مات_الكلام31
قعدت على أعصابي 😰😰 شن ندير ؟ ..
منو نشاور ؟ .. منو بيوقف معاي ؟ .. أمي لو عرفت إني كنت مسافره ح تنكرني طول العمر ..
نبي نحكي لي أي حد 😰 .. نبي نتطمن .. نبي حد يكذب عليا .. نبي حد يبسطلي الأمور .. نبي حد يقولي عادي حاجة الله كبيره ..
مقعمزه في المطبخ لين بندوخ من الخوف 😰 .. طلعت من المطبخ نشبح في بنت خاشه من المدخل و راكبه من الدروج .. ما نبيش نوصفها .. كل الي نقدر نقوله إنها كانت راقيه .. جميله .. بنت عز .. الخير واضح عليها ..
ركبت خديت شنطتي .. مغيره ما قابلنيش بكل .. نزلت تحت .. لقيت أنسام .. قتلها شكون الي ركبت هادي ؟؟
قتلي هادي خطيبة مغيره 😉 ..
قتلها نعم !!!! 😳😳
رن تليفوني .. رديت .. الووو ..
ايوا مزنه .. تعالي لي حوشكم انا حسن ..
ءءءءءء أهلا حسن وين انت 😰😰
قالي تعالي حوشكم .. و سكر الخط ..
أول مره حسن يكلمني هكي 😰 .. أول مره نسمعه صوته هكي ..
نبلع في ريقي و نعاود .. أنا وين ؟ 😰 .... قلبي بيطلع من الخوف .. وين بنمشي توا ؟؟ 😰
فيقي يا مزنه فيقي .. طلعت من الشركه .. هادي ☝🏻 شن كانت تقول !! 😰😰 منو خطيبة مغيره ! ...
رقيه وين زعمه ؟؟
الطريق زحمه .. نبي تاكسي .. أنا معاش نشوف .. دوشه دوشه دوشه ...
ركبت تاكسي و طول الطريق و أنا ندعي .. رقبتي توجع فيا .. كتافي يوجعوا فيا .. نحس في روحي رزينه .. ما نبيش نوصل لي حوشنا 😰 قلبي بيموت 🤦🏻♀️💔
ريقي يابس .. نفكر في 60 كذبه .. وصلت حوشنا .. في سياره مدرسه برا ..
خشيت فتحتلي موده الباب .. لا كلمتني و لا دارت أي تعبير يخليني نفهم شن صاير ..
خشيت لقيت أمي مقعمزه هي و عماد و حسن .. قتلي أمي خشي و سكري الباب وراك ..
حي عليك يا مزنه 😰💔 game Over خلاص 🥺🥺💔💔
خشيت سكرت الباب و قعمزت .. راسي يلف بيا .. مش قادره نتحكم في جسمي .. حسن راسه في الأرض و أيديه في بعض ..
كانت نظرة عماد تقولي هيا احكي .. تكلمي و قولي الي سمعناه كذب ..
قتلي أمي راجلك جاي يبي نحكوا و نتفاهموا مع بعض ..
هزيت براسي و أنا كأني ثمله مش قادره نتكلم ..
طلع حسن جواز السفر من جيبه ..
أنا قلبي بيموت ..
قالي سافرتي تاني يوم نحبست و روحتي قبل ما نطلع بيوم ...
أنا لا نبي نعرف كيف سافرتي .. لا نبي نعرف كيف حجزتي ... لا نبي نعرف تأشيرتك كيف طلعت .. لا نبي نعرف وين خليتي بنتك ..
حاجة وحده بس نبي نقولها و قدام أماليك .. بنتكم معاش تلزمني .. لكن بنتي عندي 🤚🏻 ..
قتله أمي وسع بالك خلي نتفاهموا ..
قاللها أنا يا عمتي .. أنا ما كنتش نرقد في الحوش على خاطرها .. أنا عايش معاها و كأنها أختي .. أنا الي تطلبه مني و نقدر عليه نجيبهولها .. نتسلف من هذا و من هذا و من هذا .. تجيني خدمة برا طرابلس نقول لا ما نخليش مرتي ..
دمعته نزلت ..
كانت زي الجمر على قلبي ..
أنا 😰 بندوخ 😰 نحس في قلبي ينجرح مع كل كلمة يقولها .. نحس بيه الجرح في قلبي .. ناخد في النفس بالسيف .. راسي رزين ..
و كله كوم و نظرة عماد 🥺 ليا كوم تاني ..
للحضات حسيت روحي مش أنا .. ما فيش حد مقعمز معاي ... ما فيش حسن و عماد و امي ... أنا مش مزنه ... أنا مش في حوشنا ... أنا ما سافرتش .. أنا نبي نموت أهون 😔💔
قتلي أمي تكلمي .. كنت نشبح لي حسن و مش قادره نتكلم .. فمي ما يبيش يتحرك ..
ناض وقف و قالي سامحيني كان قصرت معاك يا بنت الناس لكن الحمدلله لا سرقت لا كذبت لا نصبت لا اعتديت على حد باش نعيشك كويس ... و تلفت لي عماد قالي سامحني عماد يا خوي و تلفت لي امي و قاللها سامحيني يا أمي .. بنتكم طالق ......
#مات_الكلام 🤷🏻♀️🥺💔
نضت نبي نشده و هو طالع بي رقيه .. طحت و غبت ع الوعي .. شوية راحة لي روحي الي كانت تتمرق بالمعنى الفعلي 👌🏻
نسمع في أمي تعيط .. نسمع في رقيه تعيط ماما .. مامااااااا .. ماماااااا .. مــــــ ا مـــــــ اااااا
نحس بي حبل على رقبتي .. أنا مخنوقه ..
فقت و روحي تقولي دوخي تاني خير .. الي بي تفيقي عليه ما عندك حمل و لا قدرة ليه ..
كنت كل ما نفيق نحس بي ضعف في قلبي و يغمى عليا تاني ..
فقت في المستشفى .. في إيدي تغذيه .. كنتي تحسابي روحك ذكيه يا مزنه و مش ح يعرف بيك حد .. و لا ما كنتيش معدله على حد أصلاً ..
نضت قتلهم وين بنتي ؟
قتلي أمي مش لما يبدا عندك بنت .. الي زيك حرام فيها كلمة أم ..
وحق الله 👌🏻 لو تشوفوا نظرة عين أمي تعرفوا الرعب في حد ذاته ..
قتلها حتى الي زيك حرام فيها كلمة أم .. نقزت عليا تبي تضربني و شدتها موده ..
قتلها و حتى الي زيك حرام فيها كلمة أخت ..
نحيت التغذيه من إيدي .. إيدي تقطر دم .. نضت بنطلع من المستشفى ..
موده تشد فيا .. نحيتلها إيدها و طلعت ..
ويني أنا ؟؟ .... صوت رقيه تبكي .. رجعني لي يوم وفاة بابا ..
رقيه .. رقيه ..
أنا مامتك صح .. بس في نفس عمرك ..
و ممكن أنتي أكبر ..
وين بنمشي ؟ .. وين وين وين ...
خديت تاكسي و مشيت حوش أهل حسن .. طقيت ع الباب .. فتحتلي مفيده .. هادوا ما عندهمش حوش !! ديما هنا ..
قتلها نبي حسن .. قتلي خشي ..
خشيت و سكرت عليا الباب و بدت تضرب فيا هي و حميده .. ندف فيها و نقوللها خيرك ! خيرك !
علقت في فمي الكلمة هادي بس ..
شعري تقطع بين ايديهم .. دفتهم أمهم و طلعت نزحف و انا نلبس في وشاحي ..
قعمزت فم الحوش راسي يوجع فيا .. شعري متقطع .. فمي دم ..
وين رقيه ! ..
ووووووووين رقيه ! ..
نضت وقفت .. مشيت مشوار على رجليا .. وقفت تاكسي و روحت للشقه ..
مقعمزه بروحي .. فااااضيه الشقه ..
تليفوني يرن .. من بكري نسمع فيه يرن ..
تكيت راسي ع البساط ..
كل شي ليه نهاية ..
مدام في من بيحاسبك سيورك تطيحي .. طيحة تخسرك كل شي ..
يومي بدايته حضن و قبلات و جنه ♥️🌺 و وسطه فقد و عياط و مستشفى .. و آخرته ضرب و بروحي في شقتي ..
سافري توا يا مزنه زي ما تبي .. أهو خداها منك 🤷🏻♀️💔
أنا ما نبيش هكي ..
أنا نبي أماليا .. يجو يقعدوا معاي و يجيبولي رقيه .. أنا نبي نحكي كل شي لي أي حد و يقولي خلاص الي فات مات و افتحي صفحة جديدة ..
أنا نبي قلب على قلبي 🥺♥️
معدتي توجع فيا .. أووووف جعانه .. خديت مخده و ضغطتها على بطني ..
سبيدروا رقيه قدامي ..
الأشياء المحذوفه قدامك لي أطفالك و تذمري منها .. بدت عندي أنا أغلى ذكرى ..
كل ما بنغفى .. يعصرني قلبي .. نفيق مخلوعه .. شكلهم ضربولي ابرة مسكن ..
تليفوني يرن تاني ..
خديته ..
جمال 😰 ناقصه أنا 🤦🏻♀️ ..
بعتلي رساله ( تتغلي يا غلاي عليّ )
تي هذا كيف يحقق مع الناس بي الأشعار ! 🙄
مغيره متصل ..
أمي متصله ..
مسره تتصل ..
سكرت الجهاز و حذفته ..
في قانون عيلتنا .. مش عارفه عندكم القانون هذا أو لا 🤷🏻♀️
في قانون عيلتنا .. لما أمي تزعل مني .. أخواتي يزعلوا مني معاها .. نخش قائمة المغضوب عليهم .. و تزيد عطاءات أخواتي لي أمي باش تزيد أمي من زعلها عليا ..
ما علينا 🤦🏻♀️ ..
مرت ليلتي گ أسوء ليله ممكن تمر عليا .. طلع الصبح .. نضت خشيت الدوش و توضأت للصلاة ....
ليا هلبا ما صليتش .. نبي دعم ألهي .. لبست عباية و وشاح .. وقفت ..
هي القبله وين ؟
يمين و لا يسار و لا وين ؟
وين كان حسن يصلي ؟
كان يوقف جهة الروشن ممكن !!
وين القبله ؟
خشيت الدار ... لقيت صلاّية حسن قاعده زي ما هي .. و كأنه هو نعتني مكان القبله ..
في من ناس حتى و هما فارقوك تقعد عطاءاتهم مستمره سبحان الله 🥺💔
No name ♥️🌺
