لكل شخص نفسه يلتزم ومش عارف يبتديها إزاي مع ربنا ..
ركز معايا في البوست ده ومجرد م تقرأه خد القرار فوراً وابتدي نفذ الخطوات .. 🌸
مبدأيا لازم نعرف إن طريق ربنا الوصول ليه مش صعب أبداً ، لكن الثبات هو اللي محتاج منك مجاهدة نفس وصبر كبير .
ندخل بقى على خطوات الإلتزام :
- أول حاجه تبدأ بيها طريقك لربنا هي " قلبك "
قال رسول الله صلى الله عليه وسلم :(ألا و إن في الجسد مضغة إذا صلحت صلح الجسد كله، وإذا فسدت فسد الجسد كله، ألا وهي القلب)
قلبك هو الأساس ، لو أصلحته هينصلح حالك بإذن الله .
فأول حاجه تعملها .. نظف قلبك بكثرة الإستغفار .
اعمل ورد إستغفار يومي ليك ، واستغفر كتير جدا ، صدقني هتلاقي قلبك إنشرح من جديد .
- تاني حاجه إبدأ عهد جديد مع الله بركعتين توبه ، إبدا من النهارده مجرد م تخلص قراءة البوست ده قوم فورا وصلي ركعتين بنية التوبه وطول جامد في السجود وابكي واتضرع لله وقوله يارب انا رجعت ليك اقبلني ، يارب انا خلاص نويت اقرب منك فأعني وثبتني .
- إبدأ بقي خدها مع نفسك واحده بواحده ..
هنبدأ بأهم عباده واول حاجه هتتسأل عنها في قبرك وهي " الصلاه " .
• فيه منكم اللي الحمد لله بيصلي ، لكن مبيحسش بمعنى الصلاه ، مبيحسش بمعني قول الرسول " أرحنا بها يا بلال " .. صلاته عباره عن حركات رياضيه بيقوم ويقعد زي الآله مش حاسس بحاجه .
فاللي هتعمله انك هتبدأ تصلح الأمر ده .. تأنّى في صلاتك ، صفي ذهنك تماما قبل الإقبال عليها ، استشعر انت واقف دلوقتي قدام مين ، قدام مالك الكون كله وخالقك .
اقرأ بهدوء واستشعر معنى كل كلمه بتقولها ، وتخيل انك في حوار متبادل بينك وبين الله عز وجل .
• الجانب الآخر : الناس اللي منقطعه عن الصلاة تماما او اللي بتصلي وتقطع .
• لازم تعرف ان الصلاة أمر مينفعش التهاون بيه تماما ، دي أول حاجه هتتحاسب عليها ف قبرك .
ابدأ من النهارده اعمل جدول متابعه ليك وخدها تحدي مع نفسك .. انا الأسبوع ده مش هضيع ولا اي فرض .
وابدأ اعمل منبه ليك بميعاد كل صلاة على موبايلك ، افرش سجادة صلاة في اكتر مكان انت بتقعد فيه ومتشلهاش ، من اول م تصحى من نومك خليك ع وضوء طول اليوم ده هيشجعك .
وأهم حاجه انك متيأسش طبيعي هيجي وقت وتنقطع تاني .. لانك ف حرب مستمره مع نفسك والشيطان .
بس انت عليك بمجاهدة النفس ، مهما وقعت قوم تاني متستناش ، وخلي الآيه دي قدام عينك في كل وقت " والذين جاهدوا فينا لنهدينهم سبلنا "
= بعد فتره من المواظبه علي الصلاه ، وقت م تحس نفسك خلاص مستعد انك تضيف ليومك عبادات تانيه وروحك متعطشه لـ ده .. ابدأ ضيف لصلاتك السُنن ، واذكار الصباح والمساء ، وقيام الليل ، والفجر .
- ندخل بقى علي الخطوه التانيه ..
الصُحبه ثم الصُحبه ، زي م احنا عارفين وحافظين ان الصاحب ساحب .. يعني لو صاحبك كويس هيسحبك لطريق الخير ، ولو العكس مهما كنت كويس هتلاقي نفسك بتتجر معاه لطرق انت مش حاببها .
عشان كده لو شايف ان صحبتك مش معينه ليك على الخير او بتشجعك دايما للمعاصي ، وبتتكسف تعمل قدامهم طاعه ..
اوعا تفكر ابعد عنهم فوراً ، حتى لو هتكون لوحدك ايه المشكله .. مش أحسن م تيجي يوم القيامه وتندم !
" " ياويلتى ليتني لم أتخذ فلانا خليلا ، لقد أضلني عن الذكر بعد إذ جاءني وكان الشيطان للإنسان خذولا " 💔 !
والشيطان هنا المقصود بيها أي شخص بيضلك عن طريق ربنا ، فأحسنوا إختيار الصحبه .
