جحيم الحب

الفصل الثامن والعشرو ن

الفصل الثامن و العشرون

وصل الجميع لمدينه شرم الشيخ ... كرم كان حاجز لهم فى قرية مميزة جدا ... عبارة عن شاليهات على البحر ... فيه ثنائي ورباعى

هو و لى لى فى شاليه ... كامل وريان شاليه ... صفيه وحنان و اسيا شاليه ... بس كلهم جنب بعض ... دخل كل واحد الشاليه بتاعه علشان يغيروا هدومهم ويرتاحوا شويه من السفر و اتفقوا يتجمعوا بعد ساعتين علشان يبدأوا البرنامج

كامل : الله المنظر جميل جدا سبحان الله ... بقه الجمال ده كله موجود فى بلدنا واحنا مشفنهوش قبل كده

ريان : فعلا يا جدو المكان كله تحفه ... عمو كرم اختار مكان جديد وجميل

كامل : يلا يا ريان يا حبيبي ... خد لك حمام وغير هدومك علشان ادخل بعدك ...لقوا الباب بيخبط ودخلت لى لى .

لى لى : ايه يا جماعه الاخبار المكان عجبكم

كامل : عجبنا جدا يا حبيبتى

ريان : تحفه يا ماما ... عجبنى انا كمان جدا

كامل : ايه يا حبيبتى سيبتى جوزك وجيتى ورانا ليه

لى لى : جيت ارتب لكم هدومكم فى الدولاب يا بابا واشوفكم عاوزين حاجه

كامل : احنا هنتصرف يا حبيبتى ... روحى انتى لجوزك

لى لى بدأت فعلا تفتح الشنط وتطلع الهدوم ... : هنساعد بعض يا حبيبي ... يلا يا ريان خد منى ورتبها فى الدولاب .... وحضرتك يا بابا يلا على الحمام وانا هجهز لحضرتك الهدوم

كامل بص بنظرة امتنان لابنته : ماشى يا لولو اللى تشوفيه ... ودخل فعلا على الحمام ... وكملت لى لى وريان ترتيب الهدوم

خرج كامل كانت لى لى شبه خلصت وفاضل بس رفايع بسيطه : ادخل يا ريكو يا حبيبي انت وخد الحاجات دى معاك حطها فى الحمام وانا طلعت لك الهدوم

ريان : ماشى يا ماما .... ودخل ياخد حمام ....

لى لى : خلاص كده يا بابا كله تمام ... هروح انا ل كرم علشان ارتب حاجاتنا احنا كمان ... عاوزين حاجه تانيه

كامل : شكرا يا حبيبتى .. ربنا يسعد انتى وجوزك

دخلت لى لى الغرفه لقت كرم قاعد ومبوز ... راحت حضناه من ظهره وحطت راسها على كتفه واتكلمت جنب ودنه

لى لى : ماله حبيب قلبى زعلان ليه ... كل ده علشان قولت لك هروح ارتب لبابا وريان الهدوم واجيلك

كرم : يا لى لى انا عاوز الولاد يعتمدوا على نفسهم مش كل حاجه تعمليها لهم انتى ... وبعدين احنا جايين رحلة شهر العسل ... يعنى انتى معايا انا الاول وبعدين الباقيين...