حكاية ريدة 19
مجاهد يوسف
حامد داير يطش تاني وقدر ما المهدي حنسوا عشان يوريهو داير يمشي وين أبى كلو كلو وحلف ما يوريهو والمهدي قال ليهو علي كيفك اعمل الفي راسك بس ابوك زعلان منك ومني انا برضو لانو ما وريتو انك معاي وامك زاتها لمن جبتها ما وريتها إلا في الدرب ولمن قربنا نصلك هني . انا قلت ليهو جاني وفات تاني وما عارفو فات وين
حامد سكت ساي ولمن المهدي فات منو قعد يبكي وخاصة لمن اتذكر ملامضتو لي ابوهو ديك يوم قال ليهو أمرق من بيتي . وديك اول مرة يرفع صوتو عليهو ويسمعو كلام ما صاح
حامد زول كويس لكن عطالو الزمانك وعدم شغلو مع ابوهو في الزراعة ناس الحلة كجنوهو فوقو وهو الخلاهم يسموهو بسببو الخملة بس هو ما خملة
حاج الصديق الجاء للبواليس في حلة ناس خلف الله
اليوم داك لمن سمع بقالوا حامد مجرم وقاتل ليهو زول قعد يبكي وقال للبواليس ان شاء الله كلو كلو ما تلقوهو لانو ود حلال و غقرب ما بكتلها ،وقال البعرفو انا عنو خلف الله صاحبو ما عارفو
خلف الله كلام حاج الصديق دا وصلو وفات ليهو يوم سعلو قال ليهو شنو العارفو عن حامد صاحبي وانا ما عارفو
حاج الصديق قال ليهو الطيب أو حامد زي ما قالوا الزول دا بجيني في البيت وبشرب معاي شاي المغرب ويوم في مرة كبيرة في حلتنا دي ما تسعلني من اسمها اها المرة دي جاتني واكانت محتاجة ليها لقروش وما لقتن عندي وانا اعتذرت ليها وحامد اكان قاعد وسمع كلامنا كلو ومع مرقتها هو مرق وراها وبعد مسافة جاني تاني راجع واداني قروش كتيرة قال لي وديها ليها ومن اليوم داك بقى طوالي يجيب لي قروش وقال لي انت بتعرف ناس الحلة المحتاجين والعدمانين قسمها ليهم ، صاحبك آ خلف الله في حلتنا دي اكان شايل بيوت وما في زول عارف الكلام دا غيري بعد الله . زول زي دا معقول يكون مجرم
خلف الله اول مرة يسمع الكلام دا وبكاهو شديد وقال لحاج الصديق انا من بكرة نازل البحر وأشوف شغلي والمركب هيلتي دي حامد عندو فيها نص اشتريناها شراكة وبمرق ليهو حقو وبوديهو لاهلو وبسوي الليلتو معاك والقروش الكان بجيبها ليك انا بجيبها ليك من نصيبي ونصيبو وانت قسمها بمعرفتك . والله يا حاج الصديق انا يادوب عرفت انو الله فتحها علينا بسبب سواتو معاك دي وأكنا قدر ما نجر شبكتنا نجرها مليانة سمك والتجار اكان السوق ملان سمك يجونا جاريين ويخطفوهو مننا خطف وبالسعر البنقولو نحن . حامد ما بتعوض والله آ حاج
اللمين والبلال جايين المغيرب من الحواشة اللمين قال البلال والله يا البلال اخوي اكان شفت النجح ولا تقول ياهو النجح العولاق والتليفة دا بقى زول زول وتاب من السكر وبقى ملازم الجامع وبجيهو اول زول
_ الزول دا ما براهو
_ ما براو كيف
_ صدقني والله ما براهو غابتو علا لما فوقو الشيخ ود الهوين عزم ليهو واداهو بخرات طيرن ليهو جنو ساي
انت في دا وللا في منصور البوليس
_ وين ختر الخازوق دا هو ؟
_ ماك عارفو يعني ساب حلتنا وفات علي اولاد اهلو في الحلة الوراء ؟
_ ماني عارفة والله يا البلال الا هسي منك . فات بتين ؟
_ عيييك ليهو اكتر من شهر وانت قاعد وين آ السايب ؟
_ ساب الحلة عديييل ؟
_ سابها وساب العرقي وقالوا بقى شيخ زي اولاد اهلو
_ والله احسن ليهو . ايواااااا اكان كدي هو الخلى النجح يتوب
_ منصور ساب الحلة خايف مني اكتلو لاني قبل يسيبها مشيت ليهو في بيتو وقلت ليهو كذا وكذا وكذا
والبلال حكى للمين كلامو كلو مع منصور
اللمين قال ليهو ماك شديد والله داير تقتل التهامي
_ زي ما حامد كتل صاحبي انا بكتل صاحبو وكاتلو ما عشان كتلة حامد للطاهر براها وكاتلو عشان قلة ادبو السواها معاك ونكتلوا انا وانت بس هو اللجي الحلة
_ والله علا تكتلو براك لكن انا ما بكتلو معاك ولا بكضب عليك
_ بتكتلو والله وان كترت كلامك والله تمشي تكتلو براك وانا ولا معاك
_واكان ما كتلتو ؟
_ بتكتلو والله ولا علي كيفك
_ دا كلام شنو دا آ صرار عينو ؟
_ خلييهو بس هو يجي الحلة وبتشوف انا بخليك تكتلو كيف
التهامي بعد قنع من المهدي واتأكد تب انو ما عارف حاجة عن حامد ما رجع الحلة طوالي ومشى تاني لخلف الله في حلتو قنب معاهو كم يوم وجاء راجع الحلة
والما عمل ليهو المهدي حساب في موضوع حامد ابوهو حاج الحليو
اول ما التهامي رجع وفي نفس اليوم الجاء فيهو الحلة فات بيت ناس حامد وحاج الحليو بردلاااااب رماها ليهو وقال ليهو صاحبك رسل لينا قروش كتيرة وجاء المهدي ساق ليهو امو لاقتو
حاج الحليو علي نياتو وعارف صحبة التهامي وحامد وعارف التهامي شقيان وجاري عشان يلقى حامد لدرجة انو همل حواشتو فقال يطمنو انو حامد كويس وشغال ولأنو عارف التهامي داير لحامد الخير
التهامي مرق من بيت الحليو وطوالي فات للضهبان العندو البكسي في بيتو وقال ليهو جيتك لمشوار ودايرك توديني الخرطوم وقوماكا هسع تيا دي
البلال شاف التهامي في الحلة ومشى للمين قال ليهو استعد الليلة زولنا في الحلة
يتبع
