رواية #مات_الكلام🥀
( خيال ممزوج بلواقع )
للكاتبة #نادرة
الرواية بلهجة الليبية
حلقة 12🔥
كانت أحلى عيد أضحى بالنسبه ليا من لما تزوجت ..
تاني يوم جو أخواتي و كل وحدة فيهم جابت كتف خروفها و جايبين حلويات و مشروب ..
بدا الحمل الي كنت نحس فيه ع كتافي يخف .. بديت نحس أني زيني زيهم ..
قعمزنا هذرزنا و المغرب درنا شواء في الجنان .. موده توري فيا في صور العيد مع أهل راجلها .. عيوني في الطاوله 😳 .. مشكلين سلايط هلبا و أنواع لحوم منها الدجاج و الكباب و جميع انواع المشاريب و حلويات و فواكه ..
قتلها موده هذا كله بتاكلوه ؟ 😳
قتلي الي خاطره في حاجة ياكل ..
قعدت نقول في داخلي 🤔 توا الناس هادوا الي يتفاخروا علينا .. يعرفوا أنهم يغرسوا في الحقد و السخط في قلوبنا او لا ؟؟ ..
كملنا الشواء و حطينا تعشينا .. بعدها نضت غسلت ايديا و خديت تليفوني ..
لقيت مغيره باعتلي رساله يهني فيا بعيد الأضحى 😳😳 و في نهاية الرساله مكتوب ( أخوكم مغيره .... )
قلت شن يقصد بيها كاتب أسمه ! 🤔..
زعمه نرد عليه !! ...
به شن نكتب ! 🥺 ...
رديت برساله .. ( و انت طيب و بألف خير يارب )
حذفت الرساله و سكرت التليفون ..
و طول ما انا مقعمزه و انا نفكر في الرساله .. و ليش أنا بالذات ! .. أكيد معجب بيا و يحاول يتودد لي ..
آمته بس تكمل عطلت العيد 🥺♥️ و نرجع خدمتي تاني ..
ليش برغم كل شي شفته و سمعته عليه قاعد مسيطر ع تفكيري 😰 !!
و كأن الله عز و جل لما قال { وزَيَّنَ لَهُمُ الشَّيْطانُ أعْمالَهُمْ } كان يقصدني 🥺💔 ...
رجعنا للخدمه و أنا نستنا آمته نشوفه 🥺♥️ .. و قعدنا مقعمزين نهدرزوا أنا و حنان .. و نسمع في هذرزه برا ..
صوت مغيره يحكي مع حد تاني .. أختفى الصوت و شكله ركب مكتبه ..
جى أستاذ صلاح و طلب مني نطبع رساله للمصرف .. و قالي لكل شركه ديري نسخه و أركبي لي مغيره يوقع و يختم و جيبيهملي ..
بديت نطبع في الرساله و كملتهم و ركبت للمكتب فوق ..
قمة التوتر توقفي قدام باب مكتبه 🥺 ...
و لأنك في ذمة رجل تاني .. وقتها بس تعرفي ليش الله عز و جل حرم الأختلاط 👌🏻👌🏻 .. ليش الله عز و جل أمرنا بي غض البصر 👌🏻👌🏻..
و العين تشوف و النفس تهوى كل ما هو جميل 🥺♥️ ..
خشيت المكتب .. كان يشرب في قهوة .. و مقعمز حاط رجل فوق رجل ..
نظرتي ليه كانت تتسائل ..
شن بيصير معاي و معاه بكره ! ..
كيف بيكون حالنا بعد شهر .. شهرين .. سنه .. سنتين ! ..
كيف بيجرفني هالحب معاه ! ..
حطيت الاوراق ع المكتب .. حط تليفونه ع الطاوله ..
ع طول تلمحت تليفونه .. لقيته فاتح ع الفيس .. أسم صفحته ( صاحب الظل الطويل ) ..
شن الأسم الغريب هذا ! 🤔 ..
خدا الاوراق و ختمهم و وقعهم ..
قتله شكراً ع المعايده 😊 ..
قالي معايدة شنو ؟ ..
قتله بعتلي رساله في العيد ..
قالي أها ههههههههه 😅 .. في العاده نبعت رساله و ندير تحديد للأسماء كلهم في جهازي و نبعت ... قتله أها 😰 يعني ما كانتش ليا أنا مخصوص ؟
ناض وقف و من سؤالي ليه عرف إني فرحت بي معايدته و قداش حب يستثمر اللحضه ..
يحسوا .. يحسوا ..
يحسوا بضعفك .. يحسوا بي أعجابك .. يحسوا بي لهفتك .. يحسوا بخجلك ..
يحسوا حتى بسقف طموحك في العلاقه معاهم ..
قرب مني و قالي كنتي في بالي بس قلت نعايدها في المكتب خير ..
و مش عارفه ليش ما لاحظتش بروده أول ما خشيت مكتبه و كيف فجأه تغير معاي ..
عاودت رتبت أفكاري .. و قتله عيّد أنسام قبل 😉 ....
ضحك 😄 و قالي ليش مش حاسه روحك موظفه من أول يوم ؟
قتله كيف ؟ 😳
قالي أنزلي مكتبك و تو تعرفي ليش 😉
كانوا عيوني سباقين لمرحله طويله جدا من الأعجاب .. يعبروا ♥️ .. يتأملوا .. يحفظوا في تفاصيله كلهم .. يحكوا .. و حتى يحضنوا ..
وخرت و قتله أعطيني الورق ..
شاورلي بي أيده ع المكتب .. مشيت خديته .. و أنا طالعه سكر عليا الباب و شدني من خصري ..
انصدمت 😳😳
أبتسم 🙂 و قالي مرات ما فيش داعي تنزلي باش تتأكدي 😉
نحيت أيده و فتحت الباب نزلت ..
متوتره .. تنفسي متسارع .. واضح عليا ان في شي ..
خشيت المكتب لقيت حنان ..
نحس في ملابسي ريحتهم من عطره ..
نشم فيه 🥺♥️
نحس بيه قاعد قريب مني ..
بلعت ريقي 😰 ..
قعمزت .. قتلي حنان نجيبلك قهوة ؟
قتلها ياريت به ..
و مخيلتي 👌🏻 بنت لي قصر ع الأرض و حياة مخمليه 🌸🌸 ..
و مخيلته قالتله ما تضيعش وقت و أصطادها طول 👌🏻 ...
نزل مغيره و جى للمكتب و وقفت حنان طول و قالتله تفضل أستاذ مغيره ..
في الوقت الي أنا مقعمزه ع الكرسي نشوفله 🥺♥️
قالي شفتي الفرق ؟ ..
انتبهت طول 😰 و نضت وقفت و قعدت ساكته ..
كانت حنان تشوفلي و تتلفت تشوف لي مغيره 😳😳
قاللها ديري دوره ع غرفة الاجتماعات عندنا أجتماع مع لبنانيين ..
قالتله حاضر ..
طلع مغيره و رجعت قعمزت .. و أنا نسأل في نفسي ليش نتعامل معاه و كأنه شخص مقرب ليا ؟ ..
ليش نتصرف و كأن المكان مكاني ؟ ..
و الحواجز الي بانيتها حنان .. مهدمتها أنا ..
و السرعه الي كان يبي يتقرب مني بيها مغيره كان عقلي يترجمها أعجاب و أهتمام و بداية حب ..
و كان الواقع مترجمها إني مجرد رقم .. عدد .. ح نختفي في شهر .. شهرين .. سنه .. سنتين ..
🤷🏻♀️💔
روحت مع حسن و كانت تنتهي أحلامي بمجرد ما نركب معاه ..
هذا واقعي 💔 ..
يااااا رب رحمتك ..
نفسي عافت كل شي منه ..
طريقة كلامه ..
لبسه ..
حتى طريقة تسريح شعره ..
نكراني لي واقعي بدا يتفاقم يوم عن يوم ..
——————————-
تعرفي ......
ثقي 👌🏻 و تأكدي 👌🏻 ....
مهما كانت مكانتك غاليه و تألموا الناس لي موتك ....
ح يفرحوا بخجل و هما يتقاسموا أشياءك 👌🏻🤷🏻♀️💔
يعني توا لما تشري شي ثمين .. تأمليه للحضات و قولي يا هل ترى شكون بياخده بعد مماتي ..
خطيبة حسن قبيحه .. نصيبها من الجمال معدوم ..
شوفيها كيف مقعمزه تتلفت يمين و يسار ..
هيا توا بتبدأ حياتها .. و أحنا حياتنا انتهت خلاص ... 🤷🏻♀️
———————————-
و أنا راكبه مع حسن تلفتت لي كرسي السياره الخلفي .. لقيت كيس شفاف فيه حكة فول مدمس و خبزه ..
تلفتت قدام .. ليش حاطهم هنا حسن ؟
في نصف الطريق سألته ..
تتغدى عند أماليك ؟؟
قالي ع حسب الخدمه .. كان عندي توصيله ما نروحش نتغدى ..
وقف ع الكوشه بياخد خبزه ..
تلفتت للكرسي الخلفي نفتش فيه ..
لقيت ملابس داخليه مش نظيفه 😳 ..
سرواله مش نظيف 😳😳..
خطر في بالي نشوف صندوق السياره الخلفي..
ركب حسن و روحنا حوش أماليه ..
خشينا بنتغدوا و بمجرد ما خش حسن الحمام طلعت للسياره طول و فتحت الصندوق الخلفي .. لقيت فيه حوايج حسن و بطانيه .......
...............................
و ألبوم عرسنا 🥺💔
كأن توتري سيطر على عدد نبضات قلبي ..
سكرت السياره و خشيت نجري ..
قتله نديرلك قهوة ؟
قالي بنرفعها معاي لاني بنطلع نخدم خير من امك تقول هذا خيره تغدا و بيرقد و بيشرب حتى قهوة 😄😄😄😄
شديت أيده متردده .. شديته بي أنسانيه فقط .. مش لاني زوجته او لاني نحبه ..
قتله خش اتكى شويه تعب عليك ..
قالي قولي الحق 😉 انتي تبيني و لا حق تعب عليا ؟؟؟
قتله بخجل مضطره نجامل ( أنا نبيك ) 🥺💔
قالي معناها الليله نجي نبات عندكم ..
طلع حسن و انا نفكر في عذر يخليني نهرب منه و في الوقت نفسه روحي في نزاع بين الجنه و النار ♥️💔
العشيه جت مسره و عزمتنا على جياب سلفتها .. قتلي أمي بتمشي ؟
قتلها بنمشي شن بنلبس ؟؟ 😔
قتلي ألبسي أي حاجة حتى من أخواتك ..
قلتلها لا لا مش ح نمشي ..
نضت ندير في قهوة .. و أنتبهت 😳😳 سلفتها هادي بالك أخت مغيره !! 🥺🥺
طلعت حطيت سفرة القهوة و سألت مسره .. قتلها من هي سلفتك هادي ؟؟
قتلي مروه أخت صاحب الشركة الي تخدمي فيها .. قتلي أمي أمشي و واصلي الناس و خالطي شن بتقعدي ديما شاده الحوش ؟
قتلها ايه ايه نمشي صح ☺️☺️ ..
قتلي مسره تعالوا تغذوا عندي و خودي لبسه مني .. قتلها ان شاءالله به 😍 ..
المغرب كلمني حسن قالي شنو صار ؟
قتله مسره بايته عندنا خليها مره تانيه .. قالي به وتي روحك نمشوا حوشنا ..
تفاجأت 😳 قتله لا لا مستحيل نخشله الحوش هداكا أنا ..
قعد طول المكالمه يترجى فيا نعطيه حقه گ زوج ..
و خش عليا مغيره أنتضار 😳😳 هذا ليش متصل بيا !! ..
و تحججت بكل الطرق باش ما نكونش معاه في مكان واحد ..
و في داخلي أحساس و أنا نسمع في كلمات الأغراء من حسن إني نخون في مغيره 🥺♥️
هيا سكر الخط 😠 و حسن كل مره يطول في الحكي و أنا على أعصابي ما نبيش مغيره يتصل تاني يلقاه انتضار ..
عرفت وقتها 👌🏻 أنا احنا الي نتلاعبوا بي الحقوق و المبادئ ع حسب مشاعرنا ..
و بدل ما نخاف من راجلي يخش عليا انتضار .. خفت ع شخص مزال حتى ما عبر ع اعجابه بيا 🤷🏻♀️💔
سكرت الخط و أنا حاسه أني درت أنجاز باش نتخلص من حسن الليله ..
شاده التليفون في أيدي .. 🥺♥️ نتصل بيه ؟؟
لا لا لا لا ..
نتصل ؟ 🥺♥️
أستغفر الله 🤦🏻♀️
تاني يوم مشيت الخدمه و نستنى نشوفه و يكلمني ع الأتصال ..
ومره مره يخطر عليا طيف البنت الي أنتحرت .. و نسأل نفسي .. ليش أنتحرت ؟
و ليش مغيره مش متأثر لي موثها ؟؟
روحت من الخدمه لي حوش مسره طول من غير ما نتلاقى معاه بكل ..
تغذينا و جت موده غادي و خشيت لي دار مسره .. كل مره نقيس قفطان ..
لين لقيت قفطان أسود جى على مقاسي .. و طلعنا نشربوا في قهوة في الجنان و مسره تهذرز على أخت مغيره ..
تاني يوم الصبح جى حسن رفعنا لحوش مسره و قعدنا نجهزوا في روحنا ..
سرحت شعري و لفيته و حطيت ميك اب و لبست قفطاني ..
و قلت لي حسن خلي رقيه معاك ..
مشينا لي حوش مغيره لان مروه مدايره لمة جيابها في حوش أمها مش في حوشها ..
خشينا و كل شي كان ياخد العقل .. و كأن العزومه هادي جت باش ننصدم بي واقعهم و نفيق على واقعي ..
حسن يبعتلي في رسايل ( امته نروح بيك يا عروستي 😘 )
أنا 🤦🏻♀️😰 ....
نتجاهل في رساله وراء رساله ..
و مش هكي و بس نحاول نحافظ ع هدوءي من كثر ما رسايله تضايق فيا ..
و لما ما رديتش ع رسايله بدا يتصل بيا ..
أمي تقولي ردي ..
نقوللها لا ..
كثروا أتصالاته و موده تقولي ردي ..
قتلها تليفوني ما فيشي كفر .. البطاريه باللصقه شادتها .. نتحشم نطلعه قدام الناس ..
قتلي أمي خشي تكلمي داخل ..
نضت خشيت داخل و قعدت واقفه نستنى فيه يتصل ..
شفت مغيره .. 😳
ايه هذا هو مغيره ..
قدمت خطوه نبي نمشي نسلم عليه .. وقفت في مكاني لا لا ما تمشيش مزنه 😰
رن تليفوني ..
تلفت مغيره ..
لا أرادياً قلت كيف حالك أستاذ مغيره 🥺♥️
دار حركة بي حواجبه و كأنه يقولي منو أنتي ؟
قتله مزنه ..
قالي تعالي ..
حركت بي صبعي 👆🏻 لا لا ..
ضحك و قالي تعالي ..
مشيت سلمت و شدني من أيدي طلعنا برا ..
قالي شن جابك هنا ؟
قتله مروه تقرب لي مسره اختي ..
قالي أها ايه ايه نسيت .. بس شن الحلاوه هادي 😉 تهبلي و صغيرونه 😉♥️
بلعت ريقي و قلت لنفسي وصلت خلاص و تليفوني يرن ..
ارحل يا حسن ارحل 🤦🏻♀️ ..
قتله شن ادير هنا ؟
قالي النسر متعي مريض كنت جايبله دكتور بيطري ..
بعدها ضحك 😄 و قالي حلو السؤال 😉
تأسفت و قتله مش قصدي ..
بس كيف النسر مريض ؟
نسر حقيقي ؟؟
قالي طبعاً حقيقي ..
قتله هنا ؟
قالي تعالي شوفيه ..
شدني من أيدي و رفعني زي الدار في الجنان .. كان جنانهم بكبر شارعنا كله .. مغروس فيه موز و مانجا و نخل ..
خشينا الدار لقيت النسر مغطيين عيونه ..
قرب مني مغيره و قالي ردي بالك ..
قتله شن بدير بي نسر ؟
قالي نحبهم 😄 جبته من برا ..
قتله نعرف ان النسور تقتل حتى البشر ..
زاد قرب مني و حط ايده ع خصري و قربني منه و قالي تعرفي كيف يوالف النسر صاحبه ؟ 😉
توترت 🥺 و قتله لا ..
زاد قرب مني و قالي تفتحيله فمه و تحطي ريقك في فمه مره مرتين ثلاثه ..
بلعت ريقي 🥺♥️
و حاولت نفتح عيوني الي اتسكروا بروحهم ..
قتله مغيره ..
ابتسم و قالي و الله العضيم 😉
نحيت له أيده و بنطلع من الدار ..
شدني و قربني منه و قالي نبي نوالفك حتى أنا ..
قتله كيف يعني !
قرب مني و باسني و أعطاني من لعابه ..
........
ح نتنهد كل ما نتفكر الموقف هذا 🤷🏻♀️💔
رن تليفوني .. باعدت مغيره و طلعت من الدار بسرعه ..
حسن يتصل ..
مش قادره نرد .. 😰
مسحت فمي و طلعت جنب امي واخواتي ..
شن ضيفونا ؟ الله اعلم ..
شن كليت ؟ الله اعلم ..
شن يهدرزوا ؟
شن لابسين ؟
في حوش شكون انا ؟؟
يتبع ♥️🌺
