"كل ما يخص سُنن الخمس فروض،الشفع،الوتر،قيام الليل والتهجد"
بسم الله توكلنا على الله..صلوا على الحبيب
أولا {سُنن الخمس فروض}🌸:
_الفجر هتصلي قبله ركعتين "سُنة عن الحبيب صلى الله عليه وسلم انه كان بيقرأ فى سُنة الفجر..الركعة الاولى سورة الكافرون والركعة التانية سورة الإخلاص"
_الظهر هتصلي قبله أربع ركعات "ركعتين وتسلمي وبعدين ركعتين وتسلمي"
وبعد الظهر هتصلي ركعتين
ولو عايزة تزودي الأجر هتصلي قبل الظهر اربع ركعات كل ركعتين لوحدهم وبعد الظهر اربع ركعات كل ركعتين لوحدهم وذلك لحديث النبي صلى الله عليه وسلم {مَنْ صَلَّى أَرْبَعًا قَبْلَ الظُّهْرِ وَأَرْبَعًا بَعْدَهَا لَمْ تَمَسَّهُ النَّارُ}
_العصر ملوش سُنة مؤكدة لكن في حديث صحيح للرسول صلى الله عليه وسلم {رَحِمَ اللَّهُ امْرَأً صَلَّى قَبْلَ الْعَصْرِ أَرْبَعًا}..
فلو مش عايزة تصلي قبله سُنة تمام عادي..لكن الأفضل طبعا لو صليتي قبله أربع ركعات ركعتين لوحدهم وركعتين لوحدهم علشان بإذن الله ربنا يرحمك برحمته
_المغرب بعده ركعتين "سُنة عن الحبيب صلى الله عليه وسلم انه كان بيقرأ فى سُنة المغرب..الركعة الاولى سورة الكافرون والركعة التانية سورة الإخلاص"
_العشاء بعدها ركعتين
ثانيًا {الشفع والوتر}🌸:
الشفع بيبقى أصلا من ضمن قيام الليل وهو الركعتين اللي قبل الوتر على طول ومفيش دليل على إنك لازم تصليه بعد العشاء..وصلاة الشفع حاجة وصلاة سُنة العشاء حاجة تانية..
ودا الدليل من الشيخ المنجد👇🌸
بعض الناس يظن أن الشفع هو سنة العشاء البعدية ، وليس الأمر كذلك إنما سنة العشاء البعدية وهي ركعتان ، خلاف الشفع والوتر
روى ابن حبان عن ابن عمر رضي الله عنهما أنه كان يفصل بين شفعه ووتره بتسليمة ، وأخبر أن النبي صلى الله عليه وسلم كان يفعل ذلك . قال الحافظ في الفتح (2/482) : إسناده قوي .
وهذا الحديث يدل على أن المراد بالشفع الركعتان قبل ركعة الوتر
وكَانَ رَسُولُ اللَّهِ صَلَّى اللَّهُ عَلَيْهِ وَسَلَّمَ يَقْرَأُ فِي الْوِتْرِ بِسَبِّحْ اسْمَ رَبِّكَ الأَعْلَى وَقُلْ يَا أَيُّهَا الْكَافِرُونَ وَقُلْ هُوَ اللَّهُ أَحَدٌ ) .
صححه الألباني في صحيح النسائي
"قيام الليل والتهجد"🌸:
هم نفس الصلاة لكن الناس اللي عايزة تعرف الفرق الدقيق بينهم فصلوا على النبي بقى وركزوا معايا كويس علشان محدش يتوه مني
بصي قيام الليل دا معناه انك بتخصصي جزء من الليل وليكن ساعة مثلا تصلي بقى وتقرأي قرآن وتذكري الله وهكذا..
وبيبقى فى أي وقت من الليل من بعد العشاء لحد قبل الفجر
أما التهجد بيبقى خاص بالصلاة فقط..
وبعض العلماء قالوا التهجد دا بيطلق على الصلاة اللي بعد النوم والأغلبية قالوا انه عادي فى أي وقت من الليل ومش لازم يكون بعد النوم..
يعني انتِ مثلا نمتي شوية بعد العشاء وبعدين صحيتي وعايزة تصلي فهتنوي انك هتصلي التهجد
وحتى لو منمتيش وعايزة تخصصي ساعة مثلا تقيمي فيها الليل "هتقومي تذكري الله وتقرأي قرآن وتصلي التهجد اللي هو نفسه صلاة قيام الليل اللي احنا عارفينها بالظبط ركعتين وتسلمي وبعدين ركعتين وتسلمي وهكذا"
هي بس مُسميات مختلفة لكن كلهم واحد وقيام الليل بيبقى أعم وأشمل من التهجد لانه شامل صلاة وقراءة قرآن وذِكر الله..
على عكس التهجد بيبقى صلاة فقط
_يعني انا ينفع أقيم الليل بقراءة القرآن فقط؟🌸
أيوة ينفع لكن طبعًا انك تصلي وتتكلمي مع ربنا عز وچل وتدعي بقى وكدة فدا الأفضل جدًا💜
"وما توفيقي إلا بالله العلي العظيم"
