جحيم الحب

الفصل التاسع والعشرون

الفصل التاسع والعشرون

انتهى اسبوع العسل وعاد الجميع لحياتهم العاديه ...

كرم انشغل فى الشركه اللى كان شغلها متعطل بسبب انشغاله بالجواز فى الفترة الاخيره ... والحمل كله كان على عمه طاهر  .... لى لى بدأت تتعرف على حماتها ويقضوا الوقت مع بعض ... وتراعى اولادها ... ومتطلباتهم ... وتاخد بالها من كرم واحتياجاته

ريان ركز فى اختراعاته وقراءاته ... اللى كان كرم بيساعده فيها كل ما كان بيلاقى وقت ... اسيا بدأت تتعرف على اصدقاء جدد فى النادى وحبت حياتها الجديده جدا ...

كرم رجع البيت هلكان طول النهار اجتماعات ومقابلات .... كان نفسه ينام جدا

لى لى : الحمد لله على السلامه يا حبيبي ... دقايق ويكون الاكل جاهز ... خد حمام وغير هدومك وانا هنزل اخليهم يجهزو السفرة

كرم حضن لى لى وباس جبينها : مش قادر يا حبيبي اكل والله... عاوز اناااام ... تعبان جدا ...

لى لى بحزن كده حاولت تداريه : ماشى يا حبيبي زى ما تحب انا جهزت لك هدومك خد حمام وغير ونام ... وانا هنزل علشان احضر السفرة للباقيين

كرم بزعل : انتوا بتستنونى ليه يا لولو انا قايل لك مش تستنونى على الاكل .. ليه تعذبى الناس معاكى

لى لى بصت فى الارض وبحزن واضح : خلاص يا كرم مش هنستناك تانى متزعلش ... اعتبرها غلطه ومش هتتكرر

وسابت الغرفه وخرجت ودموعها نزلت غصب عنها ...حاولت تمسح دموعها قبل ما تنزل علشان محدش ياخد باله

وجهزوا السفرة وصفيه كانت مستنيه كرم

صفيه : فين كرم يا لى لى .. الاكل هيبرد احنا جوعنا

لى لى : لا يا ماما اتفضلى هناكل احنا هو تعبان مش قادر ياكل وعاوز ينام... وبعد كده نبقى ناكل احنا ولما ييجى كرم يبقى ياكل

صفيه : ده احنا مش بنشوفه ونقعد معاه الا على الاكل .... كمان مش هياكل معانا

لى لى : لا يا ماما ازاى هياكل معانا .. بس انهارده هو تعب فى الشغل وعاوز يستريح

صفيه : ماشى يا بنتى يلا الاولاد فين ...

لى لى : قالو مش جعانين ... واكلو فى النادى

صفيه : ههههه ...يعنى صفصفت على انا وانتى يا لولتى ... واحلى صحبه ... سيبك منهم ... انا وانتى مالناش غير بعض

كرم رد عليها : لا انا كده بدأت اقلق انتى بتثبتى مراتى قدامى .... انا بغير على فكره ... وبعدين فين طبقى ... انا جعان وعاوز اكل

لى لى قامت من غير ما تبص لكرم ولا ترد عليه جابت له طبق من المطبخ وحطته قدامه

كرم بص على لى لى وهو عارف انها زعلانه منه وليها حق ... هو مقصر فى حقها وحق الاولاد ومامته اليومين دول