حكاية ريدة 14
مجاهد يوسف
حامد هبشت خلف الله لشنطتو وشيلتو الصورة هيلتوزعلتو بالحيل وقال الأخوة من تجيب ليها تجسس وتصنت وظنون يبقى أخير عدما وقرر يبعد ويفوت وجاء اليوم داك راجع بدري من البحر و سأل اخت خلف الله قال ليها اخوك فات وين ؟ قالت ليهو فات الخرطوم ومشى عشان يعمل ليهو عملية
_ اخوك فات يكوس وراي ويعرف اهلي وخلف دا من يومي العرفتو ما شفتو شكالو من مرض يحتاجلو عملية
_ ما وراني بشي غير القلتو ليك
_ اخوك فات حلتنا وانا متأكد لاني من لقيتو هبش شنطتي وشال صورتي عرفتو فايت حلتنا وانا ماشي ولمن يجي قولي ليهو حامد قال ليك كتر خيرك
_ حامد منو ؟
_ انا ما اسمي الطيب اسمي حامد ولمن يجي اخوكي بلغيهو ما يكوس لي والبينو وبينو انتهت
حامد طبق شنطتو ومرق فات واخت خلف الله قالت دي الخايفة منها وقلتها لاخوي وقدر ما اترجتو وحاولت تمنعو ما قدرت . قامت قالت ليهو خلف اخوي محرسك البيت واهلو بتدور تفوت قبال هو يجي
قال ليها انتو وسط اهلكم وناسكم ما جاييكم شي وعوجة ساكت ما بتجيكم وخلف الله أكان شغال في كوستي زمن ومخليكم براكم يعني الجدا شنو هسع .
حامد مرق فات
وسبحان الله قبال ما يتم ليهو ساعتين من مرقتو جاء البواليس كابسين واول ما دخلوا الحلة سألوا اول زول لاقاهم في الدرب ووروهو صورة حامد قالوا ليهو بتعرف الزول دا ؟
داك عاين في الصورة ولا عاين فوقها كتير قال ليهم بعرفو بالحيل دا الطيب الحواتي صاحب خلف الله وهسي بتلقوهو في البحر
والبواليس طوالي فاتوا البحر وسألوا من الطيب الحواتي قالوا ليهم مرق من الليلة بدري وفات علي البيت وهديك مركبو فوق القيفة ووصفولم بيت خلف الله
مشوا دقوا الباب جات اختو قالوا ليها دايرين الطيب وقالت ليهم فات ما صدقوها ودخلوا فتشوا البيت وجمعوا ناس الفريق قالوا ليهم الزول دا مجرم خطير وقاتل ليهو زول وهارب والعارف فجتو يورينا
الناس ما صدقوا الطيب الزول الطيب يطلع مجرم وكاتل كمان
حامد قعد معاهم سنة ودقداق لا شافوا منو شي ولا سمعوا منو وعنو شي أكان عشيتو كلها في البحر والبيت بجيهو زول نوم بس وكل الناس بريدوهو
الما عارفو حتى خلف الله صاحبو والما بفارقو ويومي معاهو انو حامد دا عمل في الحلة دي حاجات ما في زول بعملها
جاء عمك كبير بقولولو حاج الصديق للبواليس قال ليهم لو مجرمكم الخطير الكايسين ليهو ياهو زاتو الطيب اللكان معانا هنا دا ان شاء الله كلو كلو ما تلقوهو . الزول دا ما بكتل عقرب خليهو بني آدم . الطيب دا بعرفوا انا بس وحتى خلف الله الشغال والساكن معاهو ما بعرفو وحاج الصديق انفتح فيهم لمن بكى ودموعو ملن وشو وقال ليهم الطيب العرفناهو دا ود حلال وابدا ما مجرم
البواليس كاسوا وفتشوا الحلة جت تلاتة يوم ما لقوهو في الآخر قعدوا منهم اتنين ورجعوا اتنين
خلف الله لمن البواليس فاتوا حلتهم وعرف انو حامد مقبوض مقبوض وبقى أمام الامر الواقع قال للضابط انا فعلا بعرف حامد وبعرفو بالحيل وما داسيهو ولا عارف ماضيهو وجيتي هنا دي هو زاتو ما عارفها ولا حصل جاب سيرة اهلو ديل قدامي
_ لو هو ما عارف جيتك دي ولا وراك اهلو اها انت عرفتو من الحلة دي كيف ؟
_ وكيلي ووكيلك الله وماك طالبني حليفة هو ما عارف جيتي ولو عرف بزعل مني وانا اسم الحلة دي عرفتو منو بالصدفة ساي ذكرو هو فد مرة قدامي وما منتبه لكلامو وكمان لم انتبه غير الموضوع كلو كلو
_ سمح الجابك شنو وجبت صورتو من وين ؟
_ ما بكضب عليك حامد زول ضكران وانا داير اديهو اختي لكن قلت اعتر اهلو في الاول وان بقى في مشكلة بينو وبينهم احاول احلها ودا الموضوع كلو بس اتا ما فكرت صاح لمن طلعت الصورة وقلت لقيتها واقعة لكن ما قايل في زول بفكر ليها وبعرفها جديدة ولو ما جبت معاي صورتو دي ما بقدر اسعل زول عنو بالوصيف ساكت لانو عندنا مسمي روحو الطيب وانا الصورة الشلتها من شنطتو وهو ما عارفني شلتها
الضابط قال ليهو كدي هسي احكي لي وبالتفصيل الممل من يوم اتلاقيتو لحدي ما جيتنا هنا
وخلف الله قال ليهو انا بحكي ليك بس ياريت تنادي ابوهو عشان يسمع قصتي معاهو من يوم اتلاقينا وعلي القسم لاني زايد فوقها حرف ولا ببقص منها كلمة ولا بكضب عليكم
التهامي فات لحاج الحليو لمن عرف انو لاقى الزول الجاء بالصورة والعارف فجة حامد وحاج الحليو ما اداهو كلام كدي فيهو فايدة والتهامي بقى يومي بجي المركز حق الشرطة يشمشم ويساعل وهمو كلو يعرف حامد وين
البواليس الاتنين الرجعوا فاضيين من حلة ناس خلف دخلوا علي الضابط ووروهو كل الحصل معاهم وانو حامد طفش تاني
الضابط أتأكد فعلا انو خلف الله صادق وما عارف اي حاجة عن حامد وطلعوا من السجن وخلف فات بيت حاج الحليو ولاقاهو التهامي وبقى ليهو في رقبتو وما خلى سؤال في الدنيا ما سألو ليهو
خلف الله قعد يومين مع حاج الحليو في بيتو ورجع اهلو وقال لحااج الحليو ولدك ضكر وود حلال وما بكتل
بس المحير خلف الله وحاج الحليو شردة حامد دي ولازم وراها سبب فيا فعلا كتل الطاهر وعملها يا شارد من شي تاني
منصور كل يوم يسكر لط ويجيب المبرد ويقنب يسن غي السكين ويحلف بالتطلع روحو مابرتاح الا يبعج بيها البلال صرار عينو والنجح العوقة فات كلم البلال
اللمين أب تفة جاء لحاج الفقاد هو ومعاهو البلال وقال ليهو الدنيا قضت غرضها والبقى بقى وانا داير اعرس التاية زوجة المرحوم الطاهر
حاج الفقاد سكت مسافة وقال ليهو علي العديلة وفاتوا التلاتة لحاج خير السيد خطبوها ليهو وحاج خير السيد قال ليهم انا موافق علا عندي شرط واحد نعقد هسي والتاية تفوت معاهو الليلة لا زيطة لا زنبليطة
اللمين قال خلاس خلوني اسبوع بس ادبر فيهو حالي وبيتي والجمعة الجاية نجي ناس عقد واسوقها معاي قالوا خير تب
التهامي فات مع خلف الله الحجل بالرجل وما خلالو بلدا كدي جهة الدويم إلا وسأل فوقو عن حامد ونهائي ما عتر فوقو
التاية قالت ما دايرة اللمين واكان بقى آخر راجل ما بترضى بيهو أكان تقعد برا عرس لمن تموت وابوها حاج خير السيد يومي يغديها بدقة ويعشيها بدقة
حامد جاء الخرطوم المهدي وقال ليهو انا ماشي ليبيا بالبر ساي ودي صوري شوف لينا زول يطلع لي جواز ، المهدي قعدوا مع اصحاب ليهو شاغلين معاهو في الدلالة وما داير سفرو شال الصور وقال يماطلو لمن يشوف ليهو دبارة ليهو غير ليبيا
الاسبوع تم واللمين جهز حالو وبقى زول عرس تب وبكرة على حسب الموعد العقد
منصور البوليس شرب لمن وقف لمبة وملطط تب ومرق بالليل شايل سكينو وإترتح ويمين وشمال في مشيهو وجاء للنجح صحاهو من النوم قال ليهو قوم ورح معاي انا ماشي أضبح البلال
يتبع...
