حب رغم الحواجز

البارت الرابع

( حب رغم الحواجز )
#Akbal_mahameed
&&&&&&&&&&&&&& 1

- شوفي روئ اني مو غشيم ترة، وخلي بالج اذا واحد خان مو يعني كل الزلم خونة وترة بينة الزين والشين اخذي وقتج وفكري هالفترة مراح اخلي اهلي يجون فكري زين وثقي يابنت الناس اني شاريج. 1

- بس اني.
- لا تحجين شي هسه اخذي وقتج وفكري زين مع السلامه.
- الله وياك.
سديتة منة وتمددت بفراشي فكرت بكلامة
الولد مابي عيب ولا اله ذنب
بس العيب بية اني صرت من اشوف رجال تعلب نفسي يمكن تشوفوني ابالغ بس اني هيج صح اكو الرجال الزين والي يصون مرتة بس اني مامستعدة ادخل بتجربة وتالي اطلع منها خسرانة واطلع بجرح جديد
كمت نزلت جوة يم امي جانت كاعدة يم روكان جان يتغدة
- شلونج روئ.
- الحمدلله خوية
- رايدة شي محتاجة شي انتي وريحانة.
- سلامتك خوية +

- لعد كومي صبيلي جاي.
- تدلل.
رحت صبيتلة كوب جاي لان دومة يشرب بالكوب مو استكان.
انطيتة وامي كالت جيبي ورقة وقلم علمود تسجلين مسواك المسواك مال الاربعين مال ورد.
جبت دفتر مال ملاحضات وقلم وكعدت يمها هيه تكولي واني اكتب.
طلع عمو شافنة رجع لغرفتة شوية وطلع شايل فلوس انطة لامي فلوس المسواك.
راح يمر اربعين يوم على وفاء ورد وعبالك البارحة ماتت
رجعت لغرفتي اجه على بالي مهدي وكلامة نفظتة من بالي وكمت طلعت فرش الرسم وكعدت ارسم اريد اشغل نفسي في سبيل ماافكر بي.

ورة يومين صار الاربعين مال ورد صار ضخم كلش عمو نصب جادر بالشارع وذبح طليان ثلاثة واحد وزعة على روحها وثنين طبخوهن للخطار.
ورة الغدة دخل روكان كال سوي جاي.
سويت وكملت وكفت انتضر يجي واحد ياخذة
دخل للمطبخ عمو بس عيونة براسة من الاعصاب
صاح خوية ام روكان
اجتي امي وياها ام ورد عمي من شافها اخذ صينية الجاي وراد يطلع.
بس وكفتة هيه.
- ابو علي لحظة.
- ها عمة.
- حجو وياك الولد.
- عمة كطنة وشيلوها من اذنكم، اخت ورد اخيتي وتحرم علية حرمت امي واختي.
- ياابو علي فكر بوليدك منو اله على الاقل تاخذ خالتة احن علي من الغريبة.
- ابني اني اله وبنات عمة مامقصرات وياة ومدامني عايش مااخلي الهوى يطخة
- يعني كلش مابيها مجال
- عمة كتلج حرمت علية حرمت اختي سدو هالموضوع يرحم اهلكم.

- لعد اني اريد اخذ علاوي.
- وين تاخذي
- وياي للبيت ما اعوفة من ايد لايد ابن بنتي واني اربي
- عمة لا تخبلوني ترة لحد الان ورد واكفة بين عيوني وماحجيت كلمة تغثكم. 1

دخل روكان
- وين الجاي يمعودين.
- هذا صبيتة
راد ياخذ الصينية شاف بارد
- امشي جددي صار ثلج ومن تكملين دزيلي مسج.
- ماشي بس اعصابك.
طلع من المطبخ خليت القوري على النار واسمع ام ورد بعدهي تحجي وية عمو وهو وجهة احتقن اخذ بطل مي يشرب وهية تحجي.
- لا تقبل تاخذ خالتة تربي ولا تقبل تنطي الية اني ابن ورد مااعوفة هيج سودة علية بعد امة منو يحن علي على الاقل اخذة يمي اني عيني علي وخالاتة يدارنة وانتة لو الله يهديك وتاخذ امال تربي ابنك وابن اختها.
البطل مال المي بيد عمو شمرة حيل على المجمدة وصاح: صار ساعة تحجين واني ساكت وحترمكم لخاطر المرحومة بس كافي انتو حتى قدر الها ماخليتو بالاربعين مالها وتريدون اخذ اختها احد كلكم اني حيوان ولكم الدفنتها مرتي وحبيبتي وام ابني تاج النسوان وماتحلى بعيني مرة بعدها، شوفي ام ورد ابني يبقى يمي وابيت ابو معزز مكرم وهالسيرة اذا انفتحت بعد اكلب عاليها واطيها علاوي يمتة ماتريدين تعالي شوفي هلا بيج بكل وقت.