جمعتنا القرابة {باللهجة الجزائرية}

الحلقة 20

فالصباح راح المحامي خرج زاكو بكفالة أما راسم فرقد فالبلاصة تاع l'accident غير فطن راح direct l'hôpital وزاكو كيف كيف دخل راسم لقاهم حالتهم حالة وأكثر وحدة مامات آزار اللي كانت غايبة عن الوعي، زاد دخل زاكو اللي كانت حالتو حالة شاف معاهم ممبعد سقساهم على ماماه خبروه بلي راهي راقدة ودارولها ابرة، وفي هذاك الوقت دخلت الفرملية تشوف كامي حتى خرجت تعيط للأطباء جا الطبيب المشرف على العملية ودخلو وراه 2 أطباء جاريين وهنا فهمو بلي الحالة ماتبشرش بالخير راسم ولا يضرب فالزجاج ويعوق أما زاكو فحكم راسو ويدور حتى خرج الطبيب وراحو كامل جاريين ليه
٠راسم: واش كاين علاش دخلتو جاريين ونتوما مخلوعين، الطبيب هبط راسو
٠الطبيب: مع الأسف فقدنا المريضة، راسم حكمو من الكول
٠راسم: وشنو واش راك تخلط ماشي البارح ونتا تقول تجاوزت مرحلة الخطر آه كيفاش محال محال
٠الطبيب: صح بصح قادر يصراو مضاعفات بعد العملية خصوصا أنو كانت الضربة قوية وغميقة وهذا الشيء اللي صار
٠راسم: مضاعفات راك تقولي مضاعفات ههه ختي ماتت ونتا تقولي مضاعفات تتمسخر بيا ختي الوحيدة الغالية راحت ياربي علاااااش ياربي واش درتلك أنا
٠الطبيب: علابالي ماشي ساهل...... عظم الله أجركم، وراح وخلاهم
، وهنا دخل صهيب وماريا
٠ماريا: واش كاين واش بيكم واش صرا وك...
٠زاكو (وهو يبكي): كا.. كام.. ي متت، ماريا فشلت وطاحت فالكرسي راح ليها زاكو يجري خاطر كانت ديجا تعبانة، وعدا بين عينيها الشريط تاعهم من الصغر ممبعد دارت يديها فراسها وتبكي بشهقة
٠ماريا: لالا كامي متموتش لالا محال كيفاش هيا اللي كانت تقولنا أنا نتزوج قبلكم هيا اللي كانت كي ندكرو كلمة موت تضربنا وتقولنا ماتفاولوش على روحكم راحت وخلاتنا ياربي علاش فعز شبابها، وزاكو كان يسمع مقدرش يحمل وراح صاب *هذيك القرعة الكبيرة اللي فيها ما باش يشربوا* قلبها فالأرض وناض يضرب فيدو فالحيط حتى سال الدم حتى جات الطبيبة *وجدان* دارتلو ابرة مهدأة وداوه
المهم حالتهم كانت حالة "مانحكيوش خير" الليل كامل وهوما اللي يبكي يبكي واللي تحكمو كريز ينوض يعيط يكسر، فالصباح
ناض زاكو فرحان ممبعد شويا رجعتلو التعاسة، وي كان حاسب روحو ينوم وكلش كان عبارة عن كابوس بصح الله غالب ناض تنفض من بلاصتو وجا خارج قابلاتو الطبيبة فالباب *وجدان*
٠وجدان: monsieur مازالك عيان لازم ترتاح
٠زاكو:...... ، وكمل خارج، راحت حكمتو من كتفو
٠وجدان: monsieur لازم ترتاح
٠زاكو: نحي يدك لانكسرهولك وطبعها للأرض طاحت، ناضت تتوجع أما هو ماخزرش فيها وماتأسفش على الغلطة تاعو كامل، خرج لقا صهيب قاعد وحاط راسو بين يديه، راح ليه زاكو
٠زاكو: وكتاش يدفنوها ؟!، صهيب طلع راسو مشوكي من الكوراج اللي عندو ولا نقولو يصطنع فيه ونطق
٠صهيب: مع صلاة الظهر
٠زاكو: وراسم وين راهو؟!
٠صهيب: خرج ماجاش، راح زاكو وهو فقلبو غصة
عند راسم وهو فبيت كامي ويشم فحوايجها ويشوف مع البيت فكل كوانة يتفكر فيها وهو يبكي كيف الدراري الصغار ويشحق، حتى صاب الباب تفتح دخل الجد راح لعندو وقعد معاه فالأرض وراسم مهبط راسو ويبكي
٠الجد: ياوليدي هذا قضاء وقدر ماتعدبش روحك هكذا علابالي بلي ماشي ساهلة بصح محنة وتفوت وكون ماتكونش نتا قوي وتساند والديك وتعطيهم القوة شكون راح يساندهم، علابالي بلي ختك وعزيزة عليك بصح على الأقل اصطنع القوة
٠راسم: مانقدرش ياجدي مانقدرش خسرت ختي وخسرت الإنسانة اللي نحبها كيفاش حابني نكون قوي، حضنو جدو، بعد مدة
٠راسم: وكتاش الدفينة
٠الجد: دوك مع صلاة الظهر، تنفض راسم من بلاصتو وراح هابطط لقاهم مدخلينها للدار والناس لداخل راح جاري ليها نحالها الغطا من على راسها وهو يشوف معاها *كانت ملايكة تبان راقدة* ، حضنها وباسها من راسها وخرج، أما زاكو فكان قاعد فالزاوية ويشوف بكل برود *برود ماقبل العاصفة*، حتى لحق الوقت اللي يخرجوها فيه، ماريا ناضت تعيط ويماها تشد فيها والدنيا تبكي، خرجوها وركبوها، بعد مدة وصلو خرجوها وحطوها قراو عليها ممبعد جاو رايحين يحطوها وهنا يكلاطي زاكو
٠زاكو: كامي لالا كامي وين رايحين تحطوها ويدرع فيها وهوما يجبدو فيه بصح ماقدرولوش حتى راح ليه راسم ممبعد حضنو بعض وقعدو يبكيو فهاداك الوقت كانو يغطو فيها ممبعد راحو كامل وقعدو غير هوما للزوج عند قبرها راقدين، غير طاحت الظلمة راحو للدار دخلو direct كل واحد راح لبيتو
بعد مرور شهر
طبعا نحكيلكم التغيرات اللي صراو راسم وزاكو بالزور باش فاتو الأزمة النفسية اللي كانو فيها ماولاوش يهدرو بزاف من الخدمة للدار وصارمين ماكانش التمسخير حتى أنو ماتلاقاوش من نهار الموت طبعا لانو فرقو السوق وكل واحد راح لدارو حكايت آزار تغلقت خاطر كل الأدلة تأكد بلي ماتت أما فقلوبهم هيا عايشة bien sur هيا وكامي أما ماريا فبزور فاتت الأزمة النفسية اللي دخلت فيها طبعا فلمحت بصر فقدت 2 خواتاتها وحدة دفنتها والأخرى حتى الجثة وماشافتهاش وتاني راهي حامل فشهر وصهيب تاني بزور باش اقتنع بلي فقد اختين أما أم آزار فضربتها l'attention واتشلت، ووالدين كامي مازالو ماستوعبوش حكايت فقدو بنتهم وأم كامي كانت مرة على مرة تفقد أعصابها

المهم فليل دخل راسم لدار bien sur يخرج مع طلوع الضو ويخرج مع طلوع الظلمة، دخل لبيتو تحمم بدل وتكسل يرقد، بعد مدة فطن مخلوع من المنام اللي شافو ممبعد استغفر وكمل رقد

فجهة خلاف فدار فلغابة قاعد يسوغ على الأطباء
..... :كيفاش مازالت فغيبوبة آه قولولي أهدرو 2شهور ومافطنتش، الأطباء وهوما مهبطين راسهم
٠طبيب: monsieur سمحلنا بصح ماشي بيدنا حنى رانا نديرو فخدمتنا بصح.....
.....: بصح واش آه أهدر، وحكمو من الكول، والله وكون تصرالها حاجة ماتلومو غير نفسكم نقتلكم بالواحد
٠طبيب: مايكون غير الخير بصح تقدر تطول شويا
..... : طيرو من قدامي طيرو، وراح منين هيا ويهدر
..... : نتي اللي وصلتي روحك لهنا لوكان خيرتيني أنا لوكان راكي حية وعايشا la belle vie، وضحك الضحكة اللي هزت كامل اللي كانو فالدار وخلاتهم يترعدو من الخوف

في ميزكم آزار عايشة ولا ميتا؟! وهذاك شكون!؟! وشكون الشخصية لجديدة اللي رايحة تدخل للحكاية؟!! وعجبتكم ولا لالا؟! ونكملها ولا لالا؟!

Lsl ida 3jbtkum atfa3lo stpl bach nkml ou merci ou smholi ani ntwl because adorof wlh nhbkuum ❤️💞