حكاية ريدة 9
مجاهد يوسف
حامد الخملة في الحلة ومنها ما مرق وقاعد في بيت ناس خالتو بت الكاشف أم المهدي واصلا هي قاعدة براها ما معاها زول في البيت والمهدي بمش الخرطوم يشتغل ويغيب ويغيب ويجيها وهي ما قاعد يجيها زول في بيتها لانها كلو كلو ما بتقنب فيهو جنها حوامة ما بتدور القعدة براها ومن يوم المهدي ساق مرتو واولادو معاهو الخرطوم هي يا مع اختها ام حامد يا مع مرة في الفريق ، ولا زول ساي ما فكر انو حامد ممكن يكون مندسي في الحلة والدساهو والاداهو الفكرة دي المهدي زاتو
حامد بعد فات الحلة الورانية وقابل عبد الصمد جاء من هناك مقتنع تب بالكلام القالو وقال بعد يتم الاسبوع أكان الطاهر ما طلق ضابحو ضابحو
ونزل عند ناس خالتو ، وأبى يفوت البيت حقهم عشان طردت ابوهو ليهو
المهدي اتناقش معاهو ولامو في الكلام الطلقو في الحلة وخلى الناس كلها تنضم بيهو وقال ليهو غلطان وثم غلطان وحامد زعل منو وقال ليهو أمرق منها وما تتحشر في الما بخصك وداك قال ليهو خشمي عندي ولمن الصباح سمعوا بالبكاء والجريمة حامد أكان داير يفوت بيت البكاء ويشوف الحاصل لكن المهدي وأمو قالوا ليهو علا أكان داير اهلو يلحقوك ليهو ساي بغبينتم وزعلتم علي ميتة ولدهم دي
وقعد قبلو ولمن المهدي فات وعرف الحاصل جاء قال ليهو الحلة كلها تاهماك والبوليس كايس ليك دحين من البيت دا نهائي ما تمرق ولمن تعدي ايام البكاء دي ورحكاكا معاي الخرطوم لانو ما في زول متهم تب غيرك والبوليس أكان قبضك والله يعذبوك عذاب السنين
المهدي كان واثق انو حامد ما ضبح الطاهر عشان كدا دساهو وداير يخارجو من الحلة
بعد الفراش اترفع والمهدي بقى داير يفوت علي مشهادو قال لحامد انا ماشي بالمواصلات عشان العربية الجيت بيها انت عارف استلمها ود الفكي سيدها وانت لو مشيت معاي هسي ياكا المقبوض عشان كدي تستناني وتلبد في فجتك لمن افوت واجي بعربية بكرة وللا بعد بكرة اخارجك بيها من الحلة دي
حامد قال ليهو عديلة وخالتو قالت ليهو لو قعدت في بيتي دا للحول مافي زول بجيب خبرك لكن زي ما قال ليك المهدي اخوك أمرق وطش لمن الكتل الجنى دا ينعرف وينقبض حتين تعود صاد
التهامي فات الخرطوم وغشى المهدي وبيت معاهو وقال ليهو جاي كايس حامد والمهدي اصلو ما وراهو انو في الحلة بس قال ليهو حامد ما ظنيتو جاء الخرطوم لانو لو جاء أكان جاني . التهامي قال ليهو والله انا زاتي جيتك عشان عارفو لو جاء هنا بجيك لكن لو بقى ما جاك بكون في بلد تاني بس انا بلقاهو
المهدي قال ليهو وانت كايسو لشنو ؟
_ كايسو عشان اعرفو كتل وللا ما كتل مع اني عارفو ما كتل وغير دا دايرو يهج ويطش بعيد لمن الكتل الطاهر ينقبض عشان ما يضيع وهم ساكت في جريمة ما سواها
_ والمخليك مقتنع كدي انو ما سواها شنو ؟ امكن هو الكتلو
_ داير توريني صاحبي ؟ حامد ما بسويها
_ انت صاحبو لكن أنا اخوهو ود خالتو وما متهم زول غيرو
_ حامد بتكلم ساي لكن ما بكتل وانا باكر فايت الحلة ولو بقى جاك ما يرجع الحلة وقول ليهو اطفش بعيد حتى لو يفوت ليبيا بس ما يرجع الحلة نهائي
_ انا زاتي باكر ماشي الحلة وماشي داير أجيب امي هنا تقعد ليها معانا كم يوم
_ خلاس نمش سوا
_ اتفقنا تب
اليوم التاني المهدي رجع الحلة بعربية ومعاهو التهامي وفي نفس اليوم بالليل مرق منها ومعاهو حامد ود الحليو ودخلوا الخرطوم
في الدرب حامد قال ليهو ما دام التهامي جاك كايس لي اتوقع يجيك كم واحد غيرو عشان كدا انا بفكر يا امشي الغرب يا الشرق بورسودان بس ما بقنب معاك ولا يوم
التهامي جاء لحاج الفقاد لقى معاهو صرار عينو واب تفة ومنصور البوليس واتكلم مع البلال صرار عينو براحة في الزول الكتل الطاهر ان بقى ما حامد بكون منو وعشان شنو ؟
البلال قال ليهو كتلو حامد اصلو مافي زول غيرو بعملها
حاج الفقاد من يوم ميتة ولدو حواشتو مافي زول مشى عليها قام قال لمنصور البوليس سيب بلدات بت المنا وازرع حواشتي بالنص أكان ما عندك مانع
منصور قال طوالي مانع شنو وهي البلدات زاتها ما استفدت منها شي وتترب قام شدا حمار الطاهر وفات عليها
حواشة حاج الفقاد يجري فوقها الحصان واحسن حواشات في الحلة والطاهر وابوهو غنوا منها غنى
اللمين وصرار عينو بعد منصور فات قالوا لحاج الفقاد ونحن مشينا وين ؟ ما تديها السكرجي المعولق دا ونحن بنزرعها زي ما كان بعمل الطاهر ولانا دايرين منك لا نص ولا ربع
قال ليهم خلوهو يترزق المسكين والليلتكم انا خابرها عشان كدا ما كلفتكم بيها
منصور راكب حمار الطاهر ويتكشم ساي التقول راكب ليهو مرسيدس وغشى النجح صاحبو وقال ليهو ورح ورح يا معولق والغنى جانا في صمة خشمنا والنجح فات معاهو متكيف وقبال يفوتوا الحواشات فاتوا لبت المنا في بيتها ومنصور قال ليها استلمي بلداتك العفينة هديك ليها لا فيها فايدة ولا فيها بركة وما جابت لي علا الفقر وانا تاني يدي ما بختها فوقها
قالت ليهو كتر خيرك آ ولدي لا كلمة تاني ما زادتها ليهو
منصور فات علي حواشة الفقاد وشاعر بعظمة اول ما وصلوها اتلفت المعولق علي النجح صاحبو المعولق وقال ليهو شنو ليك ؟
داك قال ليهو والله عزة جد وليلة القدر وجاتنا
_ تجيك الطاوية حبالها آ كلب يعني عشان انا جيتك معاي داير تركب عودك ؟ اوعك اوووعك آ العولاق وانت عارفني براك ما تلعب معاي وأرجع من هسي بدربك الجيتبو
_ ها زول ها عود شنو ها قول بسم الله ومي الحواشة دي هدا طرفي منها
_ آي احسن عشان ما اقفلها معاك ما تتلوم والحواشة دي هيلتي أنا براي داير تساعدني فوقها حبابك ولو ما داير طير من هسي
_ لا لا بساعدك بس وانا غير الخير شن بدر ليك
حامد بهناك دقش الغرب وقال للمهدي انا مارق في نيالا لكن لمن وصل نص الطريق قال البوديني نيالا شنو احسن حاجة اعملها اشوف لي حلة عفينة وغايسة وغاتسة أشتغل فيها وزول ساي بجيب خبري ماف . مالي ومال المدن الكلها كجر وبولس
يتبع....
