جحيم الحب

الفصل الرابع عشر

الفصل الرابع عشر

لى لى اتفاجإت من سؤال صفيه ... هى ازاى عرفت انى اتطلقت .... الولاد هما اللى قالوا ...بس لا لا انا ولادى مبيتكلموش مع حد غريب فى خصوصياتنا ... حمزة ...اكيد حمزة عرف من ابراهيم وهو اللى قال لعادل

صفية : ايه هو السؤال صعب قوى كده ومحتاج التفكير ده كله

لى لى : لا مش صعب ولا حاجه ... بس استغربت ان حضرتك عارفه ..وانا يعنى مبقاليش 48 ساعة منفصلة ..دا انا حتى اخواتى لسه ميعرفوش

صفية : يا حبيبتى مفيش حاجه بتستخبى ... وخصوصا موضوع الطلاق ده ...لازم الناس تعرف علشان يعنى لو حد بيفكر يتجوز وشايفك مناسبه ليه يتقدم

لى لى ( هى بتلمح لحاجه دى ولا ايه ): بس حضرتك الموضوع ده للبنات الصغيرين لسه ... بس انا خلاص اخدت نصيبي الحمد لله ... وعندى اولادي بالدنيا ومبفكرش اكرر التجربه تانى .. انا كده مرتاحه

صفيه : يعنى لو لقيتى واحد بيحبك ودايب فيك وبيموت فى اولادك وهيساعدك فى تربيتهم وهيريحك ماديا ... ايه المانع

لى لى : اولا كلام حضرتك ده سابق لاونه جدا ... زى ما قولت لك انا لسه منفصله عن زوجى من يومين ...انا مكنتش بانفصل عنه علشان اغيره بواحد تانى

ثانيا انا مش ممكن هدخل راجل غريب على اولادى لاى سبب حتى لو روحى فيه ..انا ابنى راجل ازاى هيقبل راجل غريب فى حياة مامته ولا انا هقبل راجل غريب يقعد مع بنتى وتنكشف عليه

ثالثا وده الاهم ..انا زوجى راجل كويس جدا بس اختلفنا فى طريقة تربيتنا للاولاد ... يعنى هو ده السبب بس .. لو فيه راجل تانى اعتقد انى ارجع له هو اولى

صفيه : كل ده ... انا مش اقصد حاجه يا حبيبتى ... انا بدردش معاكى بس

صفيه : اصلى لما لقيتك بتتكلمى عن سيف ووشك جاب الوان كده واتلخبطى قولت يعنى ... انه ممكن يكون مهتم بيكى شويتين

لى لى : بصى يا صفيه هانم ... زى ماقولت لحضرتك سيف كان جارنا ومتربيين سوا ...انا واخته كنا اكتر من الاخوات وهو وعمر اخويا كانو بردو مبيفترقوش وبعدين سيف كان خطيبي وكنا كاتبين كتابنا قعدنا سنتين وبعدها انفصلنا وهو سافر.. فعادى ان يبقى فيه حرج فى تعاملى او كلامى معاه

انا قولت لحضرتك كل حاجه بصراحه لانى مبعملش حاجه غلط وعاوزه اخبيها ... بس بردو من حقى خصوصياتى احتفظ بيها لنفسي ...

كرم سمع كل الحوار اللى دار بين لى لى ووالدته .... وكل كلمه كانت بتبعدها عنه .. لحد كلامها عن سيف وانه كان كاتب كتابها ومقدرش وفتح عينيه كانو زى الدم من الغضب اللى جواهم

كرم : لى لى ...اهلا وسهلا

لى لى وقفت وبصت له ورجعت بصت فى الارض : حضرتك اللى دفعت تكاليف المستشفى؟