تاني يوم قمت متأخرة شديد بعد الظهر لاني كنت هلكانة عملت روتيني اليومي لحدي العصر كدا بديت اجهز لبست فستان بيج مع طرحة وكعب بالكبدي كحلت عيوني وعملت قلوس شلت تلفوني ف يدي وطلعت ركبت العربية واتحركت ع مكان الخطوبة...
كانت ف بيتهم بركنت العربية ونزلت وقفت مسافة بعاين لي البيت من برا ويسأل نفسي ...!
يا ربي في منو معاهم ؟!
اعمامي قاعدين؟!
طيب هل ح اقدر اواجههم واكون ثابتة ؟!
ال ح يحصل شنو ؟!
اسألة كتيرة دارت في راسي وم لقيت ليها اجوبة💔
ف النهاية اتوكلت على ربنا ودخلت لانو باب الشارع فاتح لقيت الحوش مزين والكراسي مرصوصة وعندهم شجر مع ريحة الرمل اتزكرت الحلة عيوني رقرقو اتماسكت جاني صوت ام سجى وهي طالعة ليها من غرفة ...
- مرحب بيك ي بتي اتفضلي
* شكلي وصلت بدري
- لالا بعد شوية المعازيم ح يوصلو اتفضلي سجى جوا
دخلت معاها جوا وصلتني لحدي غرفة سجى ورجعت لقيتها مجهزة نفسها بس كانت ماسكة فستانين ف يدها بتعاين ليهم انتبهت لوجودي....
- بركة الجيتي من قبيل محتارة البس ياتو؟!
اخترت ليها المناسب مع المناسبة حقتها بعد لبست كانت طالعة مبالغة
الفستان اسود فيو نقش بالفضي سندريلا شعرها كان كيرلي والميكب بسيط ومناسب ولبست حلق واسورة وخاتم بس باللون الفضي الحنة في يدها برضو رهيبة
اتمنيت اننا نكون ف حالة غير النحن فيها💔
نكون كأي اختين فرحانين بي يوم زي دا😔
انتبهت ليها وهي واقفة بتعاين لنفسها في المراية وملامحها فجأة بقت حزينة انتبهت لي بعاين ليها جات قعدت جمبي ...
- متخيلة معاي كيف احساسي ف يوم زي دا وانا م عندي اب ولا اخت؟!
ابوي اتوفى من وانا عمري ١١ سنة واختي الكبيرة لحقتو بعد شهرين بس وبعد سنة من الكلام دا تومتي طلعت من الحلة بسببي💔
* بسببك؟!
- اي انا كنت بحب واحد وكنت فاكرة انو محترم اختي حذرتني منو كم مرة بس انا كنت غبية وم سمعت كلامها هو انا ياتو يوم سمعت كلامها طول عمري كنت بعاملها أسوأ معاملة وحتى امي بحرضها عليها😔
والولد اغتصبها وتاني م سمعنا عنها حاجة لحدي اليوم مر على الموضوع دا قريب التسعة سنوات وكل يوم ضميري مأنبني م قادرة اعترف بالحقيقة..
نفسي الاقيها واقول ليها سامحيني اضمها علي وم افكها الا تسامحني م عارفاها حية ولا ميتة كل العارفاو اني ندمانة ندمانة شديد 💔
