حكاية ريدة 18
مجاهد يوسف
منصور بعد مرق من الحلة فات الحلة الورانية وعندو فيها قرايبو اولاد عم ليهو ما عم لزم ودغري لكن عمومة ومي بعيدة وديلك مشايخة ما بتجيبو ليهم الا مناسبة تجيب الناس ويجيهم ضيف ويفوت منهم ضيف مكجنهم عشان مشيختهم دي وهو شيطانو كبير ومالكو تب وهسي جاهم مجبور ما عندو فجة تاني يقبل عليها غيرهم والغريبة هم بريدوهو وطوالي بجوهو في الحلة الفوق وكلهم عارفنو عولاق وما دايرهم لكن بقول نسوي الليلت الله واليوم البجوهو فيهو داك بدس العرقي وبصلي معاهم مجبور
ومرقتو خوفة ساكت من البلال
أولاد عمو احترموهو وفرحوا بجيتو ليهم دي وشالوهو فوق راسهم وتلاتة يوم ما سكر ولا اتذكر الشراب ولمن شاف ريدتهم واحترامن ليهو شعر بإنو زول زول وبقى يصلي الاوكات الخمسة حاضر وفي الجامع كمان
في بيت اعمامو ديل العوجة ما بتجيهو وفكر في حالو الكان عايشو كلو وبكى واستغفر لمن قال بس وفات للضابط في المركز
التهامي ما خلى بلد وجاء راقب المهدي من بعيد بعيد لكن المهدي السايب فكر ليهو وشافو وكلو كلو ما قرب من حامد اسبوع كامل لمن التهامي فتر وقنع منو وفات ودا بعد أتأكد تب انو التهامي ساب مراقبتو ليهو فات لحامد وقال ليهو والله التهامي دا أن ما لقاك انا قايل بموت عديل ياخي اسبوع كامل مراقبني وبتلبد لي عشان كدا ابيت أجيك وانا فكرت ليهو بالصدفة والله يوم كتلت ملف في زول من شافني ساي زاغ سريع وعرفتو دا التهامي الما بغباني وقلت ليهو انعدل مادام بتراقبني انا وعملت فيها رايح وزوزيت بيهو مزازة مرات لمن فتر من الساساق الفي الفاضي وخلاني براهو . والله أمس القريبة دي حنني وقربت اجيبو ليك هني
_ اووووعك آ المهدي دا الوحيد الما داير ألاقيهو كلو كلو
_ ياخي انا اخوك وحرم باردة وحارة تلقاني قدامك لكن انت زول رمة وكعب وغتيت وداسي مني كتير والله
_ خلينا ياخي من الحلة والتهامي وجوازي وينو ؟
_ يا زول عشان اكون معاك صريح انا ما دايرك تمرق من البلد دي والله
_ والله من أول يوم عرفتك ما داير تطلعو لي لكن أنا الغلطان الجيتك
_ والله ما غلطان مالك ياخي ومال الغربة والبلد دي بخيرها هسي قروشك العملتهن في شغل السمك دي شوية ؟
_ انا مارقاني جريمة ما كايس شغل
_ الجريمة والله اكان عملتها نقول . لكن انت ما عملتها البمرقك شنو ؟
_ تاااني نقعد نعيد في الكلام ؟
_ والله مية مرة اعيدو ليك
_ المرة الفاتت ما حلفت وقلت تاني ماك ساعلني
_ ياخي ديك حليفة ساي لغو لغو
_ لغو ؟ المهم يا اخوي والله انا الكان مقعدني معاك هنا الجواز وبعد كلامك دا ماني داير منك شي
حامد شال القروش العندو كلها أداها المهدي قال ليهو دي قروشي خليها معاك وصرف منها اهلي ما تحوجهم تب لحاجة وانا اديت امي قروش ما شوية تديها لابوي وهسي مون دايرين منك شي لكن كل ما تمشي الحلة تديهم قروش
المهدي قال ليهو وصلت تب وانا القروش دي بشغلها كلها وببيع وبشتري بيها عربات والفايدة بيناتنا النص النص
حامد قال ليهو عديلة تب وانا بقيت حي واتلاقينا في الدنيا دي ماني محاسبك البلقاهو عندك بشيلو وأكان راحن اللروحن يعني اتصرف فوقن زي هيلاتك وانا باكر ماش
_ سمح انت ماشي وين ؟
_ ماشي السماء اللحمر ما عندك اي شغلة بي .
النجح بعد فوتة منصور الحلة مسخت عليهو عشان ما عندو صاحب فيها غيرو وهو الوحيد العاديهو زول ولمن عرف انو مع أولاد عمو في الحلة الورانية فات ليهو والقزازة في خرج الحمار قال يشرب ليهو معاهو كاسين تلاتة يظبط ليهو بيهن راسو ولمن وصلو هناك لقاهو منصور تاني وسبحتو ليل نهار في ايدو وبدقينتو ونضيييف وصلاين . الله هداهو وان شاء الله يهدي المعولق دا
النجح لمن شاف منصور تره فوقو ونطط عيونو زي مخلوع الفرة
دا منصور العفين الكان بسكر لمن يقنب يلغلغ ويبقى دلقان ؟ سبحان مغير الاحوال
شوفوا فرق الصحبة والمخاواة كيف
والبباري ليهو زول مرمد ببقى مرمد اكعب منو والبركة في البلال الخوف منصور وخوفتو بقت ليهو بتوبة
النجح اخد قعدتو مع منصور ومنصور نضم معاهو كتير وقال ليهو ما تسكر تاني وابقى عشرة علي الصلاة وامسك فيها قوي النجح جاء راجع والقزازة طلعها من الخرج ورماها في الدرب ومحتار لمن وصل البيت وكلو كلو ما مصدق انو منصور اتغير كدا
الضابط من يوم جاهو منصور في المركز ووراهو بكلام البلال القالو ليهو كلو وهو خاتي البلال في راسو ومراقبو زي ضلو وبزول من الحلة لا في البال ولا في الخاطر
يتبع .....
