال ليهو ضبحتو شخخخخ
_ ياخي انا حلفتك ياخ
_ وريتك وقلت ليك ضبحتو شخخخخ
_ كيفن ؟
_ تلبت بالحيطة وجبت السكين وضبختو شخخخخ
_ ياخي انت ما بتعز الله ؟
_ المهدي مالك دايرني ألحقك ليهو ياخي عندك موضوع غير دا وللا ما عندك ؟ وللا اقول ليك انا زاتي فايت عشان ما كل مرة تجيني وتتبله علي كدا
_ فايت ماشي وين؟
_ مارق في سقط لقط وماشي السماء اللحمر
_ ما بتفوت والله
_ والله افوت فوتة ، انا أكان ما خلف الله جاء الحلة بتلقوني ؟
_ اعقل آ زول وخلاس تاني انا ماني ساعلك تب بس ما تفوت وللا فوت الحلة أكان كتلتو أخد جزاك وأكان ما كتلتو الحق ببين
_ انا الحلة ماني ماشي وعملت لي شنو في موضوع الجواز؟
_ بستلمو بعد كم يوم وبجيبو ليك
_ دي المرة الكم تقول لي كدا ؟
_ ما مني ياخي والزول قال في الاسبوع دا بجيبو لي
_ نشوف ، والكم يوم ديل بعدن ومتغطي الايام عريان آ المهدي
_ خابر خابر بس التأخير ما مني أنا ياخ قلت ليك
اللمين ساب التاية وبعد شرابها للسم قنع منها تب تب
البلال صرار عينو قال للمين والله يا اب تفة بقينا ملطشة ساي بدرب التاية بت خير السيد وانا كلام التهامي ليك دا حرم ما بعديهو ليهو
_ داير تعمل ليهو شنو يعني وريني آ المسخوت
_ ما بوريك لكن بتشوف البسويهو فوقو
_ يا زول ما دايرين لينا أي مشاكل . وانا خاف خليت التاية عشان كلامو ، ابدن والله وما خليتها علا لشرابها للصبغة
النجح يتحاوم في الحلة زي عنز السوق ويتخفس من بيت لبيت راخي اضانو ديمة العفين
منصور في عولاقو يا سكران ومتندل نايم يا قاعد يسن في السكين ويتحنطر ويجغم في سكرو وأكان قابل صرار عينو في الضلمة بحدر ليهو
التهامي تاني فات لخلف الله وقبال يفوتلو مشى للمهدي وقال ليهو ما سمعت خبر عن حامد ولا جاك ؟
المهدي نكر حطب وقال ليهو ولا بالكضب
أم حامد من يوم جاهم خلف الله ودمعتها ما جفت وكل مرة بتقول لحاج الحليو أمرق كوسو امكن تلقاهو وتجيبو وامكن طاشي وما بدور يجي عشان طردتك ليهو
حاج الحليو قال ليها كايسلو التهامي صاحبو ويتحاوم في قفاهو بكراع كلب ولو في زول بلقاهو وبجيبو ياهو هو
يتبع...
