(( باقي علي رمضان ٦ شهور ))
السلف كانوا بيستعدوا لرمضان من الوقت ده!
اكيد اتعلمنا طبعا من خلال الرمضانات اللي فاتت
- إنّ اللي ملوش ورد قرءان بكمية محترمة من دلوقت مش هيعرف يبقاله في رمضان فجأة كدا يعني ، ولو قاوم اول عشر ايام .. للاسف بينتكس فالعشر التانيين ، وان عداهم .. فبيجي علي آخر وأهم عشر ايام وشحنه يخلص! رمضانه بيضيع في اسئلة من نوعية ، هو التدبر اهم ولا التلاوة ، طب التلاوة السريعة ولا المتأنية ، طب اقرأ تفسير ولا اسمع ، وفجأة يلاقي رمضان خلص وهو لسه مشتت .. ويدوب ختم مرة وحدة بالعافية!
- اتعلمنا برضو إنّ اللي ملوش حظ من صيام التطوع مع المجاهدة في القيام بالعبادة من قبل رمضان ، بيجي في رمضان مش قادر يقوم يصلي الفرائض وهو صايم ، مش قادر يقرأ قرءان وهو صايم ، مش قادر يحرك لسانه ويذكر الله وهو صايم ،، مش قادرة تساعد والدتها فالفطار عشان صايمة ، وبعد الفطار مش قادرين تصلوا التراويح والقيام!
- اتعلمنا ان رمضان مش وقت التدريب والتسخين ، رمضان هو الماتش النهائي اللي لازمه معكسر تدريب كامل قبله ،، والا هيجيلكم شد عضل في نص الماتش علي رأي د. حازم!
- اللي ملوش ورد سماع للدروس الإيمانية ، ومبيعرفش ايه الطرق اللي بتجدد ايمانه وتُحيي قلبه، ولما يجيله فتور مبيعرفش يتصرف ازاي ، ده بيجي بعد اول عشر أيام في رمضان ، مع أول ذنب .. او اول تقصير ،، او الايمان ينقص عنده والهمة تقل .. علي ما يقعد يجري بقا يسأل الشيخ الفلاني ، وهي تسأل الأخت الفلانية ، ويدوروا علي دروس ترجع همتهم بيبصوا يلاقوا رمضان خلص خلاص!
وكتير من الخبرات اكتسبناها من خلاص الرمضانات اللي عدت علينا
فعشان كدا يا جماعة ، بالله نبدأ من دلوقت ننظم نفسنا وجداولنا ودروسنا
خاصة ان غالبا رمضان السنة دي جاي في وقت دراسة او امتحانات!
- نبدأ في ورد التفسير ، يدوب يلحق يخلص
- نبدأ في سلاسل دروس ايمانية تعلّي همتنا وتشحنّا ايمانيا
- نبدأ في ورد التلاوة ، ونعود نفسنا نختم مرتين فالشهر مثلا
- نبدأ نعود لساننا علي الذكر الكتير جدًا
- نبدأ نصوم تطوع ، لو حتي اتنين وخميس ،
( او اي ايام فالاسبوع حسب اللي يناسبكم )
- نبدأ نقرأ كتب الشيخ يعقوب ، والشيخ خالد ابو شادي عن رمضان
- د. حازم عامل كمية سلاسل عن رمضان يدوب تلحق تخلص فالفترة دي!
- نشوف من دلوقت ، مين صحابنا اللي هيدخلوا معانا فترة المعسكر دي ،، وهيبقوا معانا في الماتش النهائي بعد كدا .. مين اللي هنتنافس معاه علي الختمات ، مين هيعتكف معانا ، مين هيصلي التراويح معانا وهكذا .
قدامكم مساحة دلوقت للوقوع ، والفتور ، وتجديد الايمان ، انما في رمضان مفيش وقت!
واخيرا .. الله عزوجل كريم ، ويُجازي علي العمل القليل الأجر الكثير
يشكر لنا نوايانا ، وحسن استعدادنا ، وإقبالنا عليه
فلما يرانا من دلوقت مُقبلين عليه ، وبنستعد بصدق ولو بالقليل
ان قبض روحنا قبل رمضان ، هيكتب لنا بإذن الله أجر رمضان كاملا في ميزاننا !☀️تخيلوا تصلوا قيام رمضان الجاي ، من حفظكم للقرءآن غيبًا !
تخيلوا العظمة اللي هتحسوا بيها وانتم بتصلوا التروايح ورا الإمام وعارفين هو بيقرأ سورة ايه ، واي وجه من السورة ، وأي ربع !
تخيلوا فرحتكم وانتم داخلين رمضان حافظين القرءان كامل فتقرؤا الوجه اللي تحبوه ، فالوقت اللي تحبوه !
تخيلوا تعملوا ختمات كتير للقرءان تلاوة قبل رمضان فيجي رمضان وانتم مستشعرين أغلب الآيات ، ومرت قبل كدا كتير علي قلوبكم !
قدامكم ٦ شهور لسه علي رمضان
تقدروا تكملوا حفظكم اللي توقفتوا عنده
والناس اللي حافظة قدامها ألف فرصة
تراجع حفظها وتتقن ،، وتقرأ تفسير وتسمع !
قدامكم ألف فرصة تختموه تلاوة مرة واتنين وعشرة
مستكتروش وقتكم علي القرءان ، مستكتروش جهدكم عليه !
فـ والله ما من خير وبركة وفتح .. في حياة حفظته ، او المتعلقين به
الا وكان سببه القرءان ، ووقتهم مع القرءان ، وحبهم للقرءان .لآزٍمٍ نستعد م̷ـــِْن دلوقتي يا حوريات ننتظم علي حاجات كتيره قبل رمضان علشان اللي متعودتش تتعود 🍀☘️🌸🌺
