جالي سؤال من بنت بـ تحكي عن نفسها .. انها عملت ذنوب مبتتغفرش زنا و سرقه ب العربي كده غلطت ف حق ربنا كتير اوي !!
فكرتني بـ حاجه كنت سمعتها فـ المسجد قبل كده ..
كان فِى بنت حياتها اتخبطت تخبيط مش طبيعي .. خارجه من بيت أب و أم ملتزمين و كل الناس بـ تشهد بـ أخلاقهم بس دي طلعت كده لـ وحدها .. كانت تكلم الولد ده تسيبه و ترجع تكلم ده و تسيبه و الكلام مكنش مجرد كلام دا كان بـ يوصل لـ تصرفات خارجه و لك ان تتخيل ") .
رغم كلام أهلها ليها الا انها كانت مكمله فـ سكتها .. لحد ما فـ مره والدها من تصرفاتها جاله ذبحه صدريه و برضه مهمهاش !
كانت بتقول علىٰ الرغم من حياة المجون الا انها كان فـ قلبها وجع دايم .. بتقول مكنتش بعرف اقعد من غير راجل فـ حياتي ، لازم يبقىٰ موجود راجل .
بتقول مشتغلتش فـ مكان الا اما سرقته !
و بتقول فـ مره كنت كلمت واحد و سبني و ابتديت ادور علىٰ راجل تاني !
بس قولت لـ نفسي ليه مجربش أعمل زى الناس اللي بـ تلجأ لـ ربنا ..
و هوب هوب انعزلت عن كل الناس و ابتدت تصلي و تستغفر و تداوم علىٰ ورد القرءان و ابتدت تغيّر فـ نفسها كتير .. واحده واحده ابتدا فضولها يقتلها تنزل حلقات علم و أول ما قالت لـ والدتها اتصدمت و تنّحِت بس لَبّتلَها رغبتها و كأنها ما صدقت .. و بتقول أول ما دخلت المسجد سمعت الشيخ بيقول :
{ وَالَّذِينَ إِذَا فَعَلُواْ فَاحِشَةً أَوْ ظَلَمُواْ أَنْفُسَهُمْ ذَكَرُواْ اللّهَ فَاسْتَغْفَرُواْ لِذُنُوبِهِمْ وَمَن يَغْفِرُ الذُّنُوبَ إِلاَّ اللّهُ وَلَمْ يُصِرُّواْ عَلَى مَا فَعَلُواْ وَهُمْ يَعْلَمُونَ } .
راحت قالت فـ نفسها : إزاي اقرب من ربنا و انا بالوحاشه دي !
لقِت الشيخ بـ يقول الحديث ده كأنه بـ يرد عليها :
" إذا تقرب العبد إلىّ شبرًا تقربت إليه ذراعًا ، و إذا تقرب إلىّ ذراعًا تقربت منه باعًا ، و إذا أتاني يمشي أتيته هروله " .
فضلت تبكي و تقول انا جتلك أهو يارب نقيني ..
البنت فضلت تداوم و حفظت كتاب الله كامل .. وبقِت تدرس علم شرعي و ازدادت حلى بعد النقاب و كأنها كـ البدر ..
و اتقدملها شاب كان نِعم الزوج و كانت دايما ترفض عشان كانت بتقول انها مش كويسه و هتظلم اللي هتاخده ! بس الشاب ده تمسك بيها و بـ الفعل وافقت و تزوجوا و قبل الزواج قالها مش مهم كنتِ ازاي المهم بقيتي ايه .. ربنا بيغفر الذنوب كلها ، انا يا عبد يا حقير مش هغفر !
البنت دي ربنا ابتلاها بـ المرض السرطان و كان دايمًا علي لسانها ان الله اذا احب عبدًا ابتلاه 💔
قبل وفاتها كتبت لـ زوجها ورقه بـ اللي ليهم مظلمه .. فضل يحلف انه مرحش لـ حد الا اما يقوله : مسامحها و يدعيلها بـ الرحمه و يتنازل عن مظلمته !
زوجها قال اتشاهدت 7 مرات ..
و كنت لما ابكي تبصلي و تضحك و تمشي ايديها عليا و تقولي انا شايفه مكاني ، أنا عايزه اقابله دلوقتي .. !!
والدها و هو علىٰ فِراش المَوت كان قايلها انا راضي عنك أكتر من أى مخلوق تاني فـ الدنيا "❤
المُغسله قالت دي شهيده ( ماتت مبطونه )
حكت انه أسهل غُسل غسلته فـ حياتها .. و كأنها عروسه من الحور العين ..
وشها اللي كان تعبان رجع كأنها صبيه فـ عمر الزهور ..
اللَّهُم ارزُقنا حٌسن الخاتِمه "❤
فِى حديث لـ النبى صلى الله عليه وسلم بـ يقول قال الله تعالى :
" يا ابن آدم إنك ما دعوتني و رجوتني غفرت لك علىٰ ما كان فيك و لا أبالي ، يا ابن آدم لو بلغت ذنوبك عنان السماء ثم استغفرتني غفرت لك و لا أُبالي ، يا ابن آدم إنك لو أتيتني بـ قراب الأرض خطايا ثُمَ لقيتني لا تُشرِك بي شيئًا لأتيتك بقرُابِها مغفِره " .
قال اللَّه - تعالىٰ - ..
(قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لَا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعاً إِنَّهُ هُوَ الْغَفُورُ الرَّحِيمُ )
و رب الكعبه ملناش حجه !
#استقيموا "❤☝️
