جحيم الحب

الفصل الثالث

الفصل الثالث

لى لى محتارة ومش عارفة تقول ايه او تعمل ايه وكرم بيبصلها ومستنى ردها

لى لى : تمام يا باشمهندس ادينى فرصة افكر واشوف ظروفى

كرم قرب منها وهو باصص فى عيونها ... وقال لها وصوته كله شجن : بس وانتى بتفكري ابعدى موضوع انك تسيبي الشغل ده من تفكيرك لانى انا مش هسمح انك تبعدى عنى .... قصدى عن الشركة يعنى

لى لى خدودها احمرت من الكسوف ووشها سخن وعرقت ( هو فيه ايه ... هو بيبصلى كده ليه ... وانا مالى اتلخبت كده ... لا اجمدى يا لى لى )

لى لى : تمام يا باشمهندس هبلغ حضرتك ردى فى اسرع وقت بعد اذن حضرتك

وسابته قبل مايرد عليها وخرجت بسرعه

كرم ( ايه ده هو فيه كده ... لسه فيه حد بيتكسف ووشه يحمر )

خرجت لى لى من عنده وهى متلخبطة وحالتها حاله ركبت التاكسى فى طريقها للبيت

لى لى سرحانه ( هو سليم كان عنده حق ولا ايه ... الراجل ده عاوز منى ايه بالظبط .. طيب مهو الباشمهندس سليم اكفأ منى ..ليه مفكرش ينقله .. وايه حكايه مش هسيبك تبعدى عنى ..لااااه ان لازم ارفض حتى لو هستقيل .. كده اضمن ايوه ..خلاص انا هستقيل وادور على شغل تانى )

خرج كرم من الشركة وروح على بيته وهو فى السيارة ( انا شكلى عكيت .. وشكلها هتخاف منى وتهرب .. طيب ايه الحل ...انا هستنى اشوف قرارها وبعدين اتصرف )

دخل كرم الفيلا وجدت امه وزوجته قاعدين فى الصالون سلم عليهم وباس ايد امه

كرم : ازيك يا امى عامله ايه النهارده كويسه

صفية : الحمد لله يا حبيبي طول ما انت بخير انا بخير ( صفيه شخصيه طيبه جدا وفى حالها وبتحب كرم جدا وليها بنت كمان( رباب) مسافرة مع زوجها فرنسا وعندها ولدين كرم وادهم )

كرم وجه كلامه لزوجته : ازيك يا سلمى

سلمى : كويسه

كرم : ايه مالك بتردى كده من غير نفس

سلمى : وايه اللى يجيب النفس فى العيشه دى

كرم : ومالها عيشتك يا سلمى .. انت عايشه عيشه محدش يحلم بيها

سلمى : انت عارف كويس وبلاش افسر اكتر من كده .... وسابته ومشيت ( سلمى زوجت كرم وبنت عمه 35 سنه ... شخصيه انانيه وحقوده ومنكده عليه عيشته ليل ونهار علشان موضوع الخلفه ده )

كرم : عاجبك كده يا امى ... انا خيرتها اكتر من مرة انى اطلقها واسيبها تشوف نصيبها مع حد تانى وهى اللى بترفض

صفيه : معلش يا حبيبي هى بتحبك ومش قادرة تبعد عنك

كرم : بتحبنى ..ههههه .. ضحكتينى يا امى .. سلمى بتحب فلوسي والعيشه المرتاحه بتحسبها صح لو سابتنى ممكن متلاقيش اللى يعيشها العيشه دى ... وبعدين مفيش واحدة بتحب واحد وكل دقيقة تجرحه وتعايره بموضوع الخلفه ده