حكاية ريدة 15
مجاهد يوسف
من يوم حاج الفقاد قلع حواشتو من منصور دي المرة العشرين منصور يجي يتور النجح من النوم ويقول ليهو ورح معاي نضبح البلال والنجح يقوم يجيب القزازة ويشيل ويكب ليهو وداك يشيل ويجغم لمن يبقى دلقان ويورجع ويلغلغ لمن ينوم في فجتو والصباح يقول للنجح انا الجابني هني شنو آ عولاق
النجح عارف منصور طيرة ساي وهو زاتو طيرة ساي ومنصور اشتغل في البوليس زمن طويل مفروض يتغير ويبقى زول ولمن يطلع منو يطلع علي الاقل زول عندو شخصية وهيبة ومكانة لكن طلع توزة ساي وديمة سكران . النجح زول عوقة ساكت وعايش بس وما في زول عاديهو زول يتحاوم في الحلة زي العنز الهاملة السيدا طالقها وما شغال بيها والصغار والكبار برسلوا فوقو واصلو ما بمسك سر وأي شي في الحلة عارفو وأي خبر بنشرو وهو النشر كلام خير السيد فوق التاية بتو يوم قال التاية شوم
خلف الله ما ندمان علي شي الا مشبتو حلة ناس حامد من غير ما يوريهو وفوتة حامد رغم انها فرقت عليهو ووجعتو لأنها بسبب غلطتو لكن في نفس الوكت فرحتو لانو البوليس ما قبض حامد . قنب يكوس لحامد ما خلالو فجة حتى كوستي محل اتلاقوا فات ليها
التهامي برضو كاس لحامد لمن فتر ولا أثر ولا خبر ورجع الحلة وصلها وعقد اللمين أب تفة علي التاية بت خير السيد ما فاضل ليهو غير فد يوم ولمن سمعبو ولا كضب طوالي فات للمين في بيتو وقال ليهو ابعد من التاية
اللمين قال ليهو داير تحاكي صاحبك آ عولاق ؟ أها لو ما بعدت منها انعلك بتضبحني زي ما حامد ضبح الطاهر ؟
التهامي ما كترو معاهو قال ليهو انا جيتك ووريتك دحين أخير ليك تبعد والله
_ أبعد كيفن آ السايب وانا باكر عقدي عليها وبعدين تعال هني انت المحشرك شنو في الموضوع دا
_ ما عارف بس للمرة التالتة بقول ليك ابعد من التاية وانا فايت ولو راجل وقلبك محدثك أمشي أعقد عليها وشوف انا بسوي ليك شنو
_ دار تعمل شنو يعني ؟ أها يمين بكرة أعقد عليها واعفصك فوق راسك ولو انت راجل وود رجال تعال امنع عشان اوريك لمين عمرك لا سمعت ليهو ولا شفتو
التهامي فات منو ومشى لحاج خير السيد في بيتو وقال ليهو داير أنضم مع التاية . حاج خير السيد قال ليهو خير في شنو يا ولدي ؟
قال ليهو انا جيتك عديل وقلت ليك داير انضم مع التاية ناغم ليها أتجي كلامي الداير اقولو ليها مو ليك
_ دايرها في شنو ؟
_ ناديها وبقولوا ليها قدامك
حاج خير السيد ناغم ليها وديك جات ووشها مورم من البكاء والدق وابوها محدر ليها ومنفوخ
التهامي قال ليها راضية باللمين المعولق دا ياخدك ؟
ابوها طوالي نطا وقال ليهو التهامي الكلام دا ما بخصك أمشي يا بت بهناك وانا قايلك داير تقول كدي ما كان ناديتها ليك
التاية ما ردت عليهو وجرت تبكي والتهاني من بكاها عرفها مي دايرة اب تفة وعرف ابوها جابرها وداير يعرسها ليهو بالغصب قام قال ليهو يمين تتم العقد يا حاج الا اولع نار في الحلة دي تحرق اللخضر واليابس
_ منو انا يا زول وقايل روحك منو وتبقى لينا شنو عشان تتحشر كدا والتاية بتي وانا حر اعرسها للدايرو غايتو يا شباب الزمن دا عينكم قوية وما عندكم أدب
_ شوف يا حاج انا التاية لا بتبقى لي ولا انا ببقى ليها بس مافي زول بعرسها غير حامد ود الحليو لو اكتل الحلة دي كلها
_ انت وود الحليو الكتلتو الطاهر ود الفقاد
التهامي فات والنجح وكالة الأنباء أكان بتصنت وطلق الكلام في الحلة ووصل للمين واللمين فات اشتكى التهامي وقال ليهو قال وقال وقال
الضابط جاب التهامي والتهامي اصلو ما نكر تهديدو ليهم
لضابط قال ليهو الكلام دا بدينك يا التهامي وحاليا انت غير التهديد متهم بقتل الطاهر
التهامي قال انا ما كتلت الطاهر لكن لو سجنتني مية سنة ومرقت لقيت المعولق دا عرس التاية بكتلو
الضابط سكت مسافة وقال ليهو كدي انا مضطر اسجنك وكمان أوجه ليك تهمة مقتل الطاهر
_ حباب السجن بس زي ما قلت ليك الزول دا لو داير ليهو موتة وضبحة اللعرس التاية وقسما بالله كاتلو كاتلو
اللمين أكان قاعد وسمع الكلام دا كلو وقعد يبلع في ريقو والتهامي بعد كلامو دا وكمان حليفتو للضابط بعملها بعملها
دا كلو كوم والكتل الطاهر كوم براهو ومنو هو وكيف كتلو
التاية كتر فوقها الكلام ودق ابوها ليها اليومي وكرهوها العيشة قامت شربت ليها صبغة وقالت دايرة تموت عشان ترتاح جروا بيها جري الدكتور ولحقوها بعد تعب وابوها لمن شافها عملت كدا قعد يبكي وندم علي دقوا ليها
المهدي جاء الحلة وعرف الاحداث دي كلها ومشى كلم بيها حامد ود الحليو چت ووراهو انو التهامي حاليا في السجن ومتهم في كتلة الطاهر ود الفقاد وقال ليهو انا شايف بعد دا احسن ترجع الحلة ساكت والبحصل يحصل
حامد قال للمهدي دا المفروض اسويهو واها اللمين عقد علي التاية وللا ما عقد
_ ما عقد يعقد كيف ياخي وهي شاربة ليها صبغة وقربت تموت ؟ انا سمعت قالوا اجلوهو وفي ناس قالوا ابوها يبكي ساي وقال ما بغصبها تاني علي زول ما دايراهو . أها بترجع الحلة ؟
_ برجع لكن ما هسع ولمن اشوف التهامي الببقى عليهو شنو
_ ياخي التهامي دا كرهني عديل كل مرة ناطي لي يسعلني منك
_ لازم لازم يعمل كدا
_ حامد ياخي انا عندي احساس انك ما كتلت الطاهر
_ الكتلو منو لو ما انا الكتلتو ؟
_ والله انت ما كتلتو
_ بتحلف ساي وبتغالطني في روحي ؟
_ والله ما كتلتو اسمع حليفتي دي والله لو كتلتو نوم ما تنوم ، انت قايل كتل الروح دا ساهل والله تجن عديييل وانا والله ما وقفت معاك علا لاني متأكد انك ما كتلتو بس ما درت ليك البهدلة والجرجرة في السجن وقلت تبعد لمن الكاتل ينقبض
_ يا زول كتلتو وهسي دي لو اللمين عقد وللا خطب التاية برضو بمشي اكتلو
يتبع...
