حكاية ريدة 11
الايام مرت سريعة خلاس وبعد كتلة الطاهر ود الفقاد ومرقت التاية من الحبس بشهرين في واحد من الحلة الورانية بقولولو جابر ود البلة بينو وبين خير السيد سرارة ومي بعيدة بالحيل لكن سرارة ساكت ما بقيان اها جابر دا جاء اتقدم قال داير التاية والتاية أبتو وخير السيد ابوها زعل منها ونضم معاها لمن فتر ويدو وصلها ليها وهي قالت لو كتلوها مي دايراهو
ولمن حاج خير السيد غلب فوقها حيلها قال ليها الله يكفينا شرك يا الشوم اصلا من يوم ولدوك وانا عارفك شوم ولاكي زي البنوت
مرتو قالت ليهو دا كلام شنو دا يا راجل قال ليها البت دي شوم ويومها الاتولدت ماتت فوقو حبوبتي الحرم ووقعت صاقعة في الحلة الورانية واليوم داك أكان معاي شيخ الهوين قعد يتعوذ ساي وسبحتو من يدو ما فكاها ولمن ولدوها وصرخت من سمع صرخيها ساي قام فات وقدر ما حبستو أبى يقنب ولمن كبرت شوية وديتها ليهو يعزم ليها قال لي البت دي اول ما تكبر عرس ليها طوالي والبجيك كلو ما تاباهو ولمن جاء ود الفقاد خطبها انا حمدت الله وعقدت ليهو طوالي مع انهم جونا ناس قولة خير ساي وخطوبة انا حلفت وقلت عقد بس عشان اتكافى الشر والشر وقع دحين يا تاخدي ود البلة دا يا ياني الضابحك شخخخخ
التاية قعدت تبكي والحصل دا كلو ما عندها ذنب فوقو وقالت لابوها خلاس موافقة
يللا المشكلة مي هنا
المشكلة كلام حاج خير السيد فوق التاية بتو دا الحلة كلها سمعت بيهو والمرقو منو وكيف مافي زول عارف
وزي ما بقولوا الحيطان ليها أضان والكلام انطلق في الخشوم زي النار في القصب اليابس وحداث يحدث حداث لمن ورتابو اتطاير ووصل الحلة الورانية ولعند جابر ود البلة وأهلو . وأهلو وقفوا ألف أحمر والعجب أمو قالت ليهو لو اخدتها ماني عافية ليك عديييل وطوالي خلاها وخير السيد لمن جاهم لقى أهل خطبوا ليهو واحدة قريبتو
منصور البوليس بعد استلم الحواشة هيلت الفقاد بقى شايف روحو أغنى زول وعايش بالكضب ساي علي فوق جاه حاج الفقاد وحواشتو راكب حمار الطاهر ويومي بمشيبو الحواشة يعاين فوقها ساكت ويجي راجع ويدو ما دخلها فوقها ويشيل ويتدين من الناس مافي دكان ما فتحلو فوقو دفتر فكك وجرورة حتى السكر بجيبو بالفكك والبسألو كلو بقول ليهو بعد الدرت ولمن يجي الدرت بفعل وبفعل وبسوي وبسوي والناس كلهم وكت الكديب نجضوا حشتهم علا هو دنقير ساكت ما دنقر في الحواشة وحاج الفقاد ما جايب خبر ، لمن يوم جوهو البلال صرار عينو واللمين وقالوا ليهو السنة دي واقع البور وللا كيف ؟ قال ليهم كيفن الكلام دا ؟ وروهو بسواة منصور لا حشاها ولا حرتها ولا نضف والفقاد نوى يقلع منو الحواشة
البلال قال ليها الزول دا خازوق وعفين ساكت وبلدات بت المنا دمرها دمار اقلعها منو بس وانا واللمين اخوي دا برانا بزرعها
منصور جاء اتعذر وبكى لحاج الفقاد بدموعو وقال ليهو اديني آخر فرصة وبعد تعب وتحانيس حتين رضى ليهو وخلاها ليهو ومن اليوم داك منصور مسك مشهادو لكن لسة في عواليقو وسكرو
حامد أكان اخدلو فترة قصيرة في كوستي وفيها صاحب ليهو واحد ضكيران اسمو خلف الله من جهة الديوم كدي وشغال صياد سمك وحواتي وسماكي نجيض خلاس واشتغل معاهو لمن اشترولن مركب شالوها وفاتوبا علي بحر أبيض وقنب هناك قبلو لا لاقى زول بعرفو ولا فكر يرجع واسمو زاتو غيرو وسمى روحو الطيب
كتلة الطاهر وشردة حامد تمت حول والحلة ما فوقا أي جديد يذكر والبوليس كاس لحامد ما خلالو فجة وفي الآخر بقت القضية معلقة ساكت والضابط قدر ما كاس ولاس وساك ولاك وحقق مع جميع الناس كلو كلو ما لقى ليهو طريف خيط يتهم بيهو زول غير ود الحليو الطشا وطفش
يوم كدي حامد بعد نزلوا من البحر خلف الله صاحبو سألو من أهلو وحامد قال ليهو مالك داير تقلب علي المواجع وتفتح لي باب قافلو وقاصد قفلتو وما بدورو ينفتح
وقدر ما خلف الله حاول فوقو وحاول ما اخد منو لا باطن ولا ظاهر بس خلف الله عرف اسم حلتو وراهو ليهو حامد براهو
خلف الله خاوى حامد وداير يعرس ليهو اختو وهو عارفو كويس بس ما عارف ليهو اصل ولا فصل ولا حصل حامد جاب ليهو سيرة أهلو ولمن وراهو اسم الحلة الهو منها ما وراهو ليهو قاصد ومرقت منو ذلة لسان ساي
أها دا قال علا يمشي ويصل لعند حلتهم ويعرف قصتو شنو ومالو ما بدور اهلو
التهامي شاكي في المهدي ود بت الكاشف انو عارف درب حامد وطوالي بسألو منو وداك بنكر وبحلف
حامد عندو شنيطة صغيرونة أها يوم خلف الله خلاهو لمن نزل البحر وما نزل معاهو اليوم داك ودخل فتشها وما لقالو شيتن كدا يفيدو ويدلو علي اهلو لكن لقى فيها كم صورة من صور حامد شال منهن واحدة
يتبع
