حكاية ريدة 22
مجاهد يوسف
لسة البلال واللمين قاعدين في البيت ما مرقوا واللمين بطنو طامة وما داير يمشي قام البلال قال
_ ما وريتك آ اللمين ...
_ توريني شنو تاني آ البلال ؟ . انت الوريتني ليهو الليلة دا شوية
_ وريتك شنو انا هسي آ العشاء اب لبن؟
_ وريتني شنو ؟ ياخي مصاقرني من الشمش دي حية وواقف لي في نفسي كاتمو كتم وبقيت لي زي اليوم الكتل البقرة الحمراء حقت حبوبتي السرورة ودايرني امرق معاك انصاص الليالي نسيلنا مصيبة تضيعنا دنيا وآخرة . وبرضو تقول لي ما وريتك ؟ دار توريني شنو اكتر من كدي؟
_ خلاس آ شيخ الهوين والله البسمعك يقول فالقاك الصلاة وبتخاف الله ومن التبروقة ما قاعد تقوم
_ والله انا شيخ الهوين زاتو ما ساعل فوقو ولا هو لا غيرو
_ لا خلاااااس والله انت الله كلو كلو ما بتخاف منو آ اللمين
_ مالي ما بخاف الله ؟ شايف علي شنو ؟ وانا الما بخاف الله وللا انت الداير تكتل ليك زول في نص بيتو ؟
_ ماني اول زول يسوي كدي وخليهو الموضوع دا هسي ما وكتو وهسي قوماكا ورح ننتهي من التهامي الكلب دا والنضمي ملحوق وما تقول الزول دا انا ناوي اكتلو ساي
_ اها سببك عليهو شنو ؟ اكان عشان كلامو لي في عرسي للتاية بت خير السيد الكلام دا انت ما بخصك وما قالو ليك
_ انا ما داير اكتلو فوق دي .
_ سمح وريني سبب كدي ساي يخليك تكتلو
_ شاكي فوقو انو عرفني انا الكتلت الطاهر .
_ شاكي فوقو ؟ وعرفك كيف؟
_لاقاني قبال فترة جمب دكان بانقا وحدر لي حديرة حارة وقال لي اصبر آ البلال جاييك يوم بس خليني ألقى حامد . انا قلت ليهو حبابو اليوم وهو حامد بعد كتلتو للطاهر تاني بظهر ؟ قال لي بظهر والله وحامد ما كتل الطاهر وانا عارف الكتلو منو . وقبال يكمل كلامو معاي فات مني
_ اها دليلو شنو ؟ وانت الطاهر كتلتو كيف ؟
_ ما عارف ليهو دليل وانا الطاهر لمن كتلتو اليوم داك جيت لقيتو راقد في الديوان وحلفت عليهو علا يمشي يتعشى معاي في بيتي ومشى معاي وأكان دايرني اناديك انت برضو لكن أنا قلت ليهو اللمين مافيش أها بعد العشاء سقيتو سم واتونست معاهو لمن السم دا مشى فوق جسمو وبطنو قبضتو قام مسك فوقها بيديهو اللتنين وقعد يتمرصع ويتمردغ ومتألم منها لمن عرق وجفا وحيلو كلو مات وجسمو بقى بااارد بس التلجة وقمت انا وديتو الديوان ورقدتو في عنقريبو وقال لي بطني مولعة نار وحيلي مهدود تب وداير اكورك وماني قادر وخايف اكورك كمان اقوم اصحي ناس ابوي
انا قلت ليهو عضي المخدة بس والعوجة ما بتجيك ولمن شلتها وقربتها من خشمو عشان يعضيها قمت غمتو بيها غمتة حارة واتكومت ليهو فوق صدرو وقعد يرافس لمن نفسو انكتم ومات انا طوالي حار حار طلعت سكيني وضبحتو عشان ما في زول يعرف انو مات بالسم والخنقة
اللمين يسمع في البلال ومنطط عيونو ومنخلع ولا كلمة ما قالها لمن البلال قال ليهو قوم ورح الليل قرب يكمل وواطتنا دي بتصبح اكان بارينا النضمي
اللمين مرق معاهو وما ياهو ما ياهو من الكلام السمعو دا وساكت ساي وكرعيهو ولا شايلاتنو وبعد مسااافة حتين بدأ يلملم في روحو ويتماسك وقال للبلال الني للنار آ صرار عينو ورح عليهو وألكع خلينا ننتهي منو بسراع بسراع وفي اللول نمرق برة الحلة ونجيها داخلين من تال الترعة
_ ما نصل لي عند الميجر ؟
_ لا لا الميجر بعيد وعلا نشد ليهو الحمير وأكان شديناهن امكن زول يفكر لينا ويشوفنا والأحسن نمرق نتدبى ساكت لامن نصل الترعة القريبة دي ونجي بهناك منها بطرف الحلة ونختر كدي علي زريبة ناس حيص بيص
_ انت الدرب عليك والكتل خليهو علي
_ الدرب والكتل اللتنين علي انا . والله الليلة اكتلو كتلة الجاري علليهو ما يلحقو ولمن انت زاتك تحتار
_ مالك بقيت نشيشيط كدي علي كتلتو وقبل مزرقن وتهدي فيني
_ انا ما عندي صاحب في الحلة دي غيرك انت والطاهر . والطاهر فات يا حليلو وما فاضل لي علا انت دا والشي البفوتك مني لازمن يفوت قبالك
