حب رغم الحواجز

البارت 49

( حب رغم الحواجز )
#Akbal_mahameed
&&&&&&&&&&&&&&&

عمتي من شافت الشرطة تريد تاخذ وسام تخربطت احتاريت اصحيها لو اخابر روكان
عمي طالع وومرتضى اخو وسام الجبير هم طالع
اخذو الشرطة جبت مي شمرت على وجهة ودموعي تجري كلة من وراي اني فكر اني يمتة كعد حضي وارتاحيت علمود هسه ارتاح وية وسام من حبيت فراس غدر بية ودز صور لجلال ومن حبيت جلال وانخطبنة هم خاني وهسه دز صور لرجلي

كعدت عمتي اخذت موبايلها خابرت عمي واني رحت لغرفتي اتصلت على روكان
- هاا رياحين صار شي
- روكان اجتي الشرطة اخذت وسام
- شنو ليش اخذتة
- جلال مشتكي علي فدوة روحلة
- رايح رايح هالكلب جلال يريد تربية من جديد
سدة بقيت كاعدة بغرفتي ابجي
عمي وعمتي راحوا على وسام للمركز بقيت اني وحمويني الصغار بالبيت
للساعة ب11 ونص دخلوا وياهم وسام مطلعينة بكفالة من شفتة ركضت حضنتة
- حبيبي وروحي من الدنيا
- اففف هالخوف كلة عليه
- لعد عليمن ما تعرف شصار بية
روكان ضحك وصاح ولج اخوج واكف خليلي احترام
استحيت ابتعدت عن وسام هو رجع جرني خلاني جوة جناحة
- لا تخافين حبيبتي اني ما بيه شي
كال ابو وسام تعال واحجيلي شنو سالفة الصور ومنو هذا جلال
بلعت ريكي بخوف خفت من ردة فعلهم
كعد وسام وحجالهم كلشي وياه روكان كال السالفة صارت يمي اني اتفاهم وياه
عمي ابو وسام ما قبل كالة رياحين بنتنة صارت اني اروح لابو واخلي يربي ابنة
ترخص روكان وراح

دخلت لغرفتي وسام متمدد على ضهرة
من اجيت يمه كال مرغيلي ضهري
كعدت افرك بضهرة ومبين يوجعة لان من افركة يغمض حيل
- ضهرك يوجعك
- ايي شوية
- انزع القميص خلي ادهنة
كعد نزعة شفت جتفة صاير ازرك

- هاي شنو جتفك صاير ازرك
- شوية يوجعني اكو دهن بالجرار ادهني
جبت الدهن وفركت جتفة بس دموعي ما وكفت لو ثانية مختنكة ومن شفت جتفة وهيج متاذي اختنكت بالزايد
لزم ايدي وكعد لان حس عليه دابجي
- ليش هالبجي
- الصار كلة من وراية
- وانتي شعليج
- شنو شعليه انته شفت الصور ورحتلة
- ايي والصور مابيهن شي غلط هو جان خطيبج اعنرف ضجت وفار دمي من شفتهن بس مالي حق احاسبج لو احملج الذنب
- يعني ما ضايج مني
- لا ابد
حضنتة من صدرة
- اشو انتي كل شوية تحضنيني
- غير احبك
- صدك تحبيني
- وليش ما احبك زوجي وممقصر وياي ومحترمني
- هذا واجبي مو مانية بس اكو مشاعر تصير بين العشاق مو الا الزواج مشاعر الحب انتي تحبيني لو لا
- انته شتحس
- كل رجال يعرف مرتة اذا تحبه او لا واني اشوفج تحبيني لان تذوبين بكل لمسة مني

ضحكت وضميت راسي بصدرة
- اي احبك وأموت عليك
- فدوة لعمرج حبيبتي الله يقدرني واسعدج
بستة بصدرة وابتعدت دهنت صدرة وطلعت حميت العشة بسرعة صبيت وتعشينة

من يومها اختفى جلال من حياتي تماما عمي وابوي راحوا لاهله وكالولهم لو طلعت وحدة من الصور راح تصير عشاير بيها وهو تعهد لابوي انو الصور مسحهن
انسدت سالفتة وطويت صفحتة من حياتي ورة شهر ونص من زواجي عرفت نفسي حامل
وهذا جان  اول فرحة بحياتي حقيقية خلتني انسة
كلشي صار وياي وكلشي مريت بي
وسام مايوم اذاني لو ضوجني حماية الاصغر تزوج بنت عمه ولان عمتي ما تحبها اخذها وعزل بيها الحمدلله والف الحمدلله مرتاحة من ناحية عيالي وسام هو وروكان الروح بالروح وعرفت هو جان يعرف بروكان جان يحب شهرزاد كعد يحجيلي شلون جان يشكيلة روكان بيومها شبعت بجي على اخوي معقولة هالكد يحبها لدرجة يكعد يبجي يم وسام عليها يكولي وسام جان يجي يمي بالليل يبقى يشرب جكاير ويطحن بروحة من اكولة ليش ماتروح لبيتكم يكول اروح واشوف عمي يدخل للغرفة ما اتحمل على لحظة انهار
بي الحمدلله الله عوضة وصارت مرتة