رواية #مات_الكلام🥀
( خيال ممزوج بلواقع )
للكاتبة #نادرة
الرواية بلهجة الليبية
حلقة 1🔥
.
ليا ثلاثه أيام في ثلاجة الموتى .. روحي تتعذب .. و أجراءت الدفن مازالت مطوله ..
و كأن الله عز و جل يبيني نتفكر شن كنت ندير 🤷🏻♀️ ..
ماهو الدفن يبرد القلب .. و أنا قلبي نار تقدح فيه .. مرات نحس إني كنت في غفله ..
ليش ما فيش حد نصحني !
ليش ما فيش حد قالي اوقفي 🤚🏻 حدك هنا .. و فيقي لي تصرفاتك ..
من نلوم ؟
نلومك انتي ؟ ...
أيه أنتي ..
كنتي تشوفي في تصرفاتي و تحطي في علامات أستفهام ؟ و تحكي من وراي عليا ..
ياريتك جيتي حكيتيني ..
ما كنتش خسرت روحي 💔
تعرفي شن نحس ؟
نقعد نتأمل فيك .. و نقول ليش الروح جت في جسدي أنا !!
ليش ما جيتش أنتي ؟
ليش أنا الي نتنفس توا ؟
نغمض عيوني .. نتأمل .. ناخد نفس .. نفصل في روحي عن جسدي .. يتعمق التأمل .. تتسع دائرتي .. نحس بطاقه .. بموجه مشاعر تحتويني .. تلامس جسمي ..
نفتح عيوني .. نفيق .. نشوف لي أطرافي .. أنا قاعده أنا 🤦🏻♀️ ..
شن تديري يا مزنه 🤪
و بدت رحلتي في رفضي لي ذاتي .. من تنمر أصدقاء طفولتي .. من أستهزاءهم بملابسي .. من نظرة اللهفة لي فطورهم ..
كنت صغيرة لما درنا حادث في طريق النقازه .. مروحين من زرده .. طلعت علينا شاحنه و انقلبت السياره .. بابا توفى الله يرحمه ..
خوي عماد انقصت رجله و أصابه في عموده الفقري .. أنا و أمي و موده و مسره جروح و كسور بسيطه ..
كبرنا و عيوننا في حاجة غيرنا 🥺 ..
كبرنا نحسوا بالجوع ..
كبرنا و ما عمرنا مسكنا لعبه في الأيد ..
كبرنا و كبرنا و كبرنا ..
هكي 🤷🏻♀️ أنا أنسانه ناكره ذاتها من يوم وعت ع الدنيا ..
تزوجت و عمري 17 سنه .. من رجل ما نعرفاش .. جى خطبني و أهلي وافقوا عليه ..
لا عشت علاقة حب .. لا شغف المشاعر .. لا نار الأشتياق .. شي 🤷🏻♀️ ..
و في عمر 18 سنه ولدت طفلتي البكر 🎀🌸 .. سماها حسن ( زوجي ) رُقيه على أسم أمه ..
بيني و بينه ما كانش في حب .. كان عندي أحساس أن مش هذا الرجل الي يستحقني .. مش هذا الرجل الي مفروض نكون معاه .. مش هذا الرجل الي يحتويني و يكملني ..
بس لولا ظروف الي خلتني نتزوج صغيره و ما نكملش قرايتي ..
و رغم هذا كله كانت حياتي مستقره .. عاديه .. يوم بي يوم يفوت و خلاص 🤷🏻♀️ ..
جتني أمي للحوش .. قتلي خيره راجلك كل ما نجوا مهناش ؟
قتلها تاكسي شن تتوقعي منه يعني ! 🤷🏻♀️
قتلي ايه به ربي يعاونه ..
قتلي أختك موده سكنت في حوشها الجديد و بتذبح يوم الخميس .. و بتعزم ..
جتني ليّه في بطني 🤢 .. قتلها توا شن بنرفع معاي ؟
قتلي عاد أختك في جيابك حطت 100 دينار و دارتلك حلويات ..
قعدت نطيب في الغذاء و نخمم شن بنرفع معاي .. العشيه جوني اخواتي و كل وحده جابت معاها حاجه حلوه ..
قعمزنا وسط الحوش و طلعت عزوزتي سلمت و خشت دارها ..
قالولي أخواتي ما بعدك كيف متحمله .. لقطي قرشين و خودي حتى قطعة ارض و أبدي أبني بالشويه بالشويه ..
قتلهم باش بنبني ؟ و هو الي يخدم بيه ناكلوا بيه ... و حوش عيله .. يوم الي يجوا فيه أخواته بصغارهم لين يتسلف مرات ..
روحوا أماليه و في الليل قتله راهو اختي بتدير لمه لي حوشها و نبي هديه في حدود 500 دينار ..
قالي من وين بنجيبهم 😳 ...
قتله تصرف مش شغلي من وين بتجيبهم ..
سكت و نزل راسه 😔 ..
بس وقتها ما حسيتهاش أنا تنزيلة الراس هادي .. و جى يوم اللمه و جى حسن جابلي 150 دينار ..
قتله هذا شنو ؟
قالي هذا الي قدرت نلقطه 🥺 .. و أنا و الله حرمت روحي من القهوة و نقصت من الدخان و قللت مصاريف 🥺 ..
قتله مصاريف شنو حسن الي نقصتهم ؟ حسستني إني نطيب بي الدجاج و لا اللحم .. و تكسيدتي بالمكسرات و قهوتي بالكيكات و .......
طلع و خلاني .. و أنا نغلي 🤬 .. لا لبسه زي الناس .. لا صبغت شعري .. لا حاجة نلبسها في رقبتي .. راجل القهرة كان قعدت في حوش بوي خير ..
-----
و توا بعد ماتت روحي 💔 و بديت جسد بس .. بديت نتسائل ..
ليش مش عاجبني شي وقتها ؟
ليش مش حاسه بالرضى ؟
شن فيها لو مشيت لي اختي من غير ما نرفع شي ؟ ....
أممممممم ردات فعلنا كلها خوف 👌🏻
خوفاً من موقفي قدام أختي درت مشكله مع زوجي ...
خوفي من حكي الناس لو ضيفتهم في حوشي على بساطي و جلستي و أماعيني .. درت مشكله لزوجي ...
شن بيقولوا عليا الناس لما يشوفوني مش لابسه دبله !!
درت مشكله لي زوجي ..
يستحكم عليك شعور إنه مش راجل .. خيره فلان راجل فلانه و خيره فلان .. و خيره حظي أنا هكي 🤦🏻♀️ ..
-------
أتصلت بيا أمي قتلي بتجي ؟ قتلها يصلح في السياره من الصبح ما بتش تولع .. و سكرت الخط ..
و طلعت نبي نشوفه وين .. لقيته مهناش ..
أكيد ذبحوا توا 😠 .. أكيد مدايرين جو .. زعمه بدوا في عوالة التطييب ؟
اتصلت بي أمي نسأل فيها .. قتلي مقعمزين كلنا نديروا في العصبان و البنيات يديروا في البكلاوه في باكواتها .. سكرت الخط و انا 😡 ..
هذا وينه ؟
عليك حظ عندي 🤦🏻♀️ ..
جت الساعه 1 و جت الساعه 2 و جت الساعه 3 و جت الساعه 4 ..
و أنا نحس بقهرة و قلبي معلق في حوش اختي ..
جى حسن .. مدلي فلوس ..
قالي تسلفت 300 دينار هذا الي قدرت عليه ..
قتله توا عصر .. حتى العزومه فاتت ..
قالي على خاطري نوضي نرفعك .. أنتي مش برانيه ..
نضت لبست و طلعت و أنا نلعن في اليوم الي تزوجته فيه ..
و أنا طالعه قتلي عزوزتي و خيرها أختك ما عزمتنيش ؟ ناكل داب سنيناتي أنا راه 😒
طلعت ركبت السياره و ما رديتش حتى حرف ..
طول الطريق السياره تدخن .. و أنا بنتفجر 😡 .. قتله الي يسلم عليا يقولي خيره ريحتك دخان سيارات .. الناس ريحتها عطور ماركة و انا زيت سيارات محروق ..
و حسن ساكت 😔 ..
و من غفلتي ما كنتش نحس بقسوتي بكل 👌🏻... لحضه .. لحضه 🤚🏻
سمعتي الي سمعته ؟؟
و كأن في وحده قالت أنا سمعت أنها منتحره ! 😳
أنتي سمعتيها ؟
امس سمعت وحدة قالت ماتت لان عندها حالة نفسيه 🤔
يلا ما علينا 🤷🏻♀️ ..
مشيت حوش أختي .. خشيت حطيت رُقيه عند أمي و سلمت ع الناس ..
هادي خيرها لابسه هكي العفو ! شن تحساب روحها جايه محضر و لا نجمه !!
و هادي لابسه خواتمها كلهم و في الصبع الوسطي زوز خواتم 🤦🏻♀️ عليك هبال ..
قعمزت و شديت بنتي .. جت أمي جنبي .. قتلي خيرك اللطف وجهك زي الليمه ؟
قتلها عندي كحل و روج بس هذا الي نكسابه .. قتلي العفو 😳 ..
قتلها الله غالب ليلة العيد بس ياخدلي بي 15 دينار كريم و باودر .. و نستنى رمضان الي بعده باش نشري ..
قتلي نوضي زيني وجهك من اخواتك .. نضت نطلب منهم في مكياج .. و حطيت شويه و نزلت للناس ..
و في الليل جى بيروح بيا ..
قلت لي أمي بنعطيها 450 دينار .. قتلي و علاش هذا كله ! حطي 300 دينار و 150 خودي بيهم حاجات لي عمرك .. قتلها زعمه 🤔
قتلي نهار تاني ننزلوا لي باب الحريه خودي بيهم .. خشيت للحمام نعد في الفلوس و فصلتهم و طلعت اعطيت لي أختي 300 و روحت للحوش ..
رقدت رُقيه و غيرت حوايجي .. و جى حسن قرب مني ..
قالي درتي زيان ؟
قتله أسمه ميك اب 😒 ...
قالي ههههههههه زي بعضه كله ..
حاول يقرب مني .. نحيتله أيده ..
دخل أيده في جيب سرواله و أعطاني طرف شكلاطه ..
قتله شن هذا ؟
قالي الراجل الي مشيت تسلفت منه حطلي عصير و شكلاطه .. شربت العصير و جبتلك الشكلاطه 😅 ...
خديت منه طرف الشكلاطه .. قتله هذا هو !!
قالي كيف ! 😥
قتله الرجاله يديروا في حياش .. يأثثوا لي نساوينهم .. يديروا في لمات .. يهدوا في ذهب .. و انت جايبلي طرف شكلاطه !
ابتسم و عيونه فيهم كسرة خاطر قويه 🥺 ..
قالي من اول ما حط الشكلاطه .. قلت بنرفعها لي مزنه ♥️ ..
قتله به صحيت سلم راجلي 😒 .. حدفتها ع الطاوله و خشيت بنرقد ..
جى جنبي في الفراش .. و ما تحركش بكل .. كأنه ميت ..
و أنا نلعن فيه و كارهاته كره أعمى ..
لا قبول .. لا رضى ..
كنت نقتل فيه في كل كلمه .. في كل موقف .. في كل تصرف ..
نحسابه ح يموت بكري .. باش نعيش أنا بعده ..
متت أنا و هو قاعد حي 💙 قلبه عامر 💚 قلبه راضي 💜 ..
و أنا متت 💚🍁
No name ♥️🌺
