الفصل الحادى عشر
بعد العشا محمد جاب المأذون وراح شقة كامل والد لى لى وكان موجود هناك ابراهيم المحامى وكامل واخوه محمود وابنه عماد ولى لى طبعا
دخل محمد والمأذون وبدأ الماذون يتكلم وينصح الطرفين بالتأنى وانه ابغض الحلال وان فيه اولاد لازم يفكروا فيهم
وبعد ما لقى ان مفيش استجابه سكت
واتكلم ابراهيم ..: دلوقتى يا استاذ محمد مدام لى لى كلمت حضرتك واتفقتوا على التفاصيل ... بالنسبه للاولاد هيكونوا معاها بموجب موافقه كتابيه من حضرتك وانه مش من حقك تطالب بيهم فى اى وقت كان وانه من حق حضرتك تشوفهم يومين كل اسبوع
وفى كمان ورقة تنازل الباشمهندسه عن كافة مستحقاتها من مؤخر ونفقه وقائمه منقولات ... يعنى ابراء ذمة لحضرتك من كافة مستحقاتها
واخيرا فيه اتفاق حضرتك هتمضى عليه خاص بمصاريف الاولاد وده هيكون بنسبة من الدخل الشهرى بما يعادى 40 % من الدخل
انا كده خلصت وحضرتك لو فيه اى ملاحظات تحب نضيفها
محمد سكت شويه وهو باصص لـ لى لى ..: لا معنديش ملاحظات الظاهر الباشمهندسه فكرت فى كل حاجه تمام قوي
مضى محمد على الورق .... وخلص المأذون و مضت لى لى على قسيمة الطلاق وخرج المأذون
لى لى اتكلمت مع محمد : كنت عاوزاك تتكلم مع الأولاد وتطمنهم انك معاهم وجنبهم ولو احتاجولك فى اى حاجه هيلقوك
هز دماغه محمد ووافق يتكلم مع الولاد
دخل الغرفة اللى فيها اولاده ... لقى ريان قاعد وحاطط دماغه بين ايديه .... واسيا قاعده وحاطه ايديها على خدها
محمد : السلام عليكم ...رفع ريان راسه وبص لباباه نظرة كلها لوم ومعناها انت السبب وانت اللى عملت فينا كده
واسيا راحت سلمت على باباها وباسته
محمد : ايه يا ريان مش هتسلم عليا ... انت لسه زعلان منى
خلاص معنتش هضربك تانى ... انا اتعلمت من بعدكم عنى ... بس مش عاوزكم تزعلوا منى انت عارف انا بحبك قد ايه ومهما حصل مش هبعد عنكم هافضل اتصل اسأل عليكم ووقت ماتحتاجونى هتلقونى موجود وكل اسبوع هاخدكم تقعدوا معايا يومين
يعنى مش هنبعد عن بعض ... لسه زعلانين
ريان وقف وراح سلم على باباه ... راح شده محمد من ايده واخده فى حضنه وبكى ..انا اسف يا ريان متزعلش منى انا عرفت قيمتك لما ضعت منى
ياريت تنسى القسوة اللى شفتها منى وتفتكر انى بحبك اكترحد فى الدنيا دى
انت واختك روحى وحياتى كلها
أنت تقرأ
جحيم الحب
Romanceهل الحب بعد الاربعين مسموح به هل من حقى ان احب بعد هذا السن كرم : ليه تحرمينى منك لي لى : علشان مينفعش يا كرم انا خلاص كبرت واولادى كبروا
