معيد بيقول نزلت اتمشى شويه في حرم الجامعه ، لقيت طالب بيقولي ممكن حضرتك ناخد البريك وقت الصلاة ..
كان اول مرة اسمع الطلب ده و وافقت لانه قريب من وقت البريك اللى انا محدده..
مرة بعد مرة حبيت الولد ده جدا هو واتنين صحابه
وسننا كان لسة قريب جدا من بعض ..
عجبنى جدا روحهم الحلوه وابتسامتهم.. على طول
بقيت فى البريك بنزل اصلى معاهم و نرجع المحاضره ..
فى اخر الترم واحد منهم جه قالى اطلع معانا عمره ، حبيت الفكرة وقولتله اشطا ، قالي بس هنطلع برى !
قولتله ليه كده.. مفيش طيران؟
قالى فيه بس احنا هناخدها رحلة نستمتع بالصحبة
والثواب باذن الله اكبر !
بصراحة انا مكنتش فاهم صحبة ايه و احنا رايحين عمره.. ايه هنقعد فى الاتوبيس نغنى و نرقص ونعمل مقالب فى بعض ونلعب افلام يعنى وننزل المية
على ما العبارة تيجى مثلا؟
المهم وافقت
ركبنا الاتوبيس بعد شوية واحد مسك الميكروفون وعرفنا بنفسه بعدين قال انشوده وكان صوته تحفه ...
بعدها كذا واحد يطلع يعرفنا بنفسه .. اللى قرا قران واللى قال اذكار واللى هزر شويه واللى بص على الجبال
وقالنا "خواطر" لما بيتامل فى خلق الله !
انا كنت قاعد مش فاهم
ايه ده فين التسقيف والرقص طيب ؟
كنت بتفرج على اللى بيتكلم وعلى الناس اللى قاعدين كلهم كنت مستغرب نفسى وسط الناس دى .. بس مش عارف ليه كنت حاسس انى مبسوط جدا..
وصلنا الميناء قبل العباره صاحبى خدنى يعرفنى على واحد قاعد على الارض مع سواق الاتوبيس واتنين كمان بياكلوا قاللى ده صاحب شركة السياحة اللى طالعين معاها !!
استغربت وقولتله هو مطلعش مع رحلة الطيران؟ قالي لا هو بيحب يطلع البرى علشان لو الناس احتاجوا حاجة ..
مش هاعرف اقول حسيت بإيه ولا الراجل ده بابتسامته
وتواضعه اثر فيا ازاى ...
ركبنا العباره.. لا الكباين صالحة للنوم ولا السطح ينفع حتى نفرد ظهرنا عليه لان كان فيه طبقة غريبة لزجة شوية مغطية السطح كنا بنعانى حرفيا.. بس الناس دى فى كوكب تانى
بيتكلموا و يضحكوا و يهزروا.!
واحد مره واحده بص للسما وقال بصوت عالي :
"احنا متبهدلين اهو ، مش عارفين نمدد جسمنا حتى ، كان ممكن نطلع طيارة ، الثواب يا رب !"
انا لسه فى حالة اللاوعى اللى انا فيها.. حاجات كتير مش مستوعبها و لا شوفتها قبل كده
هو بيكلم ربنا ؟ بحب كده ؟ بهزار محترم اوي كده ؟
بردو كانت لحظة غريبة عليا جدا..
وصلنا بعد يومين معاناه تامه.. دخلنا فندق المدينة بعد نص الليل.. طبعاً جريت على السرير هاموت وانام
لقيت صاحبى بيقوللى ياللا ! ياللا ايه ؟
ننزل نسلم على الرسول ونصلى قيام عند الحرم !!!
يا عم انت مش طبيعى انا هنام شويه علشان افوق كده وبعدين اعمل كل ده.. انزلوا انتو..
فعلاً نزلوا هما وانا نمت..
كنت تقريبا بقعد فى الاوضه لوحدى كل فتره
يرجعوا يناموا ساعه ولا اتنين وينزلوا الحرم يكملوا !!
صاحبى ده كان نايم مره .. سمعت صوت بصيتله
لقيته فى سابع نومه بيتكلم وهو نايم بيقول:
لا يا " عمر"... "ابو بكر" ذهب الى ....!!!
انت بتحلم بايه ياعم انت ؟ انت بتكلم مين طيب ؟
بالله عليك دخلنى معاك فى الحلم ده يا اخى !
واحنا فى الحرم قبل الصلاه واحد منهم قال:
النهارده اخر يوم فى المدينه والامام ده بعشق صوته
يا رب يقرا سورة الرحمن .. ابتدينا الصلاة و بعد الفاتحة
بدأ الامام:
" الرحمن .. علم القران..." !!!
انا فى اللحظة دى بكيت.. بكيت على نفسى جدًا..🥺💙
هما ازاى الشباب دول كده! هما ازاى وصلوا لكده مع ربنا ؟
ازاى ربنا مراضيهم كده والفرحه وابتسامة الرضا
مش بتروح من على وشهم كده!
طب هو ليه انا مكانش صحابى زى دول ؟
كانت حاجات كتير اوي اتغيرت!
انا كنت فاكر إنى عايش كويس ومبسوط ..
بس معاهم فهمت الفرق بين انى "اعيش" و انى "احيا"
" مَنْ عَمِلَ صَالِحًا مِّن ذَكَرٍ أَوْ أُنثَىٰ وَهُوَ مُؤْمِنٌ فَلَنُحْيِيَنَّهُ حَيَاةً طَيِّبَةً ۖ وَلَنَجْزِيَنَّهُمْ أَجْرَهُم بِأَحْسَنِ مَا كَانُوا يَعْمَلُونَ " .
" وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكًا ..."💙
