حكاية ريدة 6
مجاهد يوسف
التهامي بعد مرق مع ود الحليو ولا كلمة ما قالها وانكرب فات قدامو وزعلان داير يطرشق حامد انكرب ولحقو وقال ليهو اسمعني يا التهامي أخوي
_ لا داير اسمعك ولا تسمعني ومن يوم الليلة البيناتنا انتهت والله ندمتني علي اليوم الخاويتك فوقو
_ ياخي كان لابد اعمل كدي
_ ما شغلتي ورجاء خاص ما تنضم معاي تاني والدرب دا زاتو خليتو ليك
التهامي مشى بدرب تاني وحامد فات بيتو وصل الفريق حقهم لقاهو كلو جايط والعوة ما تديك الدرب والناس كتار وكلهم منبهطين ومن شافوهو ساي كلهم سكتو وقعدوا يعاينو فوقو معاينة غريبة خلاس زي الكاتلو زول وفيهم الساخط وفيهم المستنكر وفيهم وفيهم وأصلو ما سعل زول ولا قال ليهم في شنو وصل لعند بيتهم لقى اختو منشقة بكاء وقالت ليهو حاج خير السيد دقا التاية لمن قربت تموت في يدو ولمن الناس حجزوهو حلف علا يكتلها ويضبحها شخخخخ قدام الناس وفي نص الحلة
وجاهو الحليو ابوهو داخل وتاااخ قشطو كف وقال ليهو دا شنو الكلام السمعتو دا داير تعمل ليك فضيحة لا حكت ولا بقت ؟
_ ابوي ..
_ أببو يشرطك كررررر ومن يوم الليلة انا لا ابوك ولاني عافي منك دنيا وآخرة أكان ما مشيت معاي هسي لحاج الفقاد وولدو واعتذرت من كلامك القلتو ليهم
_ ما بعتذر وانا مهلتهم اسبوع ما قصرت تب طلق فوقو التاية الله حلاهو لا لا ما طلق مافي زول يلومني في البعملو
_ دار تعمل شنو آ الحملة دار تعمل شنو ؟
_ ما عارف لكن قسما بالله انجض الحلة دي نجاض
_ انت قايل روحك شنو ؟
_ بس خلي الاسبوع يتم والطاهر ما يطلق التاية والله تشوف شوف
_ والله اضبحك شخخخخ
_ ما بتقدر والله وانا من قمت خملة ساي وساكت لكن بعد كدي ما هاميني شي وعفوك زاتو ماني دايرو
_ أمرق من بيتي دا
_ بمرق لكن يمين كدي زدتا الطين بلة والاسبوع زاتو كتير وانا فايت وبوجع الحلة دي كلها يمين والله انت زاتك ما تسلم مني يا الحليو
_ الحليو ؟
_ آي الحليو موش براك نكرتني وقلت ماني ولدك ؟ انا زاتي بنكرك
دا كلو كوم والطاهر بهناك كوم براهو حالف بجملة الايمان الليلة حامد ود الحليو يبيت في الترب وقدر ما شالوهو وختوهو أبى . ابوهو عاقل لكن الطاهر غلبو تب ويشيل ويتحلف كاتل حامد كاتل حامد والليلة دي قبال بكرة
منصور البوليس قال ليهم ورحكم المركز نفتح فوقو بلاغ ونطبلو في تهديدو وكلامو القالو قدامنا دا وكلنا شاهدين
حاج الفقاد قال ديل شباب واخوان والشيطان دخل بيناتهم والمشكلة دي بنحلها براحة ما بندخل فيها بواليس وانا بمش للحليو اخوي وبنحل المشكلة دي
الطاهر قال فايت للتاية يسعلها ان بقت بصح بتريد الخملة لشنو وافقت عليهو صرار عينو قال عين العقل علا اللمين أب تفة قال لا ما تدخل مرتك في الموضوع وندق ود الحليو لمن يأكل يديهو ويعرفنا نحن شنو
الطاهر ما اشتغل بكلام اب تفة ومرق فات ناس خير السيد
ودخل توشك لقى الناس حارسين حاج خير السيد في شان ما يكتل التاية بتو ، وغير الرجال حريم الفريق جت في البيت مع التاية وامها قام دخل في اوضة وقال نادوا لي التاية والتاية ابت كلو كلو تجيهو لمن دفرتها امها دفر وجاتو وشها مورم من الدق والبكاء شاقيها وقعدوا براهم والطاهر سكت مسااااافة لمن هدت وقال ليها اسمعيني يا بت الناس حامد الخملة ود الحليو قال كيت وكيت وكيت وانا الليلة كاتلو كاتلو دحين داير اسمع منك واسعلك في شي بينك وبينو ؟
التاية صرت ليهو وقالت ليهو ولا بعرفو وبكرهو عماء اشوف الموت ما اشوفو ولو في شي ما كان رضيت بيك ولا انا البت البتعمل كدا
الطاهر اتكشم وقال ليها عافي منك وخابرك تب وجيتي دي في شان اشوفك واطمن عليك
_ ما تكتل الحملة وتنسجن وتضيع روحك ساي لكن دقو لمن ياكل يديهو ويعرف الله حق وانا لو ما ابوي أكان مشيت دقيتو براي
_ انا يمين حالف ابيتو الليلة في الترب لكن عشان كلامك دا بدقو بس لكن مي داب دقة يمين اشهيهو العافية
الطاهر ارتاح واتكيف ومرق لحاج خير السيد قال ليهو أكان دار تكتل التاية اكتلني انا قبالها . والتاية كانت بتك وهسي بتك لكن برضو عرضي ومرتي وانا البدافع عنها وما تاخد بكلام الكضاب الخملة الملعون داك والموضوع دا انا الليلة بحلو تب ولومك علي أكان ما حليتو
حامد طفش محل فات مافي زول عارفو علا في ناس قالوا شافوهو ماشي علي الحلة الورانية
التهامي بقى داب بيتو وخاتي الخمسة في اللتنين
منصور البوليس والنجح السكرجية يحنسوا في حاج الفقاد في شان يمش يفتح بلاغ في ود الحليو
اللمين أب تفة وصرار عينو انتظروا الطاهر لمن مرق من بيت حاج خير السيد ورجعوا معاهو الفريق
حاج الحليو بين مصدق وما مصدق وهو ومرتو يتحلفوا انو ولدهم حامد تب ما براهو علا أكان جن ساي وللا مسحور
حاج خير السيد اقتنع بكلام الطاهر وساب التاية ما دقاها تاني ويستغفر من الحليفة الوقعت عليهو لمن حلف يكتل بتو وقال لازم يصوم تلاتة يوم كفارة . عمر ود الهوين الأستاذ اكان معاهو وهو بقعد الكلام بالفصحى قال ليهو دي حليفة وقسم واجب الحنث والناس قعدوا يعاينوا فوقو ولا عرفوهو قال شنو والضو المعولق جنو يحاكيهو في قعيد كلامو مرق والبلاقيهو كلو بقول ليهو دي حليفة وقسم واجب الحنس وبعد الحنس بمرق لسانو عشان يجيب الثاء ثور
اليوم أكان طويل خلاس والناس كلهم ينضموا حامد حامد والطاهر الطاهر
لمن الليل دخل تب وحامد ريحتو في اللرياح ما في والحلة چتك صنت ونامت
المشكلة وين ؟
المشكلة كانت الصباح
الطاهر لمن الشمش فقعت وبقت فوووق ما قام ومي عادتو والصبح ما فات صلاهو وبرضو مي عادتو وعادتو بنوم بدري وبقوم بدري وحاج الفقاد فكرلو وقال الظاهر تعبان خلاهو ابى يتورو ولمن الشمش حرت جاء البلال صرار عينو داخل الديوان ولقى حاج الفقاد براهو وقال ليهو النايم داك نعلو الطاهر ؟
قال ليهو ياهو الطاهر في زول غيرو؟
_ خبارو نايم لي هسع ؟
_ ما عارفو وقلت امكن تعبان امش عليهو تورو يا البلال ولدي
البلال مشى وكفش البطانية لقى الطاهر مضبوح من اللضان للضأن ودمو يشر مالي اللحاف والمخدة
والبلال قعد يصرخ ...
يتبع
