انا رايحة فى اتجاه وحش اوى !
وحش اوى ليه بتقولى كدة يا بنتى ؟!
العبادة بقيت حاسة بفتور فيها جامد.. عارفة كنت زمان اقف اصلى القيام كدة مبحسش بنفسي و ممكن اقعد ساعة اصلى .. دلوقتى مش بصلى قيام خالص ..نفس الكلام على القراءن و باقى العبادات
طيب بصي لو انتى متخيلة ان الانسان بيفضل على مستوى ايمان واحد تبقى غلطانة جدا !
الاصل ان الايمان بيزيد و ينقص ..شوية طالع و شوية نازل
»
يعنى قصدك ايه ؟!
قصدى انك ممكن فى يوم تبقى حابة اوووى تحفظى قراءن و تصلى قيام و تسمعى دروس دين و الصلاة كدة تكونى حاسة فيها بخشوع و دموعك تنزل مع بداية الصلاة .. و يوم تانى تكونى بتصلى و مش حاسة بخشوع اوى
طيب اعمل ايه ؟
بداية كدة تكونى مستوعبة ان دا طبيعى ل اى بنى ادم ..بس اللى مش طبيعى انك تكملى في الفترة لدرجة ان للاسف الثوابت بتاعتك تروح !
يعنى فى حاجات كدة اساسية مينفعش تقولى اصل عندى فتور !
زى الصلاة الخمسة فى وقتها
القيام حتى لو بركعة واحدة وتر
ذكر الله حتى ربع ساعة فى اليوم قسميها زى ما تحبى
قراءة من القراءن حتى لو نص صفحة
ابن القيم بيقول حاجة حلوة جداً ان الفترة دى المفروض تكون استراحة مقاتل لا نومة غافل
المقاتل بعد الحرب كدة بيريح شوية من المعركة .. بس وقت المعركة الجاية بيقوم و يقاتل بردوا مش بيفضل نايم و قاعد لحد ما يجوا يقتلوه هما
استغلى الفترة اللى قلبك بيكون مقبل فيها على طاعة و اعملى قد ما تقدرى و وقت الفتور اعملى الحاجات الاساسية اللى قولنا عليها فوق
متخلوش الشيطان يدخل لكوا من المدخل دا و يقولك ايه ريحتى خلاص بقى مبقتيش نافعة !فا مرة على مرة يخليكى تسيبى ثوابتك و المبرر اصل انا عندى فتور ! دا مش هينفع
ربنا يرزقنا جميعا الثبات و القوة الوعى الكافى للتغلب على الشيطان💜
#علاج_الفتور
