جمعتنا القرابة {باللهجة الجزائرية}

الحلقة 23

حتى سمعت صوت خلعها، نحات النواظر ودارت *نعم إنه زاكو 😑*
٠زاكو: زعما راكي تقراي فالكتاب!
٠وجدان: إيه ونتا واش همك فيا نقرا ولا مانقراش ولا هادي تاني تتدخل فيها
٠زاكو: لالا عومي بحرك بصح حبيت نعرف هذا العلم الجديد تاع تقرا كتاب بالمقلوب بالاك خرج جديد وأنا مسمعتش بيه ، شافت الكتاب لقاتو صح مقلب هبطت راسها وطلعت حمرة وقاعدة تسب فروحها
٠زاكو: أقلبي الكتاب يا بنتي وأقراي كي الناس، راحت تقلبو زعما عاودت ردتو كيما كان (يعني هيا فبالها قلبتو بصح هيا قعدت غير تدور فيه وردتو كيما كان) من التبهديلة ، راح يقلبهلها الكتاب وقرب منها هي اتخلعت من قربو ليها وشافت معاه وقعدت غايصة مع فيه أول مرة يقرب منها هكذا ولا يهدر معاها هكذا (ماشي إعجاب 🙄) ، مبعد فاقت لروحها وهبطت عينيها، "يابنتي بالاكي ثم بالاكي هادي ممتلكات كامي ديجا ماخصنيش تعراش من اللي يحبو كامي بسبابك 😒"
٠زاكو: دوك أقراي كي الناس، ممبعد راح وخلاها عاودت دخلت فالشرود اللي كانت فيه، أما زاكو فراح يتلاقا راسم اللي راح يهبل من كثرة التخمام والمنامات اللي يجيوه
دخل زاكو للريسطو راح لعندو سلم عليه وانتبهلو بلي cvp
٠زاكو: راسم وشبيك ماكش عاجبني!
٠راسم: خليني برك واش نحكي وواش نخلي من النهار هذاك مانيش نكحل على النعاس، والمنامات تاع كامي وآزار في بيت مغلوقة عليهم ومربوطين ويبكيو ويعيطو ويقولولي عاونا، علابالك نزيد شويا نهبل ديجا الضمير تاعي ماهوش مرتاح حاس كيشغل مادرت والو علاجال آزار حتى الجثة تاعها ماشفتهاش هذا اللي معذبني كتر وعلابالي مارايحاش تسامحني خاطر صح مانستاهلش الحب اللي مدتهولي ، *يهدر وحاط يديو على شعرو ويزير عليه ويخبط فرجلو من القلقة*، /هاجيبولي واحد يحبني هكذا/، أما زاكو فأثرت فيه الهدرة تاع راسم وحس الجرح اللي كان يحوس يداويه زاد انفتح
٠زاكو: والله مام أنا حاس بلي راني مقصر بلبزاف فحق ختي ولا فحق الطفلة اللي حبيتها وكنت راح نديرها مرتي بصح واش نديرو هذا مكتوب ربي، *يهدر فيها ويحس قلبو يتقطع*
٠راسم: زاكو أنا والله مانكدب عليك الموت تاعهم والله مادخلتلي فراسي srtt لموت تاع آزار كيفاش حتى الجثة ومالقاوهاش، الناس بلعام ويلقاوهم حتى وعظام ويطلعوهم شكون
٠زاكو: وأنا معلاباليش علاش عندي إحساس كبير بلي مازالو عايشين
٠راسم: شوف واش رايك نفتحو القضية من دار وجديد
٠زاكو: ماشكيتش يوافقو psQ هوما غلقوها ماشي حنا
٠راسم: ساهلة نحوسو حنا
٠زاكو: وكيفاش! ، وقعد مركز معاه واش يقولو
٠راسم: الحاجة اللولة اللي نبداو بيها نفيريفيو الطونوبيل مليح
٠زاكو: بصح فتشو الطونوبيل مليح ومالقاو والو
٠راسم: وحنا كنا معاهم لالا؟! ، قالولنا ماكان والو مشينا فهاداك الخط وخلاص
٠زاكو: معليه وإذا مالقينا والو؟!
٠راسم: نروحو نحوسو فالبلاصة اللي صرات فيها l'accident المهم نريحو الضمير تاعنا
٠زاكو: معليه غدوا نشاله نروحو نشوفو كيف كيف، دوك أنا نروح ونتا ماتخممش بزاف، أيا أتهلا وسلمنا على عمي ومرت عمي
٠راسم: صاحا نتا تاني أتهلا، وراح زاكو وهو يخمم فالكلام تاع راسم أما راسم فماكانش أقل منو بصح حس أنو نصف العبأ اللي عليه راح