حكاية ريدة 4
مجاهد يوسف
عربية ود بت الكاشف السمسار لمن بقوا قريب من الحلة الورانية قعدت ترترت ومهدي بكرعينو اللتنين شغال فوقها أبنصات وكلتشات سريعااات بقى ليها زي الترزي ايام العيد ويشيل ويدعي في الله انها ما تبطل والعربية تتهز كلها وتترجف وود الحليو يتنقز زي الراكب في ترتر وشبط في الباب بيد ويدو التانية ماسك بيها قفا المقعد والعربية كتمت تب وقعدت تتفتف مساااافة وداك ابنصاتو ما وقفت وماسك في يا ساتر ويالطيف بعد خلاص بقى مشيها براحة ودخاخينها عكلبت اشتغلت طق طق طق بالعادم زي الجبخانة الفكوها أصحاب البلولة الجياشي يوم عرس نفيسة بت الكندو والعربية فرررر جرت بيهم ومهدي اتكيف وقال لحامد ما قلت كربيتر
دخلو الحلة الورانية ووصلوا لعند زولهم القاصدنو احمد ود الفكي سيد البقر زول جهامة ومك وطيب وضحاك ووناس وبريد الناس وكريم خلاس ، رحب بيهم وناغم لجنى من الجنوي قال ليهو أجر جري فنقل ليك عتود من العنان في زريبة أمهاني أختي مهدي قال ليهو حرم ما بتضبح وعلي الطلاق حامد ود خالتي جبرتو جبر عشان يجي معاي وعندو امرن هام شديد في الحلة مانا قاعدين وراجعين في الحال ود الفكي قال ليهو خلينا من حرام السماسرة هيلك دا وحرم تكترو أحلق عليكم مبيت وبكرة فطور وغداء والله أكان ماشين الحقوا ليكم دافنة الليلة أكان ما أكلتوا عتودي دا ما تفوتولا المهدي عاين لود لحليو وداك قعد يبلع في ريقو وعرف الزول دل ما بمرقوا الليلة منو سريع ولا بفوتو منو ساي وعاين للزمن لقر الدنيا عصرا بدري وهم غداء ما اتغدوا قال ما في عوجة . وهمس لود خالتو أكان مرقنا بعد المغرب ولقريب العشاء ما مشكلة
ودخلوا الديوان
بهناك الطاهر رغم حيرتو لكن بقى داب ضيوفو ونسى ود الحليو كلو كلو لكن الانشغلبو البلال صرار عينو وأصلو الموضوع دا من ساعة كلمو الطاهر بيهو وهو شغال يقلب فيهو عمل ليهو سافوتة وكل مرة ويسرح ويقول يا ربي يكون ود الحليو الحملة دا أكان داير التاية دي وبريدها وجاي يقول الطاهر نط ؟ لا لا دي مافي زول عاقل بسويها ولو هو ود عنها وما شاوروهو نقول ممكن علا دا سرارة ساي مافي بيناتم . وقدر ما شال يمين وشمال ما عرف الحملة بدور يقول شنو للطاهر ومافي شي محيرو غير الطاهر قال انو الموضوع في شان عرسو يكون داير امونة بت نعيمة أخت الطاهر ؟ لا لا ديك صغيرة لسة من اللبتدائي ما مرقت في سرحانو داك جاهو الطاهر لقاهو يصرصر في عينو ومحتار ومسهي ومقهي بعيد ضربو فوق كتفو وقال ليهو سارح وين آ مسخوت ؟
_ والله فوق الحملة وكلام الحملة الوريتني بيهو قبيلك
_ ها زول ها ولا تختو في راسك هو خملة دار تشتغلبو ؟
_ انا قدر ما حاولت اتناساهو غلبني والله وحاسي زي الفي حاجة بتحصل في حاجة بتحصل
_ بحصل شنو يعني ؟ ما تندمني علي كلامي ليك وانسى الخملة وبعدينك بتعرف الليلتو ان بقى خير نقول بركة وخير وان بقى شيتن ما ياهو برضو حبابو وكلو حبابو
التهامي جاهم خاش كايس لحامد ود الحليو مع انو عارف ما بلقاهو لكن داير يسعل الطاهر ويشوفو جاهو وللا ما جاهو
الطاهر قال ليهو جاء قبيل بارك لي وفطر معانا وفات والتهامي سكت علي كدا وقعد معاهم وقال في نفسو لو في كلام تاني في قعدتي معاهم دي بعرفو لكن ما بسعل الطاهر منو . والطاهر ما زاد كلامو وغير الموضوع ولا جاب سيرة ود الحليو تاني
لكن صرار عينو يتململ ساكت وداير التهامي يمرق يفوت عشان يلحقو برة ويوريهو بكلام حامد الطاهر والتهامي نسى حامد واندمج في الونسة والضحك وصرار عينو ما باقي ليهو علا يقول التهامي تعال دايرك برة ولمن الونسة جرت واتضايق تب قالها ليهو جاء جمبو ولكزو وقال ليهو دايرك برة قوم ورح
التهامي استاذن ومرق والبلال وراهو والطاهر عرف صرار عينو داير يسعلو من كلام حامد قام مسكو وقال ليهو حرم تكلمو وللا تجيب ليهو سيرة الحملة في خشمك لا بيني لا بينك اوعى اوعى لانو دا صاحبو وبلاقيهو وبسعلو والساعة ديك بتمرقني شافع لانو قال لي مافي زول يعرف وانا غلطان الوريتك
البلال مرق التهامي وقدر ما كاس لموضوع يقولو للتهامي غير داك ما لقى ليهو موضوع غايتو أكل ليهو مويضيع كدا هايف في الحواشات والزراعة ما شيتن بخليهو يقول التهامي أمرق دايرك برة لانو كان ممكن يقولو ليهو قدام الناس بس التهامي ما ركز واخد ونستو معاهو وفات علي مشهادو
حامد وود خالتو لسة في الحلة الورانية والليل دخل تب وقالوا لود الفكي ادينا خاطرك لكن داك بدور الونسة قال ليهم حرم علا تتعشوا حتين تفوتوا وفي قعدتن وونستم ديك جاء واحد بقولولو ود البكري من الحلة الورانية لأحمد ود الفكي قال ليهو اقرع مني عبد الصمد ود اختك دا حلف لي يمين أكان ما نطيت من خطوبتي الهدية بت الجد علا يضبحني شخخخخخ وانا ما بنط ، حامد اتكيف من عبد الصمد قبال يشوفو وقبال يعرف الموضوع شنو وقال في نفسو يمين راجل ورخى اضانو للقصة علا احمد ساق ود البكري ومرقبو اخدوا ليهم نص ساعة ورجع ود الفكي براو
نط يا حامد واسعل ود الفكي
قال ليهو معليش بدون تحشر واحراج ممكن اعرف قصة عبد الصمد شنو امكن اديك راي ؟
ود الفكي قال ليهو عبد الصمد ود امهاني اختي دا من قام كعب وصعب وما بنقدر والدايرو بعملو وود البحري دا خطب قبال كم شهر بت بقولولا الهدية البت الظاهر عاجبها عبد الصمد ومي دايرة دا وعبد الصمد لا خابر ولا شغال بيها أها يوم داك وللتغتس حجر دا البت صاحبة اخت عبد الصمد وبتجيهم في البيت طوالي أها عبد الصمد فكر ليها وعجبتو قام قال ليها انا دايرك قالت ليهو انا مخطوبة لود البكري قال ليها أكان رضيانة بي بفركشها قالتلو أكان فركشتها راضية بيك ودا ولا وكضب مشى لود البكري قال ليهو نط وللا بكتلك واداهو مهلة اسبوع هسي انا مشيت ما لميت في عبد الصمد وانا الموضوع دا من سمعتو قلت خشمي عندي أكان وقفت مع عبد الصمد بقولوا عشان خالو وما داير اقيف ضدو عشان البت دايراهو
_ وعبد الصمد أكان دا ما نطا بكتلو ؟
_ الله اعلم علا عبد الصمد كعب تب والناس دي كلها بتخاف منو
حامد شدة ما اتكيف من عبد الصمد ما باقي ليهو علا يمرق يكوسلو ويلاقيهو ويسلم ليهو في راسو وعجبو الكلام دا عجب وقال لود الفكي جيب عشاك ورانا مسور
ودا جاب ليهم عشاهو وحامد متكيف يضحك لآخر ضرس وقرر يصاحب عبد الصمد
بعد اتعشوا ود الفكي وصلهم بعربيتو الجابوها ليو زاتها وأدى ود بت الكاشف باقي قريشاتو ورجع صاد
مهدي غمت لود الحليو الفيها النصيب مسحة الشنب القالها ليهو وقال ليهو بختك تستاهل الجاتك ود الحليو ولا في بالو وسارح بعيد ومتكيف وصل البيت وقال اولا في التبادي اسعل التاية ان بقت راضية يبقى يا ود الفقاد ارجى الراجيك
ومشى بيتهم اصلو ما اشتغل بموعدو مع الطاهر وداك الساعة عشرة جات وفات انتظرو لمن زهج وجاء صاد وود البلال واللمين اب تفة مراقبين من بعيد لبعيد ورجعوا معاهو
حامد قال بكرة برسل اختو للتاية وبديها جواب وبقول ليها أكان ما جبتي معاك الرد ما تجي
يتبع
